ಪಾಕ್ ಬೇಹುಜಾಲದಲ್ಲಿ ಭಾರತೀಯರು!

ಸಾಮಾನ್ಯ ನಾಗರಿಕರು, ಯೂಟ್ಯೂಬರ್​ಗಳು, ಸಾಮಾಜಿಕ ಮಾಧ್ಯಮ ಪ್ರಭಾವಿಗಳು, ಎಂಜಿನಿಯರ್​ಗಳು, ಸರ್ಕಾರಿ ಅಧಿಕಾರಿಗಳು... ಹೀಗೆ ವಿಭಿನ್ನ ಹಿನ್ನೆಲೆಯುಳ್ಳ ಭಾರತೀಯರು ಇಂದು ಪಾಕಿಸ್ತಾನದ ಗೂಢಚಾರಿಕೆ ಜಾಲದಲ್ಲಿ ಸಿಕ್ಕಿಹಾಕಿಕೊಳ್ಳುತ್ತಿದ್ದಾರೆ. ಆಪರೇಷನ್ ಸಿಂಧೂರ್ ಬಳಿಕ ಇಂಥ 15ಕ್ಕೂ ಅಧಿಕ ಗೂಢಚಾರರನ್ನು ಬಂಧನ ಮಾಡಲಾಗಿದೆ. ಸಾಮಾನ್ಯ ನಾಗರಿಕರು ಏಕೆ ಪಾಕ್ ಏಜೆಂಟ್ ಆಗುತ್ತಿದ್ದಾರೆ? ಪಾಕಿಸ್ತಾನದ ಗುಪ್ತಚರ ಸಂಸ್ಥೆ ಐಎಸ್​ಐ ಯಾವ ರೀತಿಯಲ್ಲಿ ಭಾರತದ ನಾಗರಿಕರನ್ನು ಬೇಹುಗಾರಿಕೆ ಬಲೆಗೆ ಬೀಳಿಸುತ್ತಿದೆ ಎಂಬ ಸಂಕ್ಷಿಪ್ತ ಮಾಹಿತಿ ಇಲ್ಲಿದೆ.

ಆಮಿಷ ಮತ್ತು ಸಂಪರ್ಕ

ಯೂಟ್ಯೂಬರ್ ಜ್ಯೋತಿ ಮಲ್ಹೋತ್ರಾ 2023ರಲ್ಲಿ ಪಾಕಿಸ್ತಾನದ ಹೈ ಕಮಿಷನ್​ಗೆ ವೀಸಾ ಪಡೆಯಲು ಭೇಟಿ ನೀಡಿದಾಗ ಡ್ಯಾನಿಶ್ ಎಂಬ ಐಎಸ್​ಐ ಏಜೆಂಟ್​ನೊಂದಿಗೆ ಸಂಪರ್ಕಕ್ಕೆ ಬಂದಳು. ಈ ರೀತಿಯ ಸಂಪರ್ಕಗಳು ಸಾಮಾಜಿಕ ಅಥವಾ ವೃತ್ತಿಪರ ಸಂದರ್ಭಗಳಲ್ಲಿ ಆರಂಭವಾಗುತ್ತವೆ. ಇದರಿಂದ ವ್ಯಕ್ತಿಗಳು ಪರಿಸ್ಥಿತಿಯ ಗಂಭೀರತೆ ಅರಿಯದೆ, ಆಮಿಷಕ್ಕೆ ಒಳಗಾಗಿ ಗೂಢಚಾರಿಕೆ ಬಲೆಗೆ ಸಿಕ್ಕಿಹಾಕಿಕೊಳ್ಳುತ್ತಾರೆ.

ಆಕರ್ಷಣೆಯ ತಂತ್ರ

ಐಎಸ್​ಐ ವಿಶೇಷ ಆತಿಥ್ಯ, ಉಚಿತ ಪ್ರವಾಸಗಳು, ಆರ್ಥಿಕ ಪ್ರಲೋಭನೆಗಳು, ವೈಯಕ್ತಿಕ ಸಂಬಂಧಗಳ ಮೂಲಕ (ಹನಿ ಟ್ರಾ್ಯಪ್) ಆಕರ್ಷಿಸಲಾತ್ತದೆ. ಯೂಟ್ಯೂಬರ್ ಜ್ಯೋತಿಗೆ ಪಾಕಿಸ್ತಾನದಲ್ಲಿ ವಿಐಪಿ ಸೌಲಭ್ಯ, ವಿಶೇಷ ವೀಸಾ, ಭದ್ರತೆಯನ್ನು ಒದಗಿಸಲಾಯಿತು. ಇದರಿಂದ ಆಕೆಐಎಸ್​ಐಗೆ ಹತ್ತಿರವಾಗಿದ್ದಳು.

ಕರ್ತಾರ್​ಪುರ ಕಾರಿಡಾರ್ ದುರ್ಬಳಕೆ

ಕರ್ತಾರ್​ಪುರ ಸಾಹಿಬ್ ಕಾರಿಡಾರ್​ನಂತಹ ಧಾರ್ವಿುಕ ಕಾರ್ಯಕ್ರಮಗಳನ್ನು ಐಎಸ್​ಐ ತನ್ನ ಗೂಢಚಾರಿಕೆಗೆ ಬಳಸಿಕೊಳ್ಳುತ್ತದೆ. ಯಾತ್ರಿಕರನ್ನು ಗುರಿಯಾಗಿಸಿ, ಖಾಸಗಿ ಫೋಟೋಗಳು ಮತ್ತು ವೀಡಿಯೊಗಳನ್ನು ರಹಸ್ಯವಾಗಿ ಸೆರೆಹಿಡಿಯಲಾಗುತ್ತದೆ. ನಂತರ ಇದನ್ನು ಬ್ಲಾಕ್​ವೆುೕಲ್​ಗೆ ಬಳಸಿದ ಉದಾಹರಣೆಯೂ ಇದೆ. ಇಲ್ಲಿ ಆಗಮಿಸುವ ವ್ಯಕ್ತಿಗಳ ಸ್ನೇಹ ಬೆಳೆಸಿ, ಮನವೊಲಿಕೆ ಮಾಡಿ ಅಥವಾ ಆಮಿಷ ಒಡ್ಡಿ ಬಲೆಗೆ ಬೀಳಿಸಲಾಗುತ್ತದೆ.

ಹೈಬ್ರೀಡ್ ವಾರ್​ಫೇರ್

ಪಾಕಿಸ್ತಾನದ ಐಎಸ್​ಐ ಆಧುನಿಕ, ಡಿಜಿಟಲ್ ಯುದ್ಧದ ತಂತ್ರವನ್ನು ಅನುಸರಿಸುತ್ತಿದೆ. ಇದನ್ನು ಹೈಬ್ರೀಡ್ ವಾರ್​ಫೇರ್ ಎಂದೂ ಕರೆಯಲಾಗುತ್ತದೆ. ಇದರ ಮುಖ್ಯ ಗುರಿಗಳು ಹೀಗಿವೆ.?ಕಾರ್ಯಸೂಚಿ ಪ್ರಚಾರ: ಸಾಮಾಜಿಕ ಮಾಧ್ಯಮ ಪ್ರಭಾವಿ ಗಳ ಮೂಲಕ ಭಾರತದ ವಿರುದ್ಧ ಕಾರ್ಯಸೂಚಿ ರೂಪಿಸುವುದು. ಸಮಾಜದಲ್ಲಿ ಒಡಕು ಮತ್ತು ಧ್ರುವೀಕರಣ ಉಂಟುಮಾಡುವುದು. ಜ್ಯೋತಿ ಮಲ್ಹೋತ್ರಾ ತನ್ನ ಯುಟ್ಯೂಬ್ ವೀಡಿಯೊಗಳ ಮೂಲಕ ಪಾಕ್ ಬಗ್ಗೆ ಉತ್ತಮ ಅಭಿಪ್ರಾಯ ರೂಪಿಸಲು ಯತ್ನಿಸಿದ್ದಳು.

ಸಂವೇದನಾಶೀಲ ಮಾಹಿತಿ ಸಂಗ್ರಹ: ಪಾಕ್ ಗೂಢಚಾರರು ಭಾರತದ ಸೇನಾ ಚಲನವಲನ, ವಿಮಾನ ನಿಲ್ದಾಣಗಳು, ಇತರ ರಾಷ್ಟ್ರೀಯ ಭದ್ರತೆಗೆ ಸಂಬಂಧಿಸಿದ ಮಾಹಿತಿಯನ್ನು ಐಎಸ್​ಐಗೆ ಒದಗಿಸುತ್ತಾರೆ. ಆಪರೇಷನ್ ಸಿಂಧೂರ ಸಮಯದಲ್ಲಿ ಬ್ಲಾಕ್​ಔಟ್ ಸಹಿತ ಹಲವು ಸೇನಾ ಮಾಹಿತಿಯನ್ನು ಜ್ಯೋತಿಯಿಂದ ಪಾಕ್ ಸಂಗ್ರಹ ಮಾಡಿತ್ತು.

ಜಾಲ ವಿಸ್ತರಣೆ: ಐಎಸ್​ಐ ತನ್ನ ಜಾಲವನ್ನು ವಿಸ್ತರಿಸಲು ಸಾಮಾನ್ಯ ನಾಗರಿಕರನ್ನು ಗುರಿಯಾಗಿಸುತ್ತಿದೆ. ಜ್ಯೋತಿ ಸಹಿತ ಹಲವರನ್ನು ಮೊದಲು ಸಾಮಾನ್ಯರಂತೆ ಪರಿಚಯ ಮಾಡಿಕೊಂಡು ನಂತರ ಅವರನ್ನು ಗೂಢಚಾರಿಕೆಗೆ ಬಳಕೆ ಮಾಡಲಾಯಿತು. ಹೀಗೆ ಈ ಜಾಲವನ್ನು ಇನ್ನಷ್ಟು ವಿಸ್ತರಿಸುವುದು ಪಾಕಿಸ್ತಾನದ ಗುರಿಯಾಗಿದೆ.

ಎಷ್ಟು ಅಪಾಯಕಾರಿ?

ರಾಷ್ಟ್ರೀಯ ಭದ್ರತೆಗೆ ಕುತ್ತು: ಆಪರೇಷನ್ ಸಿಂಧೂರ ಸಮಯದಲ್ಲಿ ಬ್ಲಾಕ್​ಔಟ್ ವಿವರಗಳಂತಹ ಸಂವೇದನಾಶೀಲ ಮತ್ತು ಸೇನಾ ಮಾಹಿತಿಗಳನ್ನು ಪಾಕಿಸ್ತಾನಕ್ಕೆ ರವಾನೆ ಮಾಡುವುದು ಭಾರತದ ಸೇನಾ ಕಾರ್ಯಾಚರಣೆಗಳಿಗೆ ಅಪಾಯ ಉಂಟುಮಾಡಬಹುದು.

ಸಾಮಾಜಿಕ ಒಡಕು: ಐಎಸ್​ಐ ಕಾರ್ಯಸೂಚಿ ಭಾರತದಲ್ಲಿ ಧಾರ್ವಿುಕ ಮತ್ತು ಸಾಮಾಜಿಕ ಒಡಕನ್ನು ಉಂಟುಮಾಡುವ ಗುರಿಯನ್ನೂ ಹೊಂದಿದೆ. ಜನರ ನಡುವೆ ಭಿನ್ನಾಭಿಪ್ರಾಯವನ್ನು ಬಿತ್ತುವ ಮೂಲಕ ದೇಶದ ಒಗ್ಗಟ್ಟನ್ನು ದುರ್ಬಲಗೊಳಿಸಲಾಗುತ್ತದೆ. ಇದಕ್ಕೆ ಸಾಮಾಜಿಕ ಜಾಲತಾಣವನ್ನು ದೊಡ್ಡ ಪ್ರಮಾಣದಲ್ಲಿ ಬಳಕೆ ಮಾಡಲಾಗುತ್ತದೆ.

ಡಿಜಿಟಲ್ ಯುದ್ಧ: ಸಾಮಾಜಿಕ ಮಾಧ್ಯಮದ ಮೂಲಕ ಗೂಢಚಾರಿಕೆಯು ಆಧುನಿಕ ಯುದ್ಧದ ಒಂದು ರೂಪವಾಗಿದೆ. ಇದು ಸಾಂಪ್ರದಾಯಿಕ ಯುದ್ಧಕ್ಕಿಂತ ವೇಗವಾಗಿ ಮತ್ತು ವ್ಯಾಪಕವಾಗಿ ಹರಡುತ್ತದೆ. ಇದನ್ನು ತಡೆಗಟ್ಟುವುದು ಭಾರತದ ಭದ್ರತಾ ಸಂಸ್ಥೆಗಳಿಗೆ ಸವಾಲಾಗಿದೆ.