ಕೊಪ್ಪಳ: ಕಲ್ಯಾಣ ಕರ್ನಾಟಕ ಭಾಗದ ಕೊಪ್ಪಳದಲ್ಲಿ ಮುಖ್ಯಮಂತ್ರಿ ಬಸವರಾಜ ಬೊಮ್ಮಾಯಿ ಅವರು ನಗಾರಿ ಬಾರಿಸಿ, ಕಹಳೆ ಊದುವ ಮೂಲಕ ಜನ ಸ್ವರಾಜ್ ಯಾತ್ರೆಗೆ ಚಾಲನೆ ನೀಡಿದರು. ಕೊಪ್ಪಳದೊಂದಿಗಿನ ತಮ್ಮ ಬಾಂಧವ್ಯ ವಿವರಿಸುತ್ತಲೇ ಮಾತಿಗಿಳಿದ ಬೊಮ್ಮಾಯಿ, ಬಿಎಸ್ವೈ ಹೈದರಾಬಾದ್ ಕರ್ನಾಟಕವನ್ನು ಕಲ್ಯಾಣ ಕರ್ನಾಟವೆಂದು ನಾಮಕರಣ ಮಾಡಿದ್ದಾರೆ. ನಾನು ಕಕ ಮಂಡಳಿಗೆ ವಾರ್ಷಿಕ 3,000 ಕೋಟಿ ರೂ. ಅನುದಾನ ನೀಡಲು ವಾಗ್ದಾನ ಮಾಡಿರುವೆ ಎಂದರು. ಅಮೃತ ಯೋಜನೆಯಡಿ ರಾಜ್ಯದ 750 ಗ್ರಾಪಂಗಳ ಅಭಿವೃದ್ಧಿ ಮಾಡಲಾಗುತ್ತಿದೆ. ಯೋಜನೆ ಯಶಸ್ವಿಯಾದಲ್ಲಿ ಬರುವ ವರ್ಷ 1,600 ಗ್ರಾಪಂಗಳಿಗೆ ವಿಸ್ತರಣೆಯಾಗಲಿದೆ. ಕಳೆದ 4 ವರ್ಷದಿಂದ ವಸತಿ ಯೋಜನೆ ಸ್ಥಗಿತವಾಗಿದೆ. ಹೀಗಾಗಿ ಗ್ರಾಮೀಣ ಭಾಗಕ್ಕೆ 4 ಲಕ್ಷ ಹಾಗೂ ನಗರ ಪ್ರದೇಶಕ್ಕೆ 5 ಲಕ್ಷ ಮನೆ ಮಂಜೂರು ಮಾಡಿದ್ದು, ಶೀಘ್ರ ಫಲಾನುಭವಿಗಳ ಆಯ್ಕೆ ಪ್ರಕ್ರಿಯೆ ನಡೆಯಲಿದೆ. ಗ್ರಾಪಂ ಬಲಪಡಿಸಿದ್ದು ಬಿಜೆಪಿ. ಅತಿಹೆಚ್ಚು ಅನುದಾನ, ಅಧಿಕಾರ ನೀಡಿದ್ದು ಪ್ರಧಾನಿ ನರೇಂದ್ರ ಮೋದಿ. ಸ್ಥಳೀಯ ಸಂಸ್ಥೆಗಳು ಉಳಿಯಲು, ಅಭಿವೃದ್ಧಿ ಹೊಂದಲು ಪರಿಷತ್ ಚುನಾವಣೆಯಲ್ಲಿ ಬಿಜೆಪಿ ಬೆಂಬಲಿಸಿ ಎಂದು ಗ್ರಾಪಂ, ನಗರ-ಸ್ಥಳೀಯ ಸಂಸ್ಥೆ ಜನಪ್ರತಿನಿಧಿಗಳಲ್ಲಿ ಸಿಎಂ ಮನವಿ ಮಾಡಿದರು.
