ಮತ್ತೊಂದು ವಿವಾದದ ಸುಳಿಗೆ ಉಡುಪಿ; ಕ್ರೀಡಾಕೂಟದಲ್ಲಿ ಅಜಾನ್​ಗೆ ಡ್ಯಾನ್ಸ್​ ಮಾಡಲು ಒತ್ತಾಯಿಸಿದ್ರಾ?!

ಉಡುಪಿ: ಹಿಜಾಬ್​ ವಿವಾದದ ಆಘಾತದಿಂದ ಇನ್ನೂ ಪೂರ್ತಿಯಾಗಿ ಹೊರಬರದ ಉಡುಪಿ ಜಿಲ್ಲೆ ಈಗ ಮತ್ತೊಂದು ವಿವಾದದ ಸುಳಿಗೆ ಸಿಲುಕಿಕೊಂಡಿದೆ. ಈಗ ಕ್ರೀಡಾ ಕೂಟದಲ್ಲಿ ಹಿಂದೂ ವಿದ್ಯಾರ್ಥಿಗಳನ್ನು ಅಜಾನ್​ಗೆ ನೃತ್ಯ ಮಾಡುವಂತೆ ಒತ್ತಾಯಿಸಲಾಗಿದೆ ಎಂದು ಹಿಂದು ಸಂಘಟನೆಗಳು ಆರೋಪಿಸಿವೆ.

ಉಡುಪಿ ಪೇಟೆ ಸಮೀಪದ ಶಂಕರನಾರಾಯಣದಲ್ಲಿ ಮದರ್ ಥೆರೇಸಾ ಮೆಮೊರಿಯಲ್​ ಶಾಲೆಯ ಆವರಣದಲ್ಲಿ ಆಯೋಜಿಸಿದ್ದ ವಲಯ ಮಟ್ಟದ ಕ್ರೀಡಾಕೂಟದಲ್ಲಿ ಈ ಘಟನೆ ನಡೆದಿದೆ. ವಿದ್ಯಾರ್ಥಿನಿಯರು ಅಜಾನ್​ಗೆ ಡ್ಯಾನ್ಸ್ ಮಾಡಿರುವ ವಿಡಿಯೋ ಸಾಮಾಜಿಕ ಜಾಲತಾಣದಲ್ಲಿ ಭಾರಿ ವೈರಲ್ ಆಗಿತ್ತು. ಈ ಘಟನೆ ಬಗ್ಗೆ ಆಕ್ರೋಶ ಹೊರಹಾಕಿರುವ ಹಿಂದು ಸಂಘಟನೆಗಳು ಉಡುಪಿ ಜಿಲ್ಲೆಯಲ್ಲಿ ಇಂದು (ಬುಧವಾರ) ಪ್ರತಿಭಟನೆ ನಡೆಸಿದವು.

'ಉದ್ಘಾಟನಾ ಕಾರ್ಯಕ್ರಮದಲ್ಲಿ ಹಿಂದೂ, ಇಸ್ಲಾಂ ಮತ್ತು ಕ್ರಿಶ್ಚಿಯನ್ ಧರ್ಮಗಳನ್ನು ಪ್ರತಿನಿಧಿಸುವ ಹಾಡಿಗೆ ನೃತ್ಯ ಮಾಡಿಸಿದ್ದೇವೆ' ಎಂದು ಆಯೋಕರು ಹೇಳಿದ್ದಾರೆ. ಆದರೆ ಪ್ರತಿಭಟನಾಕಾರರು, ಹಿಂದು ವಿದ್ಯಾರ್ಥಿಗಳ ಕೈಯಲ್ಲಿ ಅಜಾನ್ ಗೆ ನೃತ್ಯ ಮಾಡಿಸಿದ್ದನ್ನು ಖಂಡಿಸಿದ್ದಾರೆ. ಘಟನೆ ನಡೆಯುತ್ತಿದ್ದಂತೆಯೆ ಶಂಕರನಾರಾಯಣ ಜಂಕ್ಷನ್‌ನಲ್ಲಿ ಹಿಂದು ಸಂಘಟನೆಗಳು ಪ್ರತಿಭಟನೆ ನಡೆಸಿದವು. ಹಿಂದುಗಳ ಭಾವನೆಗಳಿಗೆ ಧಕ್ಕೆಯಾಗಬಾರದು ಎಂದು ಕ್ರೀಡಾಕೂಟದ ಆಯೋಜಕರಿಗೆ ಪ್ರತಿಭಟನಾಕಾರರು ಎಚ್ಚರಿಕೆ ನೀಡಿದ್ದಾರೆ.

ಕ್ರೀಡಾಕೂಟದಲ್ಲಿ ಪ್ರಾರ್ಥನೆ ವೇಳೆ 30 ಸೆಕೆಂಡುಗಳ ಕಾಲ ಅಜಾನ್ ನುಡಿಸಿದ್ದು, ಯಾವುದೇ ಧರ್ಮದ ಭಾವನೆಗಳಿಗೆ ಧಕ್ಕೆ ತರುವ ಉದ್ದೇಶ ಇಲ್ಲ ಎಂದು ಕಾಲೇಜು ಅಧಿಕಾರಿಗಳು ಸ್ಪಷ್ಟನೆ ನೀಡಿದ್ದಾರೆ. ಈ ಬೆಳವಣಿಗೆಯ ಹಿನ್ನೆಲೆಯಲ್ಲಿ ಆಡಳಿತ ಮಂಡಳಿ ಕ್ಷಮೆಯಾಚಿಸಿದ್ದು, ಸಮಸ್ಯೆ ಮಾಡದಂತೆ ಮನವಿ ಮಾಡಿದೆ. ಈ ಬಗ್ಗೆ ಯಾವುದೇ ದೂರು ಬಂದಿಲ್ಲ ಎಂದು ಪೊಲೀಸರು ಮಾಹಿತಿ ನೀಡಿದ್ದಾರೆ. ಆದರೆ ಶಂಕರನಾರಾಯಣ ಜಂಕ್ಷನ್​ ಬಳಿ ಪ್ರತಿಭಟನೆಯಿಂದ ಜನರು ಕೆಲ ಸಮಯ ಆತಂಕಕ್ಕೆ ಒಳಗಾಗಿದ್ದು ಸುಳ್ಳಲ್ಲ. (ಏಜೆನ್ಸೀಸ್​)

https://www.vijayavani.net/sabarimala-temple-open-for-devotees-from-tommorow/

https://www.vijayavani.net/engineer-diploma-students-job-opportunity-in-bhel/

https://www.vijayavani.net/cms-announcement-to-build-6-hi-tech-cities-in-the-state/