ಜಮ್ಮು-ಕಾಶ್ಮೀರಕ್ಕೆ ಸಂವಿಧಾನದ 370ನೇ ವಿಧಿ ಅನ್ವಯ ನೀಡಲಾಗಿದ್ದ ‘ವಿಶೇಷ ಸ್ಥಾನಮಾನ’ವನ್ನು ಕೇಂದ್ರ ಸರ್ಕಾರ 2019 ಆಗಸ್ಟ್ 5ರಂದು ಹಿಂಪಡೆಯುವ ಮೂಲಕ, ಮಹತ್ವದ ಹೆಜ್ಜೆ ಇರಿಸಿತು. ಆದರೆ, ಕೇಂದ್ರದ ಈ ಕ್ರಮವನ್ನು ಪ್ರಶ್ನಿಸಿ ಸುಪ್ರೀಂ ಕೋರ್ಟ್ನಲ್ಲಿ 23 ಅರ್ಜಿಗಳು ದಾಖಲಾಗಿದ್ದವು. ಸುದೀರ್ಘ ವಿಚಾರಣೆಯ ಬಳಿಕ, ಸೋಮವಾರ ತೀರ್ಪು ಪ್ರಕಟಿಸಿರುವ ನ್ಯಾಯಾಲಯ ಕೇಂದ್ರದ ನಿರ್ಣಯವನ್ನು ಎತ್ತಿಹಿಡಿದಿದೆ. ಇದು ಚಾರಿತ್ರಿಕ ತೀರ್ಪಾಗಿದ್ದು, ಜಮ್ಮು-ಕಾಶ್ಮೀರದ ಅಭಿವೃದ್ಧಿಗೆ, ಭವಿಷ್ಯಕ್ಕೆ ಪೂರಕವಾಗಿ ಪರಿಣಮಿಸಲಿದೆ ಎಂಬುದರಲ್ಲಿ ಅನುಮಾನವಿಲ್ಲ. ಭಾರತದ ಒಕ್ಕೂಟ ವ್ಯವಸ್ಥೆಯನ್ನು ಬಲಪಡಿಸುವ, ‘ಒಂದು ದೇಶ ಒಂದು ಕಾನೂನು’ ನೀತಿಯನ್ನು ಬಲಗೊಳಿಸಿದ ಈ ಕ್ರಮ ನಿಜಕ್ಕೂ ಪ್ರಶಂಸಾರ್ಹ. ಕಾಶ್ಮೀರವನ್ನು ಭಾರತದ ಅಭಿವೃದ್ಧಿಯ ಮುಖ್ಯವಾಹಿನಿಗೆ ತರಲು ವಿಶೇಷ ಸ್ಥಾನಮಾನ ಮತ್ತು 35ಎ ವಿಧಿ ಅಡ್ಡಿಯಾಗಿದ್ದವು. ಇದನ್ನು ತೆಗೆದು ಹಾಕುವುದು ಸುಲಭವೂ ಇರಲಿಲ್ಲ. ‘ಕೇಂದ್ರದಲ್ಲಿ ಹತ್ತು ಬಾರಿ ಅಧಿಕಾರಕ್ಕೆ ಬಂದರೂ ಕಾಶ್ಮೀರದ ವಿಶೇಷ ಸ್ಥಾನಮಾನ ತೆಗೆದು ಹಾಕಲು ಸಾಧ್ಯವಿಲ್ಲ’ ಎಂದು ಆ ರಾಜ್ಯದ ಮಾಜಿ ಮುಖ್ಯಮಂತ್ರಿಯೊಬ್ಬರು ಗುಡುಗಿದ್ದರು. ಅಲ್ಲದೆ, ಸಂವಿಧಾನ ತಾತ್ಕಾಲಿಕವಾಗಿ ನೀಡಿದ್ದ ಈ ಸವಲತ್ತನ್ನು ಅಲ್ಲಿಯ ರಾಜಕಾರಣಿಗಳು ‘ಶಾಶ್ವತ’ ಎಂಬಂತೆ ಜನರಲ್ಲಿ ಬಿಂಬಿಸಿ, ಅದನ್ನು ಮತಬ್ಯಾಂಕಿನ ಪ್ರಮುಖ ಅಸ್ತ್ರವನ್ನಾಗಿಸಿಕೊಂಡಿದ್ದರು.
