ಮೈಸೂರುಪಾ​ಕ್​ ತಿಂದರೆ ಕರೊನಾ ಸೋಂಕು ಗುಣವಾಗುತ್ತಂತೆ!

ಬೆಂಗಳೂರು: ಕರ್ನಾಟಕದ ಪ್ರಖ್ಯಾತ ಸಿಹಿಖಾದ್ಯ ಮೈಸೂರುಪಾಕ್​ ಅನ್ನು ತಿಂದರೆ ಕ್ಷಣದಲ್ಲೇ ಕರೊನಾ ಸೋಂಕು ಗುಣವಾಗುತ್ತಂತೆ!

ಹೀಗೆಂದು ಹೇಳಿದ್ದು ವೈದ್ಯರಲ್ಲ. ಈ ಬಗ್ಗೆ ಯಾವುದೇ ಕ್ಲಿನಿಕಲ್​ ಟ್ರಯಲ್​ ಕೂಡ ನಡೆದಿಲ್ಲ. ಆದರೆ, ಹೀಗೆ ಹೇಳಿದವರು ಕರ್ನಾಟಕದವರಂತೂ ಅಲ್ಲವೇ ಅಲ್ಲ. ಮತ್ತೆ ಯಾರು? ಕೊಯಮತ್ತೂರಿನ ಚಿನ್ನಿಯಾಂಪಾಳ್ಯಂನ ಪ್ರಖ್ಯಾತ ಸಿಹಿತಿಂಡಿ ಮಾರಾಟ ಮಳಿಗೆಯ ಮಾಲೀಕರು ಹೀಗೆಂದು ಪ್ರಚಾರ ಮಾಡುತ್ತಿದ್ದಾರೆ.

ಚಿನ್ನಿಯಾಂಪಾಳ್ಯಂ ಮಳಿಗೆಯಲ್ಲಿ ಗಿಡಮೂಲಿಕೆಗಳನ್ನು ಬಳಸಿ ಮೈಸೂರುಪಾಕ್​ ಅನ್ನು ತಯಾರಿಸಲಾಗಿದೆ. ಇದನ್ನು ಚಿನ್ನಿಯಾಂಪಾಳ್ಯಂ ಮತ್ತು ವೆಲ್ಲಾಲೋರ್​ನಲ್ಲಿ ಯಶಸ್ವಿಯಾಗಿ ಪ್ರಯೋಗಿಸಲಾಗಿದ್ದು, ಇದನ್ನು ತಿಂದವರಲ್ಲಿ ಕರೊನಾ ಸೋಂಕು ಗುಣವಾಗಿದೆ. ಕೋವಿಡ್​-19 ಸೋಂಕಿನ ಗುಣಲಕ್ಷಣ ಇರುವವರು ಮತ್ತು ಕರೊನಾ ಸೋಂಕಿತರಿಗೆ ಮೈಸೂರುಪಾಕ್​ ಅನ್ನು ಉಚಿತವಾಗಿ ಸರಬರಾಜು ಮಾಡುವುದಾಗಿ ಅಂಗಡಿಯ ಮಾಲೀಕ ಹೇಳಿಕೊಂಡಿದ್ದಾರೆ.

ಇದನ್ನೂ ಓದಿ: ಕರೊನಾ ಸೋಂಕು ಹೆಚ್ಚಳ ಹಿನ್ನೆಲೆಯಲ್ಲಿ ಬಳ್ಳಾರಿಗೆ ಅಂತಾರಾಜ್ಯ ಪ್ರಯಾಣಿಕರ ಪ್ರವೇಶಕ್ಕೆ ನಿಷೇಧ

ಗಿಡಮೂಲಿಕೆಯ ಮೈಸೂರುಪಾಕ್​ ತಯಾರಿಸುವ ಸೂತ್ರವನ್ನು ತಾನು ಕೇಂದ್ರ ಸರ್ಕಾರದೊಂದಿಗೆ ಹಂಚಿಕೊಳ್ಳಲು ಸಿದ್ಧ ಎಂದೂ ಹೇಳಿದ್ದರು. ಆದರೆ, ಆರೋಗ್ಯ ಇಲಾಖೆ ಅಧಿಕಾರಿಗಳಿಗೆ ಇವರ ಹೇಳಿಕೆ ಸಹ್ಯವಾಗದ ಹಿನ್ನೆಲೆಯಲ್ಲಿ ಅವರ ವಿರುದ್ಧ ತನಿಖೆ ಆರಂಭಿಸಿದ್ದಾರೆ.

ಅವರ ಈ ಹೇಳಿಕೆ ಸಾಂಕ್ರಾಮಿಕ ರೋಗಗಳ ಕಾಯ್ದೆ, 1897ರ ಸ್ಪಷ್ಟ ಉಲ್ಲಂಘನೆಯಾಗುತ್ತದೆ. ಕರೊನಾ ವೈರಾಣು ಹರಡದಂತೆ ತಡೆಯಬೇಕು ಎಂದು ಸರ್ಕಾರ ಜನರಲ್ಲಿ ಜಾಗೃತಿ ಮೂಡಿಸುತ್ತಿರುವ ಸಂದರ್ಭದಲ್ಲಿ ಜನರನ್ನು ತಪ್ಪುದಾರಿಗೆ ಎಳೆಯುವಂಥ ಇಂಥ ಪ್ರಕಟಣೆ ನೀಡಲಾಗಿದೆ. ಆದ್ದರಿಂದ ಆ ಅಂಗಡಿಯ ಮಾಲೀಕನ ವಿರುದ್ಧ ತನಿಖೆ ಆರಂಭಿಸಲಾಗಿದೆ ಎಂದು ತಮಿಳುನಾಡಿನ ಆರೋಗ್ಯ ಸೇವೆಗಳ ಉಪ ನಿರ್ದೇಶಕ ಜಿ. ರಮೇಶ್​ ಕುಮಾರ್​ ಹೇಳಿದ್ದಾರೆ.

https://www.vijayavani.net/khan-saab-will-kill-every-hindu-in-pakistan/