Humanity: ರೋಗಿಯ ಕೊನೆಯ ಕ್ಷಣದ ಭೇಟಿ: ಬದುಕಿನ ಹಾದಿಯನ್ನೇ ಬದಲಿಸಿಕೊಂಡ ಮಹಿಳೆ!

ಮಹಿಳೆಯ ಹೆಸರು ಅಲಿಸನ್ (ಹೆಸರು ಬದಲಾಯಿಸಲಾಗಿದೆ). ಆಕೆ ಈ ಹಿಂದೆ ದೊಡ್ಡ ಕಂಪನಿಯೊಂದರಲ್ಲಿ ಕೈತುಂಬಾ ಸಂಬಳ ಪಡೆಯುವ ಉದ್ಯೋಗದಲ್ಲಿದ್ದರು. ಒಮ್ಮೆ ಅವರು ಆಸ್ಪತ್ರೆಯಲ್ಲಿದ್ದ ತಮ್ಮ ಪರಿಚಯಸ್ಥರನ್ನು ನೋಡಲು ಹೋಗಿದ್ದಾಗ, ಅಲ್ಲಿ ಯಾರೂ ಇಲ್ಲದೆ ಒಂಟಿಯಾಗಿ ಸಾವು ಎದುರಿಸುತ್ತಿದ್ದ ವೃದ್ಧ ರೋಗಿಯೊಬ್ಬರನ್ನು ಭೇಟಿಯಾಗಬೇಕಾಗಿ ಬಂತು. ಆ ವೃದ್ಧರ ಕೊನೆಯ ಕ್ಷಣಗಳಲ್ಲಿ ಅಲಿಸನ್ ಅವರ ಕೈ ಹಿಡಿದು, ಸಮಾಧಾನದ ಮಾತುಗಳನ್ನಾಡುತ್ತಾ ಅವರ ಜೊತೆಗೇ ಇದ್ದರು. ವೃದ್ಧರು ಅತ್ಯಂತ ಪ್ರಶಾಂತವಾಗಿ ಕಣ್ಣು ಮುಚ್ಚಿದರು.

ಈ ಒಂದು ಘಟನೆ ಅಲಿಸನ್ ಅವರ ಮನಸ್ಸಿನ ಮೇಲೆ ಭಾರಿ ಪರಿಣಾಮ ಬೀರಿತು. "ನಾವೆಲ್ಲರೂ ಬದುಕನ್ನು ಹೇಗೆ ಆಚರಿಸಬೇಕೆಂದು ಯೋಚಿಸುತ್ತೇವೆ, ಆದರೆ ಕೊನೆಯ ಕ್ಷಣದಲ್ಲಿ ಗೌರವಯುತವಾಗಿ ಮತ್ತು ಪ್ರೀತಿಯಿಂದ ಪ್ರಾಣ ಬಿಡುವುದು ಕೂಡ ಅಷ್ಟೇ ಮುಖ್ಯ" ಎಂದು ಅರಿತ ಅಲಿಸನ್, ತಮ್ಮ ಹಳೆಯ ಉದ್ಯೋಗಕ್ಕೆ ರಾಜೀನಾಮೆ ನೀಡಿ ಅಧಿಕೃತವಾಗಿ 'ಡೆತ್ ಡೂಲಾ' ತರಬೇತಿ ಪಡೆದರು.

ನಮ್ಮ ಸಮಾಜದಲ್ಲಿ ಮಗುವಿನ ಜನನದ ಸಮಯದಲ್ಲಿ ಸಹಾಯ ಮಾಡಲು ‘ದಾದಿಯರು’ ಅಥವಾ ‘ಡೂಲಾ’ ಇರುವಂತೆ, ಒಬ್ಬ ವ್ಯಕ್ತಿ ಸಾವಿನ ದಾರಿಯಲ್ಲಿದ್ದಾಗ ಅವರಿಗೆ ಮಾನಸಿಕ, ಆಧ್ಯಾತ್ಮಿಕ ಮತ್ತು ಭಾವನಾತ್ಮಕ ಬೆಂಬಲ ನೀಡುವವರನ್ನು ‘ಡೆತ್ ಡೂಲಾ’ ಎನ್ನಲಾಗುತ್ತದೆ.

ಇವರು ಯಾವುದೇ ವೈದ್ಯಕೀಯ ಚಿಕಿತ್ಸೆ ನೀಡುವುದಿಲ್ಲ. ಬದಲಿಗೆ, ಸಾವು ಹತ್ತಿರವಿರುವ ರೋಗಿಗಳ ಒಂಟಿತನವನ್ನು ದೂರ ಮಾಡುತ್ತಾರೆ. ಅವರ ಕೊನೆಯ ಆಸೆಗಳನ್ನು ಕೇಳಿ ತೀರಿಸಲು ಪ್ರಯತ್ನಿಸುತ್ತಾರೆ. ಸಾವಿನ ಭಯವನ್ನು ಹೋಗಲಾಡಿಸಿ, ಮನಸ್ಸನ್ನು ಪ್ರಶಾಂತಗೊಳಿಸುತ್ತಾರೆ. ರೋಗಿಯ ಕುಟುಂಬಸ್ಥರಿಗೂ ಈ ಕಠಿಣ ಪರಿಸ್ಥಿತಿಯನ್ನು ಎದುರಿಸುವ ಧೈರ್ಯ ತುಂಬುತ್ತಾರೆ.

"ನನ್ನ ಈ ಹೊಸ ವೃತ್ತಿಯಲ್ಲಿ ನನಗೆ ಸಿಗುವ ಆತ್ಮಸಂತೃಪ್ತಿ ಕೋಟಿ ರೂಪಾಯಿ ಕೊಟ್ಟರೂ ಸಿಗಲ್ಲ. ಒಬ್ಬ ವ್ಯಕ್ತಿ ಈ ಲೋಕವನ್ನು ಬಿಟ್ಟು ಹೋಗುವಾಗ ನೆಮ್ಮದಿಯಿಂದ, ಮೊಗದಲ್ಲಿ ಸಣ್ಣ ನಗುವಿನೊಂದಿಗೆ ಹೋಗುವಂತೆ ಮಾಡುವುದಕ್ಕಿಂತ ದೊಡ್ಡ ಪುಣ್ಯದ ಕೆಲಸ ಮತ್ತೊಂದಿಲ್ಲ" ಎನ್ನುತ್ತಾರೆ ಅಲಿಸನ್. ಪಾಶ್ಚಿಮಾತ್ಯ ದೇಶಗಳಲ್ಲಿ ಈಗ ಈ ‘ಡೆತ್ ಡೂಲಾ’ ಪರಿಕಲ್ಪನೆ ಭಾರಿ ಜನಪ್ರಿಯತೆ ಪಡೆಯುತ್ತಿದ್ದು, ಮನುಷ್ಯತ್ವದ ನಿಜವಾದ ಅರ್ಥವನ್ನು ಸಾರುತ್ತಿದೆ,(ಏಜೆನ್ಸೀಸ್​).