ಬ್ರಹ್ಮಾಂಡದಲ್ಲಿ ಕಂಡಿತೇ ಮ್ಯೂಸಿಕ್ ನೋಟ್? 20 ಲಕ್ಷ ಬೆಳಕಿನ ವರ್ಷಗಳ ಈ ನಿಗೂಢ ರಹಸ್ಯವೇನು..? Treble Clef

Treble Clef: ಬಾಹ್ಯಾಕಾಶದಲ್ಲಿ ಸಂಗೀತದ ಸ್ವರಗಳನ್ನು ನೆನಪಿಸುವ ಬೃಹತ್ ರಚನೆಯೊಂದು ಖಗೋಳ ವಿಜ್ಞಾನಿಗಳ ಗಮನ ಸೆಳೆದಿದೆ. ನೋಡಲು ಸಂಗೀತದಲ್ಲಿ ಬಳಸುವ ಟ್ರೆಬಲ್ ಕ್ಲೆಫ್ ಚಿಹ್ನೆಯಂತೆಯೇ ಕಾಣುವ ಈ ವಿಚಿತ್ರ ಆಕಾರದ ಹಿಂದೆ ಎರಡು ಗ್ಯಾಲಕ್ಸಿ ಸಮೂಹಗಳ ಡಿಕ್ಕಿ ಮತ್ತು ಬೃಹತ್ ಕಪ್ಪುರಂಧ್ರದ ಸ್ಫೋಟದಂತಹ ಪ್ರಬಲ ವಿದ್ಯಮಾನಗಳಿರುವ ಸಾಧ್ಯತೆಯನ್ನು ವಿಜ್ಞಾನಿಗಳು ಪತ್ತೆಹಚ್ಚಿದ್ದಾರೆ.

ಸಂಗೀತದ ಲೋಕದಲ್ಲಿ ಸ್ವರಗಳನ್ನು ಗುರುತಿಸಲು ಬಳಸುವ ಚಿಹ್ನೆಯೊಂದು ಇದ್ದಕ್ಕಿದ್ದಂತೆ ಬಾಹ್ಯಾಕಾಶದಲ್ಲಿ ಕಾಣಿಸಿಕೊಂಡರೆ ಹೇಗಿರುತ್ತದೆ? ಅದೂ ಸಾಮಾನ್ಯ ಆಕಾರವಲ್ಲ, ಲಕ್ಷಾಂತರ ಬೆಳಕಿನ ವರ್ಷಗಳಷ್ಟು ವಿಸ್ತಾರವಾಗಿರುವ ಬೃಹತ್ ರಚನೆಯಾಗಿದ್ದರೆ? ಕೇಳುವುದಕ್ಕೆ ಅಚ್ಚರಿಯಾದರೂ ಇಂತಹದ್ದೊಂದು ದೃಶ್ಯವನ್ನು ಖಗೋಳ ವಿಜ್ಞಾನಿಗಳು ಗುರುತಿಸಿದ್ದಾರೆ. ಈ ವಿಚಿತ್ರ ರಚನೆಗೆ ಟ್ರೆಬಲ್ ಕ್ಲೆಫ್ ಎಂದು ಹೆಸರಿಡಲಾಗಿದೆ.

ನಾಸಾದ ಚಂದ್ರ ಎಕ್ಸ್-ರೇ ವೀಕ್ಷಣಾಲಯ ಸೇರಿದಂತೆ ಹಲವು ಬಾಹ್ಯಾಕಾಶ ವೀಕ್ಷಣಾ ಸಾಧನಗಳ ದತ್ತಾಂಶವನ್ನು ಅಧ್ಯಯನ ಮಾಡಿದ ವಿಜ್ಞಾನಿಗಳು ಈ ರಚನೆಯ ಹಿಂದಿನ ರಹಸ್ಯವನ್ನು ಪತ್ತೆಹಚ್ಚುವಲ್ಲಿ 6 ಮಹತ್ವದ ಪ್ರಗತಿ ಸಾಧಿಸಿದ್ದಾರೆ. ಈ ಸಂಶೋಧನೆಯ ವಿವರಗಳನ್ನು ಖಗೋಳವಿಜ್ಞಾನ ಎಂಬ ವೈಜ್ಞಾನಿಕ ನಿಯತಕಾಲಿಕೆಯಲ್ಲಿ ಪ್ರಕಟಿಸಲಾಗಿದೆ.

ಇದನ್ನೂ ಓದಿ: ಭೂಮಿಯಲ್ಲಿ ಜೀವ ಹುಟ್ಟಲು ಕಾರಣ ಉಲ್ಕಾಶಿಲೆಗಳಲ್ಲವೇ? ವಿಜ್ಞಾನಿಗಳ ಹೊಸ ಅಧ್ಯಯನ ಬಿಚ್ಚಿಟ್ಟ ಅಚ್ಚರಿಯ ಸತ್ಯವಿದು...Earth

ಏನಿದು ಟ್ರೆಬಲ್ ಕ್ಲೆಫ್?

ಸಂಗೀತದ ಸ್ವರಲಿಪಿಯಲ್ಲಿ ಬಳಸುವ ಟ್ರೆಬಲ್ ಕ್ಲೆಫ್ ಚಿಹ್ನೆ ನಿಮಗೆ ಗೊತ್ತಿರಬಹುದು. ಅದರಂತೆಯೇ ತಿರುವುಗಳು ಮತ್ತು ಸುರುಳಿಯಾಕಾರದ ವಿನ್ಯಾಸ ಹೊಂದಿರುವ ಈ ಬಾಹ್ಯಾಕಾಶ ರಚನೆಯು ರೇಡಿಯೋ ಅಲೆಗಳ ಮೂಲಕ ಪತ್ತೆಯಾಗಿದೆ. ಇದರ ವಿಸ್ತಾರ ಸುಮಾರು 20 ಲಕ್ಷ ಬೆಳಕಿನ ವರ್ಷಗಳಷ್ಟಿದೆ. ಅಂದರೆ ಬೆಳಕು ಒಂದು ಸೆಕೆಂಡಿಗೆ ಸುಮಾರು 3 ಲಕ್ಷ ಕಿಲೋಮೀಟರ್ ವೇಗದಲ್ಲಿ ಚಲಿಸಿದರೂ ಈ ರಚನೆಯ ಒಂದು ತುದಿಯಿಂದ ಮತ್ತೊಂದು ತುದಿಗೆ ತಲುಪಲು ಸುಮಾರು 20 ಲಕ್ಷ ವರ್ಷಗಳು ಬೇಕಾಗುತ್ತವೆ.

ಈ ರಚನೆ ಇರುವ ಪ್ರದೇಶ ಭೂಮಿಯಿಂದ ಸುಮಾರು 155 ಕೋಟಿ ಬೆಳಕಿನ ವರ್ಷಗಳಷ್ಟು ದೂರದಲ್ಲಿದೆ. ಕ್ಯಾಮೆಲೋಪಾರ್ಡಾಲಿಸ್ ನಕ್ಷತ್ರಪುಂಜದ ದಿಕ್ಕಿನಲ್ಲಿ ಇದು ನೆಲೆಸಿದೆ. ವಿಶೇಷವೆಂದರೆ, ನಮ್ಮ ಕ್ಷೀರಪಥ ಗ್ಯಾಲಕ್ಸಿಯ ಧೂಳು, ಅನಿಲ ಮತ್ತು ನಕ್ಷತ್ರಗಳ ಹಿನ್ನೆಲೆಯಿಂದಾಗಿ ಈ ಪ್ರದೇಶವನ್ನು ನೇರವಾಗಿ ಅಧ್ಯಯನ ಮಾಡುವುದು ವಿಜ್ಞಾನಿಗಳಿಗೆ ಸುಲಭವಾಗಿರಲಿಲ್ಲ.

ಕಪ್ಪುರಂಧ್ರದ ಸ್ಫೋಟಕ್ಕೂ ಇದಕ್ಕೂ ಏನು ಸಂಬಂಧ?

ವಿಜ್ಞಾನಿಗಳ ಪ್ರಕಾರ, ಈ ವಿಚಿತ್ರ ರಚನೆಯ ನಿರ್ಮಾಣದ ಹಿಂದೆ ಎರಡು ಪ್ರಮುಖ ಬಾಹ್ಯಾಕಾಶ ವಿದ್ಯಮಾನಗಳಿರಬಹುದು. ಮೊದಲನೆಯದಾಗಿ, ಗ್ಯಾಲಕ್ಸಿಯ ಕೇಂದ್ರದಲ್ಲಿರುವ ಬೃಹತ್ ಕಪ್ಪುರಂಧ್ರದಿಂದ ಸಂಭವಿಸಿದ ಪ್ರಬಲ ಸ್ಫೋಟ. ಈ ಸ್ಫೋಟದ ಪರಿಣಾಮವಾಗಿ ವಿದ್ಯುದಾವೇಶ ಹೊಂದಿರುವ ಕಣಗಳು ಮತ್ತು ಕಾಂತೀಯ ಕ್ಷೇತ್ರಗಳು ಬಾಹ್ಯಾಕಾಶದ ದೂರದ ಪ್ರದೇಶಗಳಿಗೆ ಬಹುತೇಕ ಬೆಳಕಿನ ವೇಗದಲ್ಲಿ ಹೊರಚಿಮ್ಮಿವೆ.ಆರಂಭದಲ್ಲಿ ಈ ಕಣಗಳು ಪ್ರಬಲ ರೇಡಿಯೋ ಅಲೆಗಳನ್ನು ಹೊರಸೂಸಿದ್ದವು. ಕಾಲಕ್ರಮೇಣ ಅವುಗಳ ಶಕ್ತಿ ಕಡಿಮೆಯಾಗಿ ರೇಡಿಯೋ ಸಂಕೇತಗಳು ಮಂಕಾಗಿದ್ದವು.

ಎರಡನೆಯದಾಗಿ, ಎರಡು ಬೃಹತ್ ಗ್ಯಾಲಕ್ಸಿ ಸಮೂಹಗಳ ನಡುವೆ ಸಂಭವಿಸಿದ ಡಿಕ್ಕಿ ಈ ಕಣಗಳ ಮೋಡವನ್ನು ಮತ್ತೆ ಸಂಕುಚಿತಗೊಳಿಸಿ ಅಥವಾ ಅದರ ಶಕ್ತಿಯನ್ನು ಹೆಚ್ಚಿಸಿ ರೇಡಿಯೋ ಅಲೆಗಳನ್ನು ಮತ್ತೊಮ್ಮೆ ಪ್ರಬಲಗೊಳಿಸಿರಬಹುದು ಎಂದು ಸಂಶೋಧಕರು ಅಂದಾಜಿಸಿದ್ದಾರೆ. ಈ ಡಿಕ್ಕಿಯಿಂದ ಉಂಟಾದ ಆಘಾತ ಅಲೆಗಳೂ (Shock Waves) ಈ ಪ್ರಕ್ರಿಯೆಯಲ್ಲಿ ಪಾತ್ರವಹಿಸಿರಬಹುದು.

ಇದನ್ನೂ ಓದಿ: ಇನ್ಮುಂದೆ ರಾತ್ರಿಯಲ್ಲೂ ಸಿಗುತ್ತಂತೆ ಸೂರ್ಯನ ಬೆಳಕು: ಆಗಸದಲ್ಲಿ ಕನ್ನಡಿಗಳನ್ನಿಡಲು ಹೊರಟ ಅಮೆರಿಕಕ್ಕೆ ಭಾರತ ಸಾಥ್​! Space Technology

ವಿಜ್ಞಾನಿಗಳು ಹೇಗೆ ಪತ್ತೆಹಚ್ಚಿದರು?

ಈ ರಹಸ್ಯವನ್ನು ಬಿಡಿಸಲು ಚಂದ್ರ ಮತ್ತು ಜರ್ಮನಿಯ ಇರೋಸಿಟಾ ಎಕ್ಸ್-ರೇ ದೂರದರ್ಶಕದ ದತ್ತಾಂಶವನ್ನು ಬಳಸಲಾಗಿದೆ. ಇದರೊಂದಿಗೆ ಯುರೋಪಿನ ಲೋಫರ್ ರೇಡಿಯೋ ದೂರದರ್ಶಕ ಜಾಲ ಮತ್ತು ಯುಕೆಐಆರ್ಟಿ ಅತಿಗೆಂಪು ವೀಕ್ಷಣೆಯ ಮಾಹಿತಿಯನ್ನೂ ಸಂಯೋಜಿಸಲಾಗಿದೆ.ಈ ಎಲ್ಲ ಮಾಹಿತಿಯನ್ನು ಒಟ್ಟುಗೂಡಿಸಿ ಸಿದ್ಧಪಡಿಸಿದ ಚಿತ್ರದಲ್ಲಿ ನೀಲಿ ಬಣ್ಣದಲ್ಲಿ ಕಾಣಿಸುವುದು ಲಕ್ಷಾಂತರ ಡಿಗ್ರಿ ತಾಪಮಾನ ಹೊಂದಿರುವ ಬಿಸಿ ಅನಿಲ. ಕೆಂಪು ಬಣ್ಣದಲ್ಲಿ ಕಾಣಿಸುವುದು ರೇಡಿಯೋ ಅಲೆಗಳ ಸಂಕೇತ. ಈ ಎರಡೂ ಚಿತ್ರಗಳ ಸಂಯೋಜನೆಯಲ್ಲೇ ಸಂಗೀತದ ಚಿಹ್ನೆಯನ್ನು ಹೋಲುವ ವಿಚಿತ್ರ ಆಕಾರ ಸ್ಪಷ್ಟವಾಗಿ ಗೋಚರಿಸುತ್ತದೆ.ಇನ್ನೊಂದು ಕುತೂಹಲಕಾರಿ ಸಂಗತಿಯೆಂದರೆ, ಈ ಎರಡು ಗ್ಯಾಲಕ್ಸಿ ಸಮೂಹಗಳ ನೇರ ಡಿಕ್ಕಿ ಕೆಲವು ನೂರು ಮಿಲಿಯನ್ ವರ್ಷಗಳ ಹಿಂದೆ ಸಂಭವಿಸಿರಬಹುದು ಎಂದು ವಿಜ್ಞಾನಿಗಳು ಅಂದಾಜಿಸಿದ್ದಾರೆ. ಅವು ಈಗ ಪರಸ್ಪರ ದೂರ ಸರಿಯುತ್ತಿವೆ.

ನಿಜವಾಗಿಯೂ ಬಾಹ್ಯಾಕಾಶದಲ್ಲಿ ಸಂಗೀತ ಕೇಳಿಸುತ್ತದೆಯೇ?

ಈ ಚಿತ್ರವನ್ನು ನೋಡಿದಾಗ ಬಾಹ್ಯಾಕಾಶದಲ್ಲಿ ಯಾವುದೋ ಸಂಗೀತದ ಚಿಹ್ನೆ ತೇಲುತ್ತಿರುವಂತೆ ಭಾಸವಾಗಬಹುದು. ಆದರೆ ಇಲ್ಲಿ ಸಂಗೀತದ ಸ್ವರಗಳಾಗಲಿ, ನೇರವಾಗಿ ಕೇಳಿಸುವ ಶಬ್ದವಾಗಲಿ ಇಲ್ಲ. ರೇಡಿಯೋ ಅಲೆಗಳ ದತ್ತಾಂಶದಲ್ಲಿ ಕಾಣಿಸಿಕೊಂಡ ಆಕಾರವು ಸಂಗೀತದ ಚಿಹ್ನೆಯನ್ನು ಹೋಲುವುದರಿಂದ ಇದಕ್ಕೆ ಟ್ರೆಬಲ್ ಕ್ಲೆಫ್ ಎಂಬ ಹೆಸರಿಡಲಾಗಿದೆ. ಪರಿಚಿತ ಆಕಾರಗಳನ್ನು ಯಾದೃಚ್ಛಿಕ ವಿನ್ಯಾಸಗಳಲ್ಲಿ ಗುರುತಿಸುವ ಮಾನವನ ದೃಶ್ಯ ಗ್ರಹಿಕೆಯ ಪ್ರವೃತ್ತಿಯನ್ನು ವಿಜ್ಞಾನದಲ್ಲಿ ಪರೈಡೋಲಿಯಾ ಎಂದು ಕರೆಯಲಾಗುತ್ತದೆ.

ಸಂಗೀತದ ಚಿಹ್ನೆಯನ್ನು ಹೋಲುವ ಈ ಬೃಹತ್ ಬಾಹ್ಯಾಕಾಶ ರಚನೆಯ ಹಿಂದೆ ಕಪ್ಪುರಂಧ್ರದ ಪ್ರಚಂಡ ಸ್ಫೋಟ ಮತ್ತು ಗ್ಯಾಲಕ್ಸಿ ಸಮೂಹಗಳ ಭೀಕರ ಡಿಕ್ಕಿಯಂತಹ ವಿದ್ಯಮಾನಗಳು ಅಡಗಿರಬಹುದು ಎಂಬುದು ವಿಜ್ಞಾನಿಗಳ ಸಂಶೋಧನೆಯ ಕುತೂಹಲಕಾರಿ ಅಂಶವಾಗಿದೆ, (ಏಜೆನ್ಸೀಸ್​​).