ಟ್ರಯಲ್ ಆರಂಭಿಸಿದ ದೇಶೀಯ ನಿರ್ವಿುತ ಮೊದಲ ಸಮರ ನೌಕೆ

ನವದೆಹಲಿ: ದೇಶೀಯ ತಂತ್ರಜ್ಞಾನದಲ್ಲಿ ನಿರ್ವಿುಸಲಾದ ಪ್ರಪ್ರಥಮ ವಿಮಾನ ವಾಹಕ ನೌಕೆ ಬುಧವಾರ ಕೊಚ್ಚಿ ಬಂದರಿನಲ್ಲಿ ಪರೀಕ್ಷಾರ್ಥ ಯಾನ ಆರಂಭಿಸಿದೆ. ಈ ನೌಕೆ ನಿರ್ಮಾಣದೊಂದಿಗೆ, ಸಮರ ವಿಮಾನ ವಾಹಕ ನೌಕೆ ನಿರ್ವಿುಸುವ ಸಾಮರ್ಥ್ಯವಿರುವ ಕೆಲವೇ ದೇಶಗಳ ಸಾಲಿಗೆ ಸೇರಿದ ಸಾಧನೆಯನ್ನು ಭಾರತ ಮಾಡಿದೆ. ನೌಕಾ ಪಡೆಗೆ ಸೇರ್ಪಡೆ ಆಗುವವರೆಗೆ ಇದನ್ನು ಐಎಸಿ-1 ಎಂದು ಕರೆಯಲಾಗುತ್ತದೆ. ನಂತರ ಇದರ ಹೆಸರು ‘ಐಎನ್​ಎಸ್ ವಿಕ್ರಾಂತ್’ ಆಗಲಿದೆ. ಈ ನೌಕೆ 2022ರ ಆಗಸ್ಟ್​ನಲ್ಲಿ ನೇವಿಗೆ ಸೇರ್ಪಡೆಯಾಗುವ ನಿರೀಕ್ಷೆಯಿದ್ದು ಭಾರತದ ಎರಡನೇ ಯುದ್ಧ ವಿಮಾನ ವಾಹಕ ನೌಕೆಯಾಗಲಿದೆ. ಪ್ರಸ್ತುತ ರಷ್ಯಾ ಮೂಲದ ‘ಐಎನ್​ಎಸ್ ವಿಕ್ರಮಾದಿತ್ಯ’ ಭಾರತದ ಇಂಥ ಏಕೈಕ ನೌಕೆಯಾಗಿದೆ.

ಮುಖ್ಯಾಂಶ

• 2009ರಲ್ಲಿ ಕೊಚ್ಚಿ ಶಿಪ್​ಯಾರ್ಡ್​ನಲ್ಲಿ ನೌಕೆ ನಿರ್ಮಾಣ ಆರಂಭ.
• 23,000 ಕೋಟಿ ರೂ. ಯೋಜನಾ ವೆಚ್ಚ.
• 40,000 ಟನ್ ತೂಕ.
• 2020 ನವೆಂಬರ್​ನಲ್ಲಿ ಬೇಸಿನ್ ಟ್ರಯಲ್ ಸಂಪೂರ್ಣ.

ಮರುಅವತಾರ

1971ರ ಭಾರತ-ಪಾಕಿಸ್ತಾನ ಯುದ್ಧದಲ್ಲಿ ಐಎನ್​ಎಸ್ ವಿಕ್ರಾಂತ್ ವಹಿಸಿದ್ದ ಮಹತ್ವದ ಪಾತ್ರದ ಸುವರ್ಣ ಮಹೋತ್ಸವ ವರ್ಷದಲ್ಲೇ ಅದರ ಮರುಅವತಾರದ ಈ ನೌಕೆ ತನ್ನ ಚೊಚ್ಚಲ ಸಾಗರ ಪರೀಕ್ಷಾ ಪಯಣ ಆರಂಭಿಸಿದೆ. ಇದೊಂದು ಹೆಮ್ಮೆ ಹಾಗೂ ಐತಿಹಾಸಿಕ ಕ್ಷಣ. ಇದರ ಮೂಲಕ ನೌಕಾ ಪಡೆಯ ಸಾಮರ್ಥ್ಯ ಹೆಚ್ಚಳ ಮಾತ್ರವಲ್ಲದೆ ಐತಿಹಾಸಿಕ ಐಎನ್​ಎಸ್ ವಿಕ್ರಾಂತ್​ನ ಗತ ವೈಭವವನ್ನು ಚಿರಸ್ಥಾಯಿ ಯಾಗುವಂತೆ ಮಾಡಲಾಗುತ್ತದೆ ಎಂದು ನೌಕಾ ಪಡೆ ತಿಳಿಸಿದೆ. ಆತ್ಮನಿರ್ಭರ ಭಾರತ ಮತ್ತು ಮೇಕ್ ಇನ್ ಇಂಡಿಯಾ ಉಪಕ್ರಮಗಳ ಯೋಜನೆಯಲ್ಲಿ ಈ ನೌಕೆ ನಿರ್ಮಾಣ ಆಗಿದೆ. ನೌಕೆಯ ನಿರ್ಮಾಣ ಪ್ರಗತಿ ಪರಿಶೀಲನೆಗೆ ರಕ್ಷಣಾ ಸಚಿವ ರಾಜನಾಥ್ ಸಿಂಗ್ ಈ ವರ್ಷ ಜೂನ್​ನಲ್ಲಿ ಭೇಟಿ ನೀಡಿದ್ದರು.

ಸಾಮರ್ಥ್ಯ

ಮಿಗ್-19 ಫೈಟರ್ ವಿಮಾನ, ಕಾಮೊವ್-31 ಏರ್ ಅರ್ಲಿ ವಾರ್ನಿಂಗ್ ಹೆಲಿಕಾಪ್ಟರ್​ಗಳು, ಎಂಎಚ್-60 ಬಹುಪಾತ್ರದ ಹೆಲಿಕಾಪ್ಟರ್, ದೇಶೀಯ ನಿರ್ವಿುತ ಅಡ್ವಾನ್ಸ್​ಡ್ ಲೈಟ್ ಹೆಲಿಕಾಪ್ಟರ್​ಗಳನ್ನು ಈ ನೌಕೆ ನಿರ್ವಹಿಸಲಿದೆ.

ದಕ್ಷಿಣ ಚೀನಾ ಸಮುದ್ರಕ್ಕೆ ಭಾರತದ ಸಮರ ನೌಕೆ

ಚೀನಾದ ಆಟಾಟೋಪವನ್ನು ಪರಿಣಾಮಕಾರಿಯಾಗಿ ಎದುರಿಸಲು ಸಾಧ್ಯವಾಗುವ ನಿಟ್ಟಿನಲ್ಲಿ ದಕ್ಷಿಣ ಚೀನಾ ಸಮುದ್ರಕ್ಕೆ ಈ ತಿಂಗಳು ನೌಕಾ ಸೇನೆಯ ಕಾರ್ಯ ಪಡೆಯೊಂದನ್ನು ಕಳಿಸಲು ಭಾರತ ನಿರ್ಧರಿಸಿದೆ. ಮಿತ್ರ ದೇಶಗಳೊಂದಿಗೆ ಭದ್ರತಾ ಬಾಂಧವ್ಯವನ್ನು ವಿಸ್ತರಿಸಲು ಸಮರ ನೌಕೆ ಕಳಿಸಲಾಗುತ್ತಿದೆಯಾದರೂ ಈ ವಲಯದಲ್ಲಿ ಚೀನಾಕ್ಕೆ ಪ್ರತಿಯಾಗಿ ಮಹತ್ವದ ಪಾತ್ರ ನಿರ್ವಹಿಸುವುದು ಭಾರತದ ಯೋಜನೆಯಾಗಿದೆ.

ವಾಸ್ತವವಾಗಿ ಚೀನಾದೊಂದಿಗೆ ವೈರತ್ವ ಕಟ್ಟಿಕೊಳ್ಳಲು ಭಾರತಕ್ಕೆ ಮನಸ್ಸಿಲ್ಲ. ಆದರೆ, ಕಳೆದ ವರ್ಷ ಪೂರ್ವ ಲಡಾಖ್​ನ ಗಲ್ವಾನ್ ಕಣಿವೆಯಲ್ಲಿ ಉಭಯ ದೇಶಗಳ ಯೋಧರ ನಡುವೆ ಕಾಳಗ ನಡೆದಾಗಿನಿಂದ ಭಾರತದ ನಿಲುವು ಬದಲಾಗಿದೆ. ಅಂದಿನಿಂದ ಚೀನಾಕ್ಕೆ ಸೆಡ್ಡು ಹೊಡೆಯುವ ಪ್ರಯತ್ನವಾಗಿ ಭಾರತ ಅಮೆರಿಕಕ್ಕೆ ನಿಕಟವಾಗಿದೆ.

ನಾಲ್ಕು ನೌಕೆಗಳು: ಆಗ್ನೇಯ ಏಷ್ಯಾ, ದಕ್ಷಿಣ ಚೀನಾ ಸಮುದ್ರ ಮತ್ತು ಪಶ್ಚಿಮ ಶಾಂತಸಾಗರಕ್ಕೆ ಎರಡು ತಿಂಗಳ ಅವಧಿಗೆ ನಾಲ್ಕು ಯುದ್ಧ ನೌಕೆಗಳನ್ನು ಕಳಿಸಲಾಗುತ್ತದೆ. ಆ ಪೈಕಿ ತಲಾ ಒಂದು ನಿರ್ದೇಶಿತ ಕ್ಷಿಪಣಿ ನಾಶಕ ಹಾಗೂ ಮಿಸೈಲ್ ಫ್ರಿಗೇಟ್ ಇರುತ್ತದೆ ಎಂದು ನೌಕಾ ಪಡೆ ಹೇಳಿಕೆ ತಿಳಿಸಿದೆ.