ಒಂದೇ ಆಸ್ಪತ್ರೆ, ಒಂದೇ ದಿನ ಜನನ, ಸಿಬ್ಬಂದಿಯ ನಿರ್ಲಕ್ಷ್ಯ!: 36 ವರ್ಷಗಳ ಬಳಿಕ ಬಯಲಾಯ್ತು ಆಘಾತಕಾರಿ ಸತ್ಯ! Swapped At Birth

ನ್ಯಾಯಾಲಯದ ದಾಖಲೆಗಳ ಪ್ರಕಾರ, 1988 ರ ಜನವರಿ 26 ರಂದು ನಾರ್ತ್ ಡಕೋಟಾದ ಗ್ರಾಫ್ಟನ್‌ನಲ್ಲಿರುವ ಯೂನಿಟಿ ಮೆಡಿಕಲ್ ಸೆಂಟರ್‌ನಲ್ಲಿ ಕೈಲ್ ಬೈಲಿನ್ ಮತ್ತು ಜೆರೆಮಿ ಮಾರಿಸನ್ ಎಂಬ ಇಬ್ಬರು ಗಂಡು ಮಕ್ಕಳು ಜನಿಸಿದ್ದರು. ಆ ದಿನ ಆ ಆಸ್ಪತ್ರೆಯಲ್ಲಿ ಜನಿಸಿದ ಏಕೈಕ ಶಿಶುಗಳು ಇವರಾಗಿದ್ದರು. ಆದರೆ, ತಾಯಂದಿರಿಗೆ ಮಗುವನ್ನು ನೀಡುವಾಗ ಆಸ್ಪತ್ರೆ ಸಿಬ್ಬಂದಿ ಮಾಡಿದ ಎಡವಟ್ಟಿನಿಂದಾಗಿ ಎರಡೂ ಶಿಶುಗಳನ್ನು ಅದಲು ಬದಲು ಮಾಡಿ ಬೇರೊಬ್ಬರ ಹೆತ್ತವರ ಮಡಿಲು ಸೇರಿದ್ದರು.

ಕೈಲ್ ಬೈಲಿನ್ ತಮ್ಮ ಹುಟ್ಟಿನ ಸಮಯದ ಆಸ್ಪತ್ರೆಯ ಐಡೆಂಟಿಟಿ ಬ್ಯಾಂಡ್ ಅನ್ನು ಇಂದಿಗೂ ಕಾಯ್ದಿರಿಸಿಕೊಂಡಿದ್ದು, ಅದರಲ್ಲಿ ತಪ್ಪಾದ ಹೆಸರು ನಮೂದಿಸಲಾಗಿತ್ತು. ಆದಾಗ್ಯೂ, ಇಬ್ಬರೂ ವ್ಯಕ್ತಿಗಳು ಯಾವುದೇ ಆಧಾರವಿಲ್ಲದೇ ಬೇರೆ ಕುಟುಂಬಗಳಲ್ಲಿ ಬೆಳೆದು ದೊಡ್ಡವರಾಗಿದ್ದರು. ಆದರೆ, ಜೆರೆಮಿಗೆ ಸದಾ ತಾನು ಕುಟುಂಬದಲ್ಲಿ ಭಿನ್ನವಾಗಿದ್ದೇನೆ ಎಂಬ ಅನುಭವವಾಗುತ್ತಿತ್ತು.

ನನ್ನ ಕುಟುಂಬದಲ್ಲಿದ್ದವರೆಲ್ಲ ಕಪ್ಪು ಕೂದಲಿನವರಾಗಿದ್ದರೆ, ನಾನು ಮಾತ್ರ ಹೊಂಬಣ್ಣದ ಕೂದಲು ಹೊಂದಿದ್ದೆ. ನನ್ನಂತೆ ಕಾಣುವವರು ಈ ಮನೆಯಲ್ಲಿ ಯಾರೂ ಇರಲಿಲ್ಲ, ಎಂದು ಜೆರೆಮಿ ನೆನಪಿಸಿಕೊಂಡಿದ್ದಾರೆ. ಎರಡು ವರ್ಷಗಳ ಹಿಂದೆ ಕೈಲ್ ಬೈಲಿನ್ ಅವರು ಕುತೂಹಲಕ್ಕೆ ಡಿಎನ್‌ಎ (DNA) ಪರೀಕ್ಷೆ ಮಾಡಿಸಿಕೊಂಡಾಗ, ಅವರ ಜೈವಿಕ ಅತ್ತೆಯ ಪರಿಚಯವಾಗಿ ಈ ಘೋರ ಸತ್ಯ ಹೊರಬಿದ್ದಿದೆ.

ಪ್ರಸ್ತುತ ಕೊಲೊರಾಡೋದಲ್ಲಿ ನೆಲೆಸಿರುವ ಜೆರೆಮಿ, ಆಸ್ಪತ್ರೆಯ ಎಡವಟ್ಟು ತನ್ನ ಬದುಕನ್ನೇ ಸಂಪೂರ್ಣವಾಗಿ ಬದಲಿಸಿತು ಎಂದು ಬೇಸರ ವ್ಯಕ್ತಪಡಿಸಿದ್ದಾರೆ. ನಾನು ನನ್ನ ನಿಜವಾದ ಪೋಷಕರ ಜೊತೆ ಮನೆಗೆ ಹೋಗಿದ್ದರೆ, ನಾರ್ತ್ ಡಕೋಟಾದಲ್ಲೇ ಉಳಿದು ನನ್ನ ಸ್ವಂತ ಅಣ್ಣನ ಜೊತೆ ಕೃಷಿ ಕೆಲಸ ಮಾಡುತ್ತಿದ್ದೆ, ಎಂದು ಅವರು ಹೇಳಿದ್ದಾರೆ.

ನ್ಯಾಯಾಲಯದ ಮೆಟ್ಟಿಲೇರುವ ಮುನ್ನ ಎರಡೂ ಕುಟುಂಬಗಳು ಸತತ ಒಂದು ವರ್ಷಗಳ ಕಾಲ ಆಸ್ಪತ್ರೆಯ ಆಡಳಿತ ಮಂಡಳಿಯೊಂದಿಗೆ ಮಾತುಕತೆ ನಡೆಸಿ, ಹಣಕಾಸಿನ ಪರಿಹಾರದ ಒಪ್ಪಂದಕ್ಕೆ ಬರಲು ಪ್ರಯತ್ನಿಸಿದ್ದವು. ಆದರೆ, ಈ ಸಂಧಾನದ ಯತ್ನಗಳು ವಿಫಲವಾದ ಹಿನ್ನೆಲೆಯಲ್ಲಿ ಕುಟುಂಬಗಳು ಕಾನೂನು ಹೋರಾಟ ಕೈಗೆತ್ತಿಕೊಂಡವು.

ಘಟನೆ ಕುರಿತು ಪ್ರತಿಕ್ರಿಯಿಸಿರುವ ಯೂನಿಟಿ ಮೆಡಿಕಲ್ ಸೆಂಟರ್, ಈ ಸತ್ಯ ಬಯಲಾದಾಗ ಎರಡೂ ಕುಟುಂಬಗಳಿಗಾದ ಆಳವಾದ ಭಾವನಾತ್ಮಕ ನೋವು ಮತ್ತು ಆಘಾತವನ್ನು ಒಪ್ಪಿಕೊಂಡಿದೆ. ಆದರೆ, ಈ ಎಡವಟ್ಟಿನಲ್ಲಿ ಸಂಸ್ಥೆಯ ಯಾವುದೇ ಕಾನೂನಾತ್ಮಕ ಹೊಣೆಗಾರಿಕೆ ಇಲ್ಲ ಎಂದು ಬಲವಾಗಿ ಸಮರ್ಥಿಸಿಕೊಂಡಿದ್ದು, ಈ ಮೊಕದ್ದಮೆಯನ್ನು ಸಂಪೂರ್ಣವಾಗಿ ವಜಾಗೊಳಿಸುವಂತೆ ನ್ಯಾಯಾಲಯಕ್ಕೆ ಮನವಿ ಮಾಡಿದೆ (ಏಜೆನ್ಸೀಸ್​).