ಸಮುದ್ರದಲ್ಲಿ ಶುರುವಾಗುತ್ತಾ ಮಹಾಯುದ್ಧ! ಅಮೆರಿಕಕ್ಕೆ ಇರಾನ್ ಕೊಟ್ಟ 'ಡೆಡ್ಲಿ' ವಾರ್ನಿಂಗ್ ಹಿಂದೆ ಅಡಗಿದೆಯೇ ಮಹಾ ಸಂಚು? IranVsUSA

ಇರಾನ್‌ನ ಜಂಟಿ ಮಿಲಿಟರಿ ಕಮಾಂಡ್‌ನ ಕಮಾಂಡರ್ ಅಲಿ ಅಬ್ದುಲ್ಲಾಹಿ ಅವರು ಬುಧವಾರ ಈ ಆಘಾತಕಾರಿ ಹೇಳಿಕೆ ನೀಡಿದ್ದಾರೆ. ಅಮೆರಿಕವು ಇರಾನ್‌ನ ಆರ್ಥಿಕತೆಯನ್ನು ಉಸಿರುಗಟ್ಟಿಸಲು ಬಂದರುಗಳಿಗೆ ದಿಗ್ಬಂಧನ ವಿಧಿಸಿರುವುದು ಕೇವಲ ಪ್ರಚೋದನೆಯಲ್ಲ, ಬದಲಿಗೆ ಈಗ ಜಾರಿಯಲ್ಲಿರುವ ಕದನ ವಿರಾಮದ ಸ್ಪಷ್ಟ ಉಲ್ಲಂಘನೆ ಎಂದು ಬಣ್ಣಿಸಿದ್ದಾರೆ.

ನಮ್ಮ ರಾಷ್ಟ್ರೀಯ ಸಾರ್ವಭೌಮತ್ವ ಮತ್ತು ಹಿತಾಸಕ್ತಿಗಳನ್ನು ರಕ್ಷಿಸಲು ಇರಾನ್ ಶಕ್ತಿಯುತವಾಗಿ ಕಾರ್ಯನಿರ್ವಹಿಸಲಿದೆ. ಅಮೆರಿಕ ತನ್ನ ಹಟಮಾರಿತನ ಬಿಡದಿದ್ದರೆ, ನಾವು ಇಡೀ ಗಲ್ಫ್ ಪ್ರದೇಶದ ವ್ಯಾಪಾರ ಮಾರ್ಗವನ್ನೇ ಬಂದ್ ಮಾಡುತ್ತೇವೆ ಎಂದು ಅಬ್ದುಲ್ಲಾಹಿ ಎಚ್ಚರಿಸಿದ್ದಾರೆ.

ಸುಮಾರು ಒಂದು ತಿಂಗಳ ಹಿಂದೆ ಅಮೆರಿಕ ಮತ್ತು ಇಸ್ರೇಲ್ ನಡೆಸಿದ ದಾಳಿಯ ನಂತರ ಇರಾನ್ ಈಗಾಗಲೇ ಹೋರ್ಮುಜ್ ಜಲಸಂಧಿಯನ್ನು ಪರಿಣಾಮಕಾರಿಯಾಗಿ ಬಂದ್ ಮಾಡಿತ್ತು. ಈ ಮಾರ್ಗದ ಮೂಲಕ ಜಗತ್ತಿನ ಒಟ್ಟು ತೈಲ ಪೂರೈಕೆಯ ಶೇ. 20ರಷ್ಟು ಭಾಗ ಸಾಗುವುದರಿಂದ, ಇರಾನ್‌ನ ಈ ನಿರ್ಧಾರವು ಅಂತಾರಾಷ್ಟ್ರೀಯ ಮಟ್ಟದಲ್ಲಿ ತೈಲ ಬೆಲೆ ಏರಿಕೆಗೆ ಕಾರಣವಾಗಲಿದೆ.

ಅಮೆರಿಕವು ಸೋಮವಾರದಿಂದ ಇರಾನ್ ಬಂದರುಗಳಿಗೆ ಹೋಗುವ ಮತ್ತು ಬರುವ ಹಡಗುಗಳನ್ನು ತಡೆಯುತ್ತಿದೆ. ಆದರೆ, ಇತರ ದೇಶಗಳ ವಾಣಿಜ್ಯ ಹಡಗುಗಳಿಗೆ ಅಡ್ಡಿಪಡಿಸುವುದಿಲ್ಲ ಎಂದು ಹೇಳಿತ್ತು. ಈಗ ಇರಾನ್ ಇದಕ್ಕೆ ಪ್ರತಿಯಾಗಿ ಎಲ್ಲಾ ವ್ಯಾಪಾರವನ್ನೂ ಸ್ಥಗಿತಗೊಳಿಸುತ್ತೇವೆ ಎಂದು ಹೇಳಿರುವುದು ಸಂಘರ್ಷವನ್ನು ನೇರ ಯುದ್ಧದತ್ತ ತಳ್ಳುತ್ತಿದೆ.

ಒಂದೆಡೆ ಯುದ್ಧದ ಬೆದರಿಕೆಗಳಿದ್ದರೂ, ಮತ್ತೊಂದೆಡೆ ಕದನ ವಿರಾಮವನ್ನು ವಿಸ್ತರಿಸಲು ಮಧ್ಯಸ್ಥಿಕೆದಾರರು ತೀವ್ರ ಪ್ರಯತ್ನ ನಡೆಸುತ್ತಿದ್ದಾರೆ. ಏಪ್ರಿಲ್ 22 ರಂದು ಪ್ರಸ್ತುತ ಕದನ ವಿರಾಮದ ಅವಧಿ ಮುಗಿಯಲಿದ್ದು, ಅದನ್ನು ವಿಸ್ತರಿಸಲು ಅಮೆರಿಕ ಮತ್ತು ಇರಾನ್ ಒಪ್ಪಿಗೆ ನೀಡಿವೆ ಎಂದು ವರದಿಗಳು ತಿಳಿಸಿವೆ.

ಸಂಧಾನಕ್ಕೆ ಅಡ್ಡಿಯಾಗಿರುವ 3 ಪ್ರಮುಖ ವಿಷಯಗಳು

ಇರಾನ್‌ನ ಪರಮಾಣು ಕಾರ್ಯಕ್ರಮ: ಅಮೆರಿಕವು ಇರಾನ್‌ನ ಅಣು ಚಟುವಟಿಕೆಗಳಿಗೆ ಸಂಪೂರ್ಣ ಬ್ರೇಕ್ ಹಾಕಲು ಬಯಸಿದೆ.

ಹೋರ್ಮುಜ್ ಜಲಸಂಧಿಯ ನಿಯಂತ್ರಣ: ಸಮುದ್ರ ಮಾರ್ಗದ ಮುಕ್ತ ಸಂಚಾರದ ಮೇಲೆ ಇರಾನ್ ಹಿಡಿತ ಸಾಧಿಸಲು ಯತ್ನಿಸುತ್ತಿದೆ.

ಯುದ್ಧದ ಪರಿಹಾರ ಧನ: ಯುದ್ಧದಿಂದಾದ ಅಪಾರ ಹಾನಿಗೆ ಅಮೆರಿಕದಿಂದ ಪರಿಹಾರವನ್ನು ಇರಾನ್ ಕೇಳುತ್ತಿದೆ.

ವಿಶ್ವಸಂಸ್ಥೆಯ ಪ್ರಧಾನ ಕಾರ್ಯದರ್ಶಿ ಆಂಟೋನಿಯೊ ಗುಟೆರೆಸ್ ಮತ್ತು ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಅವರು ರಾಜತಾಂತ್ರಿಕ ಮಾತುಕತೆಗಳ ಮೂಲಕ ಸಮಸ್ಯೆ ಬಗೆಹರಿಯುವ ವಿಶ್ವಾಸ ವ್ಯಕ್ತಪಡಿಸಿದ್ದಾರೆ.

ಕಳೆದ ಏಳು ವಾರಗಳಿಂದ ನಡೆಯುತ್ತಿರುವ ಈ ಸಂಘರ್ಷವು ಭೀಕರ ಸಾವು-ನೋವುಗಳಿಗೆ ಸಾಕ್ಷಿಯಾಗಿದೆ.

ಇರಾನ್: ಕನಿಷ್ಠ 3,000 ಜನರ ಸಾವು.

ಲೆಬನಾನ್: 2,100ಕ್ಕೂ ಹೆಚ್ಚು ಮಂದಿ ಸಾವು.

ಇಸ್ರೇಲ್: 23 ಜನರ ಸಾವು.

ಅಮೆರಿಕ: 13 ಸೈನಿಕರ ಸಾವು.

ಗಲ್ಫ್ ರಾಷ್ಟ್ರಗಳು: ಹತ್ತಾರು ನಾಗರಿಕರ ಸಾವು,(ಏಜೆನ್ಸೀಸ್).