ಇಸ್ರೇಲ್ ಹಮಾಸ್ ಕದನ: ಸೈರನ್ ಕೇಳಿ ನಡುಗಿದ ಜೀವ, ಸ್ವಲ್ಪದರಲ್ಲೇ ಪ್ರಾಣಾಪಾಯದಿಂದ ಪಾರು…ಭಯಾನಕ ದೃಶ್ಯ ವಿವರಿಸಿದ ಭಾರತೀಯರು

ನವದೆಹಲಿ: ತೀವ್ರ ಸಂಘರ್ಷದ ನಡುವೆ ಇಸ್ರೇಲ್‌ನಲ್ಲಿ ಸಿಲುಕಿರುವ ಭಾರತೀಯರನ್ನು ಸುರಕ್ಷಿತವಾಗಿ ಕರೆತರಲು ಆರಂಭಿಸಲಾದ ಆಪರೇಷನ್ ಅಜಯ್ ಅಡಿಯಲ್ಲಿ ಮೊದಲ ಬಾರಿಗೆ 212 ಪ್ರಯಾಣಿಕರನ್ನು ಹೊತ್ತ ಏರ್ ಇಂಡಿಯಾ ವಿಮಾನವು ಶುಕ್ರವಾರ ಬೆಳಗ್ಗೆ 7 ಗಂಟೆಗೆ ಐಜಿಐ ವಿಮಾನ ನಿಲ್ದಾಣವನ್ನು ತಲುಪಿತು.

200 ಭಾರತೀಯರನ್ನು ಹೊತ್ತ ಮತ್ತೊಂದು ವಿಮಾನ ಶನಿವಾರ ಆಗಮಿಸುವ ನಿರೀಕ್ಷೆಯಿದೆ. ಇಸ್ರೇಲ್​​​​​​ನ ರಾಜಧಾನಿ ಟೆಲ್ ಅವೀವ್ ನಿಂದ ಬಂದ ಈ ಭಾರತೀಯರಿಗೆ ತಮ್ಮ ಭಾವನೆಗಳನ್ನು ಹತೋಟಿಯಲ್ಲಿಟ್ಟುಕೊಳ್ಳುವುದು ಕಷ್ಟಕರವಾಗಿತ್ತು. ಅವರು ಸುರಕ್ಷಿತವಾಗಿ ಮತ್ತು ಸದೃಢವಾಗಿರುವುದನ್ನು ನೋಡಿ, ಅವರ ಸಂಬಂಧಿಕರ ಕಣ್ಣುಗಳು ಸಂತೋಷದಿಂದ ತುಂಬಿದವು. ಭಾರತ್ ಮಾತಾ ಕಿ ಜೈ...ವಂದೇ ಮಾತರಂ ಎಂಬ ಘೋಷಣೆಗಳು ಪ್ರತಿಧ್ವನಿಸಲು ಪ್ರಾರಂಭಿಸಿದವು. ಟರ್ಮಿನಲ್ 3ಕ್ಕೆ ಆಗಮಿಸಿದ ಪ್ರಯಾಣಿಕರನ್ನು ಸ್ವಾಗತಿಸಲು ಸ್ವತಃ ಕೇಂದ್ರ ಸಚಿವ ರಾಜೀವ್ ಚಂದ್ರಶೇಖರ್ ಆಗಮಿಸಿದ್ದರು.

ಎಲ್ಲಾ ಭಾರತೀಯರನ್ನು ಸುರಕ್ಷಿತವಾಗಿ ಮನೆಗೆ ಕರೆತರಲು ನಾವು ಬದ್ಧರಾಗಿದ್ದೇವೆ. ಕಷ್ಟಕರವಾದ ಕೆಲಸವನ್ನು ಸಾಧ್ಯವಾಗಿಸಿದ ಈ ವಿಮಾನದ ಸಿಬ್ಬಂದಿಗೆ ನಾವು ಕೃತಜ್ಞರಾಗಿರುತ್ತೇವೆ. ಮಕ್ಕಳನ್ನು ಸುರಕ್ಷಿತವಾಗಿ ಅವರ ಪ್ರೀತಿಪಾತ್ರರ ಬಳಿ ಕಳುಹಿಸಲಾಯಿತು. ಭಾರತ ತಲುಪಿದ ಪ್ರಯಾಣಿಕರ ಮುಖದಲ್ಲಿ ಭಯ ಮತ್ತು ಸಮಾಧಾನದ ಮಿಶ್ರ ಭಾವನೆ ಇತ್ತು ಎಂದು ಸಚಿವರು ಹೇಳಿದರು.

ಸೈರನ್ ಸದ್ದಿಗೆ ಭಯ ಹೆಚ್ಚಾಯಿತು
ಇಸ್ರೇಲ್ ವಿಶ್ವವಿದ್ಯಾನಿಲಯದ ವಿದ್ಯಾರ್ಥಿನಿ ದ್ಯುತಿ ಬ್ಯಾನರ್ಜಿ ಮಾತನಾಡಿ, "ಇಲ್ಲೇ ರಾಕೆಟ್ ಬಿದ್ದು ಕ್ಷಣಮಾತ್ರದಲ್ಲಿ ಎಲ್ಲವೂ ಧ್ವಂಸವಾಗುತ್ತಿತ್ತೇನೋ ಅನ್ನಿಸಿತು. ಸೈರನ್ ಸದ್ದಿಗೆ ಭಯ ಹೆಚ್ಚಾಯಿತು. ಸುರಕ್ಷಿತವಾಗಿ ಮನೆಗೆ ಮರಳಿದ ನಾವು ಅದೃಷ್ಟವಂತರು, ಆದರೆ ಇನ್ನೂ ಅನೇಕ ಜನರು ಅಲ್ಲಿ ಸಿಲುಕಿಕೊಂಡಿದ್ದಾರೆ. ನನ್ನ ದೇಶಕ್ಕೆ ಬಂದಿರುವುದು ಸಂತಸ ತಂದಿದೆ. ಕಳೆದ ಕೆಲವು ದಿನಗಳು ತುಂಬಾ ಭಯಾನಕವಾಗಿದೆ. ಗಾಜಾದ ಪಕ್ಕದ ಪ್ರದೇಶಗಳಲ್ಲಿ ಪರಿಸ್ಥಿತಿ ವಿಶೇಷವಾಗಿ ಕೆಟ್ಟದಾಗಿದೆ. ಅಲ್ಲಿ ಮಕ್ಕಳ ಹತ್ಯಾಕಾಂಡದ ಬಗ್ಗೆ ಕೇಳಿದಾಗ ನನ್ನ ಹೃದಯ ಕಂಪಿಸಿತು. ತನ್ನ ಅನೇಕ ಇಸ್ರೇಲ್ ಸ್ನೇಹಿತರು ಅಲ್ಲಿ ಸೇನೆಯಲ್ಲಿ ಸೇವೆ ಸಲ್ಲಿಸುತ್ತಿದ್ದಾರೆ'' ಎಂದರು.

ಊಹಿಸುವುದು ಕಷ್ಟ
"ಪತ್ನಿಯೊಂದಿಗೆ ಬಂದಿರುವ ಯಶವಂತ್ ಸಿಂಗ್, ಇಸ್ರೇಲ್ ನಲ್ಲಿ ಕೃಷಿ ಕ್ಷೇತ್ರದಲ್ಲಿ ಸಂಶೋಧನೆ ಮಾಡುತ್ತಾರೆ. ಈ ಘರ್ಷಣೆ ಯಾವ ಸ್ವರೂಪವನ್ನು ತೆಗೆದುಕೊಳ್ಳುತ್ತದೆ ಎಂದು ಊಹಿಸುವುದು ಕಷ್ಟ ಎಂದು ಹೇಳಿದರು. ವಿವಿಧ ಸ್ಥಳಗಳಲ್ಲಿ ನಿರ್ಮಿಸಲಾದ ಆಶ್ರಯ ಮನೆಗಳಲ್ಲಿ ಹೆಚ್ಚಿನ ಸಂಖ್ಯೆಯ ಭಾರತೀಯರು ಆಶ್ರಯ ಪಡೆಯುತ್ತಿದ್ದಾರೆ'' ಎಂದು ಪಿ ಘೋಷ್ ಹೇಳಿದರು.

ವಿಮಾನ ಸೇವೆ ರದ್ದುಗೊಳಿಸುವ ಸುದ್ದಿ
ಪ್ರಯಾಣಿಕರ ಪೈಕಿ ಸೌರವ್, ಉತ್ತರ ಇಸ್ರೇಲ್ ನಲ್ಲಿ ನೆಲೆಸಿದ್ದರು. "ಇಲ್ಲಿಗೆ ತಲುಪಿದ ನಂತರ ನನ್ನ ತಲೆಯಿಂದ ಭಾರವಾದ ಹೊರೆ ಕಳಚಿದಂತೆ ಭಾಸವಾಗುತ್ತಿದೆ'' ಎಂದರು. ಇಸ್ರೇಲ್‌ನಿಂದ ನವದೆಹಲಿಗೆ ವಿಮಾನ ಸೇವೆಗಳನ್ನು ರದ್ದುಗೊಳಿಸುವ ಸುದ್ದಿ ತಮ್ಮ ಆತಂಕವನ್ನು ಹೆಚ್ಚಿಸಿದೆ ಎಂದು ಕೆಲವು ಪ್ರಯಾಣಿಕರು ಹೇಳಿದರು.

"ಟರ್ಕಿ ಅಥವಾ ಸೈಪ್ರಸ್ ಮೂಲಕ ಭಾರತಕ್ಕೆ ಬರುವ ಆಲೋಚನೆ ಬಂದಿತು, ಆದರೆ ಇಸ್ರೇಲ್‌ನಿಂದ ಈ ದೇಶಗಳಿಗೆ ವಿಮಾನ ಸೇವೆಗಳನ್ನು ರದ್ದುಗೊಳಿಸಲಾಗಿದೆ ಎಂಬ ವದಂತಿ ಹರಡಿತು. ಭಾರತ ಸರ್ಕಾರ ಸರಿಯಾದ ಸಮಯಕ್ಕೆ ಕಾರ್ಯಾಚರಣೆಯನ್ನು ಪ್ರಾರಂಭಿಸಿತು, ಇಲ್ಲದಿದ್ದರೆ ಪರಿಸ್ಥಿತಿ ಇನ್ನಷ್ಟು ಹದಗೆಡುತ್ತಿತ್ತು'' ಎಂದು ಪ್ರಯಾಣಿಕರು ಅಳಲು ತೋಡಿಕೊಂಡರು.

ಜೈಪುರದ ಮಿನಿ ಶರ್ಮಾ ಅವರು ಹಿಂದಿರುಗಲು ಒಂದು ದಿನ ಮೊದಲು ಭಾರತೀಯ ರಾಯಭಾರ ಕಚೇರಿಯಿಂದ ಸಂದೇಶ ಬಂದಿತ್ತು ಎಂದು ಹೇಳಿದರು. ರಾಯಭಾರ ಕಚೇರಿಯ ಜನರು ತುಂಬಾ ಸಹಾಯ ಮಾಡಿದರು. ನಾವು ದಿನದ 24 ಗಂಟೆಯೂ ಅವರನ್ನು ಸಂಪರ್ಕಿಸಬಹುದು. ಇಸ್ರೇಲ್‌ನಲ್ಲಿ ಸುಮಾರು 18,000 ಭಾರತೀಯರು ವಾಸಿಸುತ್ತಿದ್ದರೆ, ಸುಮಾರು ಒಂದು ಡಜನ್ ಜನರು ಪಶ್ಚಿಮ ದಂಡೆಯಲ್ಲಿ ಮತ್ತು ಮೂರರಿಂದ ನಾಲ್ಕು ಜನರು ಗಾಜಾದಲ್ಲಿದ್ದಾರೆ ಎಂದು ವಿದೇಶಾಂಗ ಸಚಿವಾಲಯದ ವಕ್ತಾರ ಅರ್ಡಾಮ್ ಬಾಗ್ಚಿ ಹೇಳಿದ್ದಾರೆ. ಎಲ್ಲರನ್ನೂ ಮನೆಗೆ ಕರೆತರುವ ಪ್ರಯತ್ನ ನಡೆಯುತ್ತಿದೆ ಎಂದು ತಿಳಿಸಿದರು.

https://www.vijayavani.net/11-sent-to-hospital-after-ammonia-leak-at-southern-california-building