ವರ್ಗಾವಣೆಗೆ ಮತ್ತೆ ವಸೂಲಿ ಶುರು! ಸಾರಿಗೆ ಇಲಾಖೆ ಕ್ಲರಿಕಲ್ ಸಿಬ್ಬಂದಿಗೆ ಕಿರುಕುಳ

| ಕೀರ್ತಿನಾರಾಯಣ ಸಿ. ಬೆಂಗಳೂರು

ರಾಜ್ಯದ ಪ್ರಾದೇಶಿಕ ಸಾರಿಗೆ ಕಚೇರಿಗಳಲ್ಲಿ (ಆರ್​ಟಿಒ) ಅಧಿಕಾರೇತರ ಕ್ಲರಿಕಲ್ (ಲಿಪಿಕ) ಸಿಬ್ಬಂದಿಗೆ ವಾರ್ಷಿಕ ವರ್ಗಾವಣೆ ವಸೂಲಿ ಕಿರುಕುಳ ಮತ್ತೆ ಶುರುವಾಗಿದೆ. ನಿಗದಿ ಮಾಡಿರುವಷ್ಟು ಹಣ ಕೊಟ್ಟವರಿಗೆ ಕೇಳಿದಲ್ಲಿಗೆ ನಿಯೋಜನೆ, ಹಣ ಕೊಡಲು ನಿರಾಕರಿಸಿದವರಿಗೆ ಕೆಲಸವೇ ಇಲ್ಲದ ಕಚೇರಿಗಳಿಗೆ ಎತ್ತಂಗಡಿ ಮಾಡುವ ಬೆದರಿಕೆ ಹಾಕುತ್ತಿರುವ ಆರೋಪ ಕೇಳಿಬಂದಿದೆ.

ಹಣ ಹೊಂದಿಸಲು ಸಿಬ್ಬಂದಿ, ಅಡ್ಡದಾರಿ ಹಿಡಿಯುತ್ತಿರುವ ಪರಿಣಾಮವಾಗಿ ಇಲಾಖೆಯಲ್ಲಿ ಹಲವು ಹಗರಣಗಳು ಬೆಳಕಿಗೆ ಬರುತ್ತಿವೆ. ಏತನ್ಮಧ್ಯೆ, ಯಾರೇ ಆದರೂ ಹಣ ಕೇಳಿದರೆ ಕೊಡಬೇಡಿ. ನನ್ನ ಗಮನಕ್ಕೆ ತನ್ನಿ ಎಂದು ಸಾರಿಗೆ ಸಚಿವರು ಕ್ಲರಿಕಲ್ ಸಿಬ್ಬಂದಿಗೆ ಅಭಯ ನೀಡಿದ್ದಾರೆ. ಲಿಪಿಕ ಸಿಬ್ಬಂದಿ ರಕ್ಷಣೆ ಹೆಸರಲ್ಲಿ ಮೋಟಾರು ವಾಹನ ಇಲಾಖಾ ಸಂಘ (ಲಿಪಿಕ) ಅಸ್ತಿತ್ವದಲ್ಲಿದೆ. ಆದರೆ, ಇಲಾಖೆಯ ಬಹುತೇಕ ಲಿಪಿಕ ಸಿಬ್ಬಂದಿಗೆ ಸಂಘದ ಬಗ್ಗೆ ಮಾಹಿತಿಯೇ ಗೊತ್ತಿರಲಿಲ್ಲ. ಈ ಬಗ್ಗೆ ಹಿಂದೆ 'ವಿಜಯವಾಣಿ' ವಿಶೇಷ ವರದಿ ಪ್ರಕಟಿಸಿತ್ತು. ಬಳಿಕ ನಾಮ್​ಕೇವಾಸ್ತೆಗೆ ಎನ್ನುವಂತೆ ಸಂಘದ ನವೀಕರಣಕ್ಕೆ ಚುನಾವಣೆ ನಡೆಸುವುದಾಗಿ 2024ರ ನ.24ರಂದು ದಿನಾಂಕ ಘೋಷಣೆ ಮಾಡಲಾಯಿತು.

ಆದರೆ, ಶಿವಮೊಗ್ಗ ವಿಭಾಗಕ್ಕೆ ಮಾತ್ರವೇ ಚುನಾವಣೆ ನಡೆದು ಕಾರ್ಯಕಾರಿ ಸಮಿತಿ ಸದಸ್ಯರನ್ನು ಆಯ್ಕೆ ಮಾಡಲಾಗಿದೆ. ಉಳಿದಂತೆ ಬೆಂಗಳೂರು ನಗರ ವಿಭಾಗ ಸೇರಿ ಐದೂ ವಿಭಾಗಗಳಿಗೆ 8 ಕಾರ್ಯಕಾರಿ ಸಮಿತಿ ಸದಸ್ಯರು ಅವಿರೋಧವಾಗಿ ಆಯ್ಕೆಯಾಗಿದ್ದು, ಇವರಿಗೆ ವಿಭಾಗವಾರು ವರ್ಗಾವಣೆ ವಸೂಲಿ ಜವಾಬ್ದಾರಿ ಹಂಚಲಾಗಿದೆ.

ಯಾವ ಹುದ್ದೆಗೆ ಎಷ್ಟು ರೇಟ್?

• ಎಸ್​ಡಿಎ/ಎಫ್​ಡಿಎ- ವರ್ಷಕ್ಕೆ 2 ಲಕ್ಷ ರೂ.
• ಸೂಪರಿಂಟೆಂಡೆಂಟ್- ವರ್ಷಕ್ಕೆ 4 ಲಕ್ಷ ರೂ.
• ಡಿ ಗ್ರೂಪ್ ಗುಮಾಸ್ತ- 1 ಲಕ್ಷ ರೂ.

• ಅಸ್ತಿತ್ವದಲ್ಲೇ ಇಲ್ಲದ ಲಿಪಿಕ ಸಂಘಕ್ಕೆ ನಾಮ್​ಕೇವಾಸ್ತೆ ಎಲೆಕ್ಷನ್
• ಶಿವಮೊಗ್ಗದ ಒಬ್ಬರ ಬಿಟ್ಟು ಉಳಿದವರೆಲ್ಲ ಅವಿರೋಧ ಆಯ್ಕೆ
• ವಾರ್ಷಿಕ ಹಣ ಹೊಂದಿಸಲು ಹಲವು ಹಗರಣಗಳಲ್ಲಿ ಭಾಗಿ

ಕನಿಕರವಿಲ್ಲದೆ ಎತ್ತಂಗಡಿ

ನಿಗದಿಪಡಿಸಿರುವಷ್ಟು ಹಣ ಕೊಡಲು ನಿರಾಕರಿಸಿದರೆ ಮುಲಾಜಿಲ್ಲದೆ ಎತ್ತಂಗಡಿ ಮಾಡಲಾಗುತ್ತದೆ. ಹಣ ಕೊಟ್ಟು 6 ತಿಂಗಳು ಕಳೆಯುವಷ್ಟರಲ್ಲೇ ಮತ್ತೆ ಬೇಡಿಕೆ ಇಟ್ಟಿದ್ದಾರೆ. ಹಣ ಕೊಡಲು ನಿರಾಕರಿಸಿದ್ದಕ್ಕೆ ಬೀದರ್ ಕಚೇರಿಯಿಂದ ಒಬ್ಬರನ್ನು ಬೆಂಗಳೂರು ಪ್ರಧಾನ ಕಚೇರಿಗೆ, ಇನ್ನೊಬ್ಬರನ್ನು ಮೈಸೂರು ಕಚೇರಿಗೆ ವರ್ಗಾವಣೆ ಮಾಡಲಾಗಿದೆ. ಮತ್ತೊಬ್ಬರನ್ನು ಚಿಂತಾಮಣಿ ಕಚೇರಿಯಿಂದ ಚಿಕ್ಕಮಗಳೂರಿಗೆ ಡೆಪ್ಯುಟೇಷನ್ ಕಳುಹಿಸಲಾಗಿದೆ. ಇವರ ಸ್ವಂತ ಊರು ಚಿಕ್ಕಬಳ್ಳಾಪುರ. ಹೆಂಡತಿ- ಮಕ್ಕಳನ್ನು ಇಲ್ಲಿ ಬಿಟ್ಟು ದೂರದ ಚಿಕ್ಕಮಗಳೂರಿಗೆ ಹೋಗಿ ಕೆಲಸ ಮಾಡುವುದಾದರೂ ಹೇಗೆ ಎಂದು ಸಿಬ್ಬಂದಿ ಪ್ರಶ್ನಿಸಿದ್ದಾರೆ.

ದುಡ್ಡು ಕೊಡದಿದ್ದರೆ ವರ್ಗಾವಣೆ ಎಲ್ಲಿಗೆ?

• ದೂರದ ಊರಿಗೋ, ಆದಾಯವಿಲ್ಲದ ಕಚೇರಿಗೋ ವರ್ಗಾವಣೆ
• ಬೆಂಗಳೂರಿನಲ್ಲಿರುವ ಸಾರಿಗೆ ಆಯುಕ್ತರ ಪ್ರಧಾನ ಕಚೇರಿ
• ಕರ್ನಾಟಕ ರಾಜ್ಯ ಸಾರಿಗೆ ಪ್ರಾಧಿಕಾರ ಕಚೇರಿ (ಕೆಎಸ್​ಟಿಎ)
• ರಸ್ತೆ ಸುರಕ್ಷತಾ ಪ್ರಾಧಿಕಾರ
• ಜಂಟಿ ಸಾರಿಗೆ ಆಯುಕ್ತರ ಕಚೇರಿಗಳು
• ಮಡಿಕೇರಿ, ರಾಮದುರ್ಗ, ಶಿರಸಿ, ದಾಂಡೇಲಿಯಂತಹ ಕಚೇರಿಗಳು
• ಯಾರೂ ಹೋಗಲೊಪ್ಪದೆ ಖಾಲಿ ಉಳಿದಿರುವ ಕಚೇರಿಗಳು
• ಹಣ ಯಾಕೆ ಕೊಡಬೇಕು?
• ಅಧೀಕ್ಷಕರು, ಎಸ್​ಡಿಎ, ಎಫ್​ಡಿಎ ಸಿಬ್ಬಂದಿ ಕ್ಲರಿಕಲ್ ವಿಭಾಗದಲ್ಲಿ ಬರುತ್ತಾರೆ.
• ಪ್ರತಿಯೊಂದು ಹುದ್ದೆಗೂ ಇಂತಿಷ್ಟು ಹಣ ಎಂದು ‘ಸಿಂಡಿಕೇಟ್ ವ್ಯವಸ್ಥೆ’ ನಿಗದಿ
• ಬಡ್ತಿ, ವರ್ಗಾವಣೆ, ಡೆಪ್ಯುಟೇಷನ್, ಹೆಚ್ಚುವರಿ ಹೊಣೆ, ಇದ್ದಲ್ಲೇ ಇರಲು ಹಣ
• ಹಣ ಕೊಟ್ಟರೆ ಒಂದಕ್ಕಿಂತ ಹೆಚ್ಚು ಹುದ್ದೆಗಳ ಜವಾಬ್ದಾರಿಯನ್ನೂ ಕೊಡಲಾಗುತ್ತೆ.

ಕೆಲಸ ಕೊಡದೆ ಕೂರಿಸ್ತಾರೆ...

ಹಣ ಕೊಡಲು ನಿರಾಕರಿಸಿದರೆ ತಕ್ಷಣ ಬೇರೆಡೆಗೆ ವರ್ಗಾವಣೆ ಮಾಡಲಾಗುತ್ತದೆ. ಅದರ ಜತೆಗೆ ನಿರ್ದಿಷ್ಟ ಸಿಬ್ಬಂದಿಗೆ ಯಾವುದೇ ಡ್ಯೂಟಿ ಕೊಡದಂತೆ ಕಚೇರಿ ಅಧಿಕಾರಿಗಳಿಗೆ ಕರೆ ಮಾಡಿ ತಿಳಿಸಲಾಗುತ್ತದೆ. ಸಿಬ್ಬಂದಿ ಕಚೇರಿಗೆ ಬಂದರೂ ಯಾವುದೇ ಸೆಕ್ಷನ್​ನಲ್ಲಿ ಕೆಲಸ ಮಾಡದೆ ಸುಮ್ಮನೆ ಕುಳಿತು ಮನೆಗೆ ಹೋಗುವಂತೆ ಮಾನಸಿಕ ಕಿರುಕುಳ ಕೊಡಲಾಗುತ್ತದೆ ಎಂದು ಸಿಬ್ಬಂದಿ ಬೇಸರ ವ್ಯಕ್ತಪಡಿಸಿದ್ದಾರೆ.

https://www.vijayavani.net/skeleton-flower-turns-transparent