ಉರ್ದು ಶಾಲೆ ರಸ್ತೆ ಕೆಸರುಮಯ

ಆನಂದಪುರ: ಸಮೀಪದ ಆಚಾಪುರದ ಸರ್ಕಾರಿ ಉರ್ದು ಹಿರಿಯ ಪ್ರಾಥಮಿಕ ಶಾಲೆ ಸಂಪರ್ಕ ರಸ್ತೆ ಕೆಸರುಮಯವಾಗಿದೆ. ಆಚಾಪುರ ಕೆರೆ ಪಕ್ಕದಲ್ಲೇ ಇರುವ ಈ ಶಾಲೆಗೆ ಎಡಭಾಗದಿಂದ ರಸ್ತೆಯಿದೆ. ಶಾಲೆ ಹಿಂಭಾಗದಲ್ಲಿ ಸುಮಾರು 20ಕ್ಕೂ ಅಧಿಕ ಕುಟುಂಬಗಳಿದ್ದು ವಿದ್ಯಾರ್ಥಿಗಳು ಈ ರಸ್ತೆ ಮೂಲಕ ಬರಬೇಕಾಗಿದೆ. ಕೆಸರುಮಯ ರಸ್ತೆಯಲ್ಲಿ ಶಾಲಾ ಬ್ಯಾಗ್ ಹೊತ್ತು ಬರುವ ವಿದ್ಯಾರ್ಥಿಗಳು ಜಾರಿ ಬಿದ್ದ ಅನೇಕ ಉದಾಹರಣೆಗಳಿವೆ. ಸುಮಾರು 300 ಮೀಟರ್ ಉದ್ದದ ಈ ಕೆಸರಿನ ರಸ್ತೆ ಡಾಂಬರೀಕರಣ ಮಾಡುವ ಅಗತ್ಯವಿದೆ. ಪಾಲಕರಿಗೆ ನಿತ್ಯವೂ ಮಕ್ಕಳನ್ನು ಶಾಲೆಗೆ ಸುರಕ್ಷತವಾಗಿ ಕಳುಹಿಸುವ ಮತ್ತು ಸಂಜೆ ಸಮಯದಲ್ಲಿ ಮನೆಗೆ ಕರೆ ತರುವುದು ದೊಡ್ಡ ಸವಾಲಾಗಿದೆ.