ನವದೆಹಲಿ: ದೇಶದಲ್ಲಿ ಶಿಶು ಮರಣ ದರ (ಐಎಂಆರ್) ಗಮನಾರ್ಹ ಪ್ರಮಾಣದಲ್ಲಿ ತಗ್ಗಿದೆ. 2013ರ 40ರಿಂದ ದಾಖಲೆಯ 25ರ ಮಟ್ಟಕ್ಕೆ ಐಎಂಆರ್ ಕುಸಿದಿದೆ. ಇದು ಶೇ.37.5ರಷ್ಟು ಇಳಿಕೆ ಎಂದು ಭಾರತದ ಮಹಾ ನೋಂದಣಾಧಿಕಾರಿ (ರಿಜಿಸ್ಟ್ರಾರ್ ಜನರಲ್) ಪ್ರಕಟಿಸಿರುವ ಸ್ಯಾಂಪಲ್ ರಿಜಿಸ್ಟ್ರೇಷನ್ ಸಿಸ್ಟಂ (ಎಸ್ಆರ್ಎಸ್) ವರದಿ ತಿಳಿಸಿದೆ. ಐಎಂಆರ್ ಸಾರ್ವಜನಿಕ ಆರೋಗ್ಯದ ಒಂದು ಪ್ರಮುಖ ಸೂಚಕವೆಂದು ಭಾವಿಸಲಾಗಿದೆ. ಯಾಕೆಂದರೆ, ಒಂದು ವರ್ಷದಲ್ಲಿ ಹುಟ್ಟುವ ಪ್ರತಿ 1,000 ಶಿಶುಗಳಲ್ಲಿ ಮೃತಪಡುವ ಮಕ್ಕಳ ಸಂಖ್ಯೆಯನ್ನು ಐಎಂಆರ್ ಎಂದು ವ್ಯಾಖ್ಯಾನಿಸಲಾಗಿದೆ. ಕಡಿಮೆ ಸಂಖ್ಯೆಯ ಮಕ್ಕಳ ಸಾವು ಉತ್ತಮ ಆರೋಗ್ಯ ಸೌಲಭ್ಯದ ಲಭ್ಯತೆಯನ್ನು ಸೂಚಿಸುತ್ತದೆ.
