ರಾಚಕೊಂಡ ಪೊಲೀಸರ ಅದ್ಭುತ ಕೆಲಸ; ಲಾಕ್​ಡೌನ್​ ಸಂದರ್ಭದಲ್ಲಿ ಅವರು ಮಾಡುತ್ತಿರುವ ಈ ಕಾರ್ಯವನ್ನು ನೀವು ಮೆಚ್ಚಿಕೊಳ್ಳದೆ ಇರಲಾರಿರಿ

ತೆಲಂಗಾಣ: ಪೊಲೀಸರು ಕರೊನಾ ಲಾಕ್​ಡೌನ್​ ವೇಳೆ ತಮ್ಮ ಕರ್ತವ್ಯ ಮಾಡುವುದರ ಜತೆ, ಲಾಕ್​ಡೌನ್​ನಿಂದ ಹೊಟ್ಟೆಬಟ್ಟೆಗಿಲ್ಲದೆ, ಕಷ್ಟಪಡುತ್ತಿರುವವರಿಗೂ ಸಹಾಯ ಮಾಡುತ್ತಿದ್ದಾರೆ. ಕೆಲಸವಿಲ್ಲದೆ, ಕೈಯಲ್ಲಿ ಹಣವೂ ಇಲ್ಲದೆ ಹಸಿವಿನಿಂದ ಕಂಗಾಲಾದ ಎಷ್ಟೋ ಜನರಿಗೆ ಪೊಲೀಸರು ಊಟ ನೀಡುತ್ತಿದ್ದಾರೆ.

ಈ ಮಧ್ಯೆ ತೆಲಂಗಾಣದ ರಾಚಕೊಂಡ ಪೊಲೀಸ್​ ಕಮಿಷನರೇಟ್​ ಕಚೇರಿ ಸುಮಾರು 41 ವೃದ್ಧಾಶ್ರಮಗಳು, ಅನಾಥಾಶ್ರಮಗಳು ಮತ್ತು ಅಂಗವಿಕಲರ ಆಶ್ರಯತಾಣಗಳನ್ನು ದತ್ತುಪಡೆದು, ಲಾಕ್​ಡೌನ್​ ಸಂದರ್ಭದಲ್ಲಿ ಅವರಿಗೆ ಊಟ ಮತ್ತಿತರ ಅಗತ್ಯಗಳನ್ನು ಪೂರೈಕೆ ಮಾಡುತ್ತಿದೆ.

ಪೊಲೀಸ್ ಕಮಿಷನರೇಟ್​ ಕಚೇರಿ ದತ್ತುಪಡೆದ ಎಲ್ಲ ವೃದ್ಧಾಶ್ರಮ, ಅನಾಥಾಶ್ರಮ, ಅಂಗವಿಕಲರ ಆಶ್ರಯ ತಾಣಗಳಿಗೆ ಎಲ್ಲ ರೀತಿಯ ರೇಷನ್​, ಅಲ್ಲಿನವರಿಗೆ ಬೇಕಾದ ಅಗತ್ಯ ವಸ್ತುಗಳು, ಔಷಧಗಳನ್ನು ಒದಗಿಸುತ್ತಿದೆ. ಪೊಲೀಸರ ಈ ಒಳ್ಳೆಯ ಕಾರ್ಯಕ್ಕೆ ಕೆಲವು ಎನ್​ಜಿಒಗಳೂ ಕೈ ಜೋಡಿಸಿವೆ.

ಲಾಕ್​ಡೌನ್​ ಇರುವುದರಿಂದ ಜನರಿಗೆ ಹೊರಗಡೆ ಹೋಗಲು ಆಗುತ್ತಿಲ್ಲ. ಅದರಲ್ಲೂ ವೃದ್ಧರು, ಅಂಗವಿಕಲರು ಮತ್ತೂ ಕಷ್ಟಪಡುವಂತಾಗಿದೆ. ವೃದ್ಧಾಶ್ರಮಗಳು, ಅನಾಥಾಲಯಗಳನ್ನು ನಡೆಸುವವರಿಗೂ ಅಗತ್ಯ ವಸ್ತುಗಳ ಸಂಗ್ರಹ ಕಷ್ಟವಾಗುತ್ತಿದೆ. ಹಾಗಾಗಿ ನಾವು ದತ್ತು ಪಡೆದಿದ್ದೇವೆ ಎಂದು ಹಿರಿಯ ಪೊಲೀಸ್ ಅಧಿಕಾರಿ ತಿಳಿಸಿದ್ದಾರೆ. (ಏಜೆನ್ಸೀಸ್​)

https://www.vijayavani.net/maharashtra-asks-6-states-to-take-back-3-5l-stranded-migrants/