ಅವಿನಾಶ್ ಜೈನಹಳ್ಳಿ ಮೈಸೂರು
‘ಶ್ರೀ ಚಾಮುಂಡೇಶ್ವರಿ ತಾಯಿಯನ್ನು ಹೊರುವುದಕ್ಕೆ ಹುಟ್ಟಿದ್ದೇನೆ ಎನ್ನುವುದು ಅಭಿಮನ್ಯುವಿನ ನಂಬಿಕೆ, ಭಕ್ತಿ. ಇದೇ ಉದ್ದೇಶಕ್ಕೆ ತನ್ನನ್ನು ಮೈಸೂರಿಗೆ ಕರೆ ತಂದಿದ್ದಾರೆ ಎಂದು ಸಿದ್ಧನಾಗಿರುತ್ತಾನೆ. ಬಣ್ಣ ಬಳಿದು, ಸಿಂಗಾರಿಸಿದಾಗಂತೂ ಆತನ ಖುಷಿ ಹೇಳತೀರದು. ಹಾಗಾಗಿ ವಿಶ್ವವಿಖ್ಯಾತ ಜಂಬೂ ಸವಾರಿ ಮೆರವಣಿಗೆಯಲ್ಲಿ ನಮ್ಮ ಅಭಿಮನ್ಯು ಸತತ 5ನೇ ಬಾರಿಗೆ ಅಂಬಾರಿ ಹೊತ್ತು ಗಾಂಭೀರ್ಯದಿಂದ ಹೆಜ್ಜೆ ಹಾಕಿ ಎಲ್ಲರ ನಂಬಿಕೆ ಉಳಿಸಿಕೊಂಡ.
‘ಈ ಬಾರಿಯೂ ಕತ್ತಲೆ ಕವಿದು ದೀಪಾಲಂಕಾರಗಳ ಮಧ್ಯೆಯೇ ನಮ್ಮ ಅಭಿಮನ್ಯು ತನ್ನ ಸಾಮರ್ಥ್ಯ ತೋರಿಸುವಲ್ಲಿ ಯಶಸ್ವಿಯಾದ. ಯಾವುದೇ ಭಯ, ಸಂಕೋಚ, ಕೋಪಕ್ಕೆ ಒಳಗಾಗದೆ ಶಾಂತ ಸ್ವರೂಪಿಯಾಗಿ ಅಂಬಾರಿಯನ್ನು ಹೊತ್ತು ಸಾಗಿದ. ಚಾಮುಂಡೇಶ್ವರಿ ತಾಯಿ ಮೇಲೆ ಅಭಿಮನ್ಯುವಿಗೆ ಇರುವ ನಂಬಿಕೆ, ತಾಯಿಯ ಆಶೀರ್ವಾದದಿಂದ ಜಂಬೂ ಸವಾರಿ ಮೆರವಣಿಗೆ ಯಶಸ್ವಿಯಾಗಿ ನಡೆಯಿತು…’
ದಸರಾ ಮಹೋತ್ಸವದ ಜಂಬೂ ಸವಾರಿ ಮೆರವಣಿಗೆಯನ್ನು ಯಶಸ್ವಿಯಾಗಿ ಪೂರೈಸಿದ ಅಂಬಾರಿ ಆನೆ ಕ್ಯಾಪ್ಟನ್ ಅಭಿಮನ್ಯುವಿನ ಮಾವುತ ವಸಂತ ‘ವಿಜಯವಾಣಿ’ ಜತೆ ತಮ್ಮ ಖುಷಿ ಹಂಚಿಕೊಂಡ ಪರಿ ಇದು.
ನಾಡಹಬ್ಬ ದಸರಾ ಮಹೋತ್ಸವದ ಪ್ರಮುಖ ಆಕರ್ಷಣೆಯಾದ ಜಂಬೂಸವಾರಿಯನ್ನು ಯಶಸ್ವಿಯಾಗಿ ಮುಗಿಸಿದ ಕ್ಯಾಪ್ಟನ್ ಅಭಿಮನ್ಯು ಭಾನುವಾರ ಅರಮನೆ ಅಂಗಳದಲ್ಲಿ ರಿಲ್ಯಾಕ್ಸ್ ಮೂಡ್ಗೆ ಜಾರಿದ್ದ. ಬೆಳಗ್ಗೆಯೇ ಸ್ನಾನ ಮಾಡಿ, ಬೆಲ್ಲ, ಕುಸುರೆ, ಸೊಪ್ಪು, ಬೇಯಿಸಿದ ಧಾನ್ಯ ತಿಂದು ತನಗಾಗಿಯೇ ನಿರ್ಮಿಸಿರುವ ಶೆಡ್ನಲ್ಲಿ ವಿಶ್ರಾಂತಿ ಪಡೆಯುತ್ತಿದ್ದ. ಅಭಿಮನ್ಯು ಆನೆಯನ್ನು ಅರಮನೆ ಅಂಗಳದಿಂದ ಸೋಮವಾರದಂದು ಮತ್ತೆ ತಮ್ಮ ಮತ್ತಿಗೋಡು ಆನೆ ಶಿಬಿರಕ್ಕೆ ಕರೆದೋಗಲು ವಸಂತ್ ಸಿದ್ಧತೆ ಮಾಡಿಕೊಳ್ಳುತ್ತಿದ್ದರು. ಈ ವೇಳೆ ಜಂಬೂಸವಾರಿಯ ಯಶಸ್ಸಿನ ಸಂಭ್ರಮ ಹಂಚಿಕೊಂಡರು.
‘ನಮ್ಮ ಅಭಿಮನ್ಯು ದೇವರ ಕೆಲಸ ಮಾಡಲು ಸದಾ ಮುಂದಿರುತ್ತಾನೆ. ನಾಡ ದೇವತೆ ಶ್ರೀ ಚಾಮುಂಡೇಶ್ವರಿ ತಾಯಿ ಕಂಡರೆ ಹೆಚ್ಚು ಭಕ್ತಿ ಇದೆ. ಅಭಿಮನ್ಯು ಜಂಬೂಸವಾರಿ ಹೊರುವ ಮೂಲಕ ದೇವರ ಕೆಲಸ ಮಾಡಿದ್ದಾನೆ. ನಾನು ಅವನ ಸಾರಥಿಯಾಗಿದ್ದು ಕೂಡ ದೇವರ ಕೆಲಸ. ಇಂತಹ ಕೆಲಸ ನನಗೆ ಸಿಕ್ಕಿರುವುದೇ ಪುಣ್ಯ’ ಎಂದು ಹೇಳಿದ ವಸಂತ್ ಆನಂದಭಾಷ್ಪ ಸುರಿಸಿದರು.
‘ಲಕ್ಷಾಂತರ ಜನರು ನೆರೆದಿರುವ ಜಾಗದಲ್ಲಿ ಅಂಬಾರಿ ಹೊತ್ತ ಆನೆಯನ್ನು ಮುನ್ನಡೆಸುವುದು ಸಣ್ಣ ಕೆಲಸವಲ್ಲ. ಇದು ಆನೆ ಅಥವಾ ಹುಲಿ ಓಡಿಸುವಷ್ಟು ಸುಲಭದ ಕೆಲಸವೂ ಅಲ್ಲ. ಹಾಗಾಗಿ ದೇವರು, ಜನರ ಆಶೀರ್ವಾದದಿಂದ ಜಂಬೂಸವಾರಿ ಮೆರವಣಿಗೆ ಯಶಸ್ವಿಯಾಗಿ ಮುಗಿದಿದೆ’ ಎಂದು ವಸಂತ ಧನ್ಯಭಾವ ವ್ಯಕ್ತಪಡಿಸಿದರು.
