ಮುಂಜಾನೆ ತೀವ್ರ ಬಿಸಿಲು, ರಾತ್ರಿ 24 ಗಂಟೆಗಳಲ್ಲಿ 3 ಲಕ್ಷ ಮಿಂಚು; ನೆದರ್ಲ್ಯಾಂಡ್​ನಲ್ಲಾಗುತ್ತಿರುವ ಬದಲಾವಣೆಗೆ ಕಾರಣ ಏನು?..Netherlands

Netherlands lightning strikes: ಯುರೋಪಿನಾದ್ಯಂತ ಬಿಸಿಗಾಳಿ ಆತಂಕವನ್ನು ಸೃಷ್ಟಿಮಾಡಿದೆ. ಈ ಮಧ್ಯೆ ನೆದರ್ಲ್ಯಾಂಡ್ಸ್ ಮತ್ತು ಅದರ ರಾಜಧಾನಿ ಆಮ್ಸ್ಟರ್‌ಡ್ಯಾಂನಲ್ಲಿ ತಡರಾತ್ರಿ ಸತತ ನಾಲ್ಕು ಗಂಟೆಗಳ ಕಾಲ, ಪ್ರತಿ ಸೆಕೆಂಡಿಗೆ 17 ಬಾರಿ, ಅಂದರೆ ಒಟ್ಟಾರೆಯಾಗಿ   3,00,000 ಕ್ಕೂ ಹೆಚ್ಚು ಬಾರಿ ಸಿಡಿಲು-ಮಿಂಚು ಕಾಣಿಸಿಕೊಂಡಿದ್ದು, ಮತ್ತಷ್ಟು ಆತಂಕವನ್ನುಂಟು ಮಾಡಿದೆ.

 ಒಂದೇ ಸಮನೇ ಕಾಣಿಸಿಕೊಂಡ ಈ ಮಿಂಚಿನಿಂದಾಗಿ ರಾತ್ರಿಯ ಕಗ್ಗತ್ತಲಿನ ರಾತ್ರಿ  ಹಗಲಿನಂತೆ  ಕಾಣುತ್ತಿತ್ತು. ಇಡೀ ರಾತ್ರಿ ಕಾಣಿಸಿಕೊಂಡ ಮಿಂಚುಗಳ ಬಗ್ಗೆ ಇಲ್ಲಿನ ಜನರು ವಿಡಿಯೋ ಮಾಡಿ ಪೋಸ್ಟ್​ ಮಾಡಿದ್ದಾರೆ. ಸದ್ಯ ಸೋಶಿಯಲ್​ ಮೀಡಿಯಾದಲ್ಲಿ ವಿಡಿಯೋ ಹರಿದಾಡುತ್ತಿದ್ದು, ಭಾರಿ ವೈರಲ್ ಆಗಿದೆ.

ಭಾರತದ ಮುಂಗಾರು ಅವಧಿಯಲ್ಲಿ ಕಂಡುಬರುವ ಇಂತಹ ತೀವ್ರ ಚಂಡಮಾರುತಗಳು ನೆದರ್ಲ್ಯಾಂಡ್ಸ್‌ನಲ್ಲಿ ಅಪರೂಪ. ಆದರೆ, ಯುರೋಪ್​ನಲ್ಲಿ  ಕಾಣಿಸಿಕೊಂಡಿರುವ ದಾಖಲೆ ಮಟ್ಟದ ತೀವ್ರ ತಾಪಮಾನವೇ ಇದಕ್ಕೆ ಕಾರಣವಾಗಿದೆ.  ವಾತಾವರಣದಲ್ಲಿದ್ದ ಅತಿಯಾದ ಶಾಖ ಮತ್ತು ತೇವಾಂಶವು ಹಠಾತ್ ಆಗಿ ಚಂಡಮಾರುತದ ಮೋಡಗಳಾಗಿ ಮಾರ್ಪಟ್ಟಿದ್ದೇ ಈ ಭೀಕರ ಮಿಂಚಿಗೆ ಪ್ರಮುಖ ಕಾರಣ .  

ಇಲ್ಲಿನ ವಾತಾವರಣದಲ್ಲಿ ಹಠಾತ್​ ಬದಲಾವಣೆ ಕಾಣುತ್ತಿದೆ. ಅತಿಯಾದ ಶಾಖ ಮತ್ತು ತೇವಾಂಶದ ಒಳಗೆ ಹಠಾತ್ ಆಗಿ ತಂಪಾದ ಗಾಳಿ ಪ್ರವೇಶಿಸಿದಾಗ, ಎರಡೂ ಗಾಳಿಗಳ ನಡುವೆ ತೀವ್ರ ಘರ್ಷಣೆ ಏರ್ಪಟ್ಟಿದೆ. ಇದು ಆಕಾಶದಲ್ಲಿ ಅತ್ಯಂತ ಶಕ್ತಿಶಾಲಿ ಚಂಡಮಾರುತದ ಮೋಡಗಳು ಸೃಷ್ಟಿಯಾಗಲು ಕಾರಣವಾಯಿತು. ಪರಿಸ್ಥಿತಿಯ ಗಂಭೀರತೆ ಅರಿತ ಹವಾಮಾನ ಇಲಾಖೆ ತಕ್ಷಣವೇ 'ಕೋಡ್ ಆರೆಂಜ್' ಎಚ್ಚರಿಕೆ ನೀಡಿತ್ತು.

ಯುರೋಪ್​ನಲ್ಲಿ ಜೂನ್​ 2026ರಲ್ಲಿ ತೀವ್ರ ತಾಪಮಾನದಿಂದ ಆಗುತ್ತಿರುವ ಘಟನೆಗಳಿಗೆ  ಮಾನವ ನಿರ್ಮಿತ ಜಾಗತಿಕ ತಾಪಮಾನ ಏರಿಕೆ ಕಾರಣ ಎಂದಿದ್ದಾರೆ. ಬಿಸಿಯಾದ ಗಾಳಿಯು ಹೆಚ್ಚು ತೇವಾಂಶ ಮತ್ತು ಶಕ್ತಿಯನ್ನು ಸಂಗ್ರಹಿಸಿಟ್ಟುಕೊಳ್ಳುವುದರಿಂದ ಇಂತಹ ಭೀಕರ ಚಂಡಮಾರುತಗಳು ಸೃಷ್ಟಿಯಾಗುತ್ತವೆ. . ತಾಪಮಾನ ಏರಿಕೆಯು ಕೇವಲ ಬಿಸಿಲಿಗೆ ಸೀಮಿತವಾಗಿರದೆ, ಪರಿಸರದ ಮೇಲೆ ಎಷ್ಟು ಭೀಕರ ಪರಿಣಾಮ ಬೀರಬಲ್ಲದು ಎಂಬುದಕ್ಕೆ ಆಮ್ಸ್ಟರ್‌ಡ್ಯಾಂನ ಈ ಘಟನೆಯೇ ಸಾಕ್ಷಿಯಾಗಿದೆ ಎಂದು ವಿಜ್ಞಾನಿಗಳು ಮಾಹಿತಿ ಹಂಚಿಕೊಂಡಿದ್ದಾರೆ, (ಏಜೆನ್ಸೀಸ್).