ಇನ್ನೊಂದು ಪ್ರಕರಣ ನಡೆದದ್ದು ಶಾಲೆಯ ವಾರ್ಷಿಕ ಸ್ನೇಹ ಸಮ್ಮೇಳನದಲ್ಲಿ. ಬಲು ದೊಡ್ಡ ವೇದಿಕೆ. 500 ಕ್ಕೂ ಹೆಚ್ಚು ವಿದ್ಯಾರ್ಥಿಗಳಿದ್ದರು. ನಾನು ಆ ಕಾರ್ಯಕ್ರಮಕ್ಕೆ ಮುಖ್ಯ ಅತಿಥಿ. ವೇದಿಕೆಯಲ್ಲಿ ನನ್ನ ಜತೆ ಮುಖ್ಯೋಪಾಧ್ಯಾಯರು, ಶಾಲೆ ಆಡಳಿತ ಮಂಡಳಿ ಹಾಗೂ ವಿದ್ಯಾರ್ಥಿ ಸಂಸತ್ತಿನ ಪ್ರಧಾನಿ(ವಿದ್ಯಾರ್ಥಿ) ಇದ್ದರು. ಸಾಂಸ್ಕೃತಿಕ ಕಾರ್ಯಕ್ರಮ ಆಯೋಜಿಸಲಾಗಿತ್ತು. ಓರ್ವ ಬಾಲಕಿ ಒಳ್ಳೆಯ ನೃತ್ಯ ಮಾಡಿದಳು. ಆಕೆಯ ನೃತ್ಯ ಮುಗಿಯುತ್ತಿದ್ದಂತೆ ಅನೇಕ ಮಕ್ಕಳು ಸಿಳ್ಳೆ, ಕೇಕೆ ಹಾಕಿದರು. ಇದೇಕೋ ನನಗೆ ಸರಿ ಎನಿಸಲಿಲ್ಲ. ಈ ಮಧ್ಯೆ ಮುಖ್ಯೋಪಾಧ್ಯಾಯರು ವಿದ್ಯಾರ್ಥಿಗಳನ್ನುದ್ದೇಶಿಸಿ ನಾಲ್ಕು ಹಿತನುಡಿ ಆಡಲು ಹೇಳಿದರು. ಇದಕ್ಕೆ ನಾನು ನಿರಾಕರಿಸಿದೆ. ಯಾಕೆಂದರೆ ಆ ಶಾಲೆಯ ಒಳಗೆ ಹೋಗುವಾಗ ಜ್ಞಾನ ದೇಗುಲವಿದು ಕೈ ಮುಗಿದು ಒಳಗೆ ಬಾ ಎಂಬ ನಾಮ ಫಲಕವನ್ನೂ ನಾನು ನೋಡಿದ್ದೆ, ವಿದ್ಯಾರ್ಥಿಗಳ ಈ ತರಹದ ಅನುಚಿತ ವರ್ತನೆಯಿಂದ ನನ್ನ ಮನಸ್ಸಿಗೆ ಬಹಳ ನೋವು ಊಂಟಾಯಿತು.
