ಕರೊನಾ ಸೋಂಕಿನ ತೀವ್ರತೆ, ಅದನ್ನು ನಿಯಂತ್ರಿಸುವ ಉದ್ದೇಶದಿಂದ ವಿಧಿಸಲಾದ ಲಾಕ್ಡೌನ್, ಆ ಬಳಿಕವೂ ಮುಂದುವರಿದ ಕೆಲ ನಿರ್ಬಂಧಗಳ ಪರಿಣಾಮ ಉದ್ಯಮವಲಯ ನೆಲಕಚ್ಚಿದ್ದು ಗೊತ್ತಿರುವ ಸಂಗತಿ. ಇದು ಆರ್ಥಿಕ ನಷ್ಟವನ್ನಷ್ಟೇ ಉಂಟು ಮಾಡಲಿಲ್ಲ. ನವೋದ್ಯಮಿಗಳಾಗಲು ಹೊರಟವರ, ಹೊಸ ಉದ್ಯಮಗಳ ಸ್ಥಾಪನೆಗೆ ಮುಂದಡಿ ಇಡುತ್ತಿದ್ದ ಅದೆಷ್ಟೋ ಯುವಕರ ಕನಸುಗಳನ್ನೇ ಕಿತ್ತುಕೊಂಡಿತು. ಹಲವು ಕಂಪನಿ, ಕೈಗಾರಿಕೆಗಳು ಮುಚ್ಚಿದ ಫಲವಾಗಿ, ಕೆಲಸ ಕಳೆದುಕೊಳ್ಳುವವರ ಸಂಖ್ಯೆಯೂ ಹೆಚ್ಚಿತು. ಹಾಗಾಗಿ, ಹೊಸ ಉದ್ಯಮಗಳ ಸ್ಥಾಪನೆಗೆ ಹಿನ್ನಡೆಯಾದರೆ, ಬಂಡವಾಳ ಹೂಡಿಕೆಯ ಮೇಲೂ ವ್ಯತಿರಿಕ್ತ ಪರಿಣಾಮ. ಸರ್ಕಾರದ ಯೋಜನೆಗಳು, ಹಲವು ಕಾರ್ಯಕ್ರಮಗಳು ಏರುಪೇರಾದವು. ಆರ್ಥಿಕ ಚಟುವಟಿಕೆಗಳು ಕ್ರಮೇಣ ಚೇತರಿಕೆ ಕಾಣುತ್ತಿರುವುದು ಸಮಾಧಾನಕರ ಅಂಶವಾದರೂ, ಔದ್ಯೋಗಿಕ ರಂಗ ಹಳಿಗೆ ಬರಲು ಇನ್ನಷ್ಟು ಕಾಲಾವಕಾಶದ ಜತೆಗೆ ವಿಶೇಷ ಪ್ರಯತ್ನಗಳೂ ಬೇಕು.
