ಇದು ಕಾರಣ ಕೂಡಲಸಂಗಮದೆವಾ ಲಿಂಗಸ್ಥಲವನರಿದವನೇ ಕುಲಜನು! ಎಂಬುದಾಗಿ ನಿಜವಾದ ಕುಲಜನೆಂದರೆ ಅವರು ಭಕ್ತರಾಗಿರಬೇಕು, ಲಿಂಗಧಾರಿಯಾಗಿರಬೇಕು ಎಂದರು. ವಚನ ಆಂದೋಲನವು ಧಾರ್ವಿುಕ ಮೌಲ್ಯಗಳ ಪುನರ್ ವ್ಯಾಖ್ಯಾನ ನೀಡಿ ಸಾಮಾಜಿಕ ದೃಷ್ಟಿಕೋನವನ್ನು ಬದಲಾಯಿಸಿತು. ‘ಕಾಯಕವೇ ಕೈಲಾಸ’ ಎಂಬ ಮಾತು ಪ್ರತಿ ಕಾಯಕಕ್ಕೂ ತನ್ನದೇ ಆದ ಮಹತ್ವವಿದೆ, ಘನತೆ ಇದೆ ಎಂದು ಸಾರಿತು. ದೇವರನ್ನು ಶುದ್ಧ ಮನಸ್ಸಿನಿಂದ ಪ್ರೀತಿಸುವುದು ಹಾಗೂ ದುಡಿಯುವುದು ಧರ್ಮವೆಂದು ಸಾರಿದವರು ಬಸವಣ್ಣ. ದೇವರ ಹೆಸರಿನಲ್ಲಿ ಪ್ರಾಣಿಬಲಿ, ಮೌಢ್ಯಗಳ ಆಚರಣೆಗಳನ್ನು ಖಂಡಿಸಿ ಅರಿವೇ ಗುರುವೆಂದು ಸಾರಿದರು. ಮಡಕೆ ದೈವ, ಮೊರ ದೈವ, ಬೀದಿಯ ಕಲ್ಲು ದೈವ, ಹಣಿಗೆ ದೈವ, ಬಿಲ್ಲನಾರಿ ದೈವ, ಕಾಣಿರೊ! ಕೊಳಗ ದೈವ, ಗಿಣ್ಣಿಲು ದೈವ, ಕಾಣಿರೊ! ದೈವ ದೈವವೆಂದು ಕಾಲಿಡಲಿಂಬಿಲ್ಲ, ದೈವನೊಬ್ಬನೆ ಕೂಡಲಸಂಗಮದೇವ. ದೇವರ ಹೆಸರಲ್ಲಿ ನಡೆಯುತ್ತಿದ್ದ ಕಂದಾಚಾರವನ್ನು ತಿರಸ್ಕರಿಸಿದ ಬಸವಣ್ಣನವರು ದೇವರನ್ನು ಒಪ್ಪಿದ್ದರು. ನೈತಿಕತೆಯ ಆಧಾರಿತ ಧರ್ಮಕ್ಕೆ ಅವರು ಬುನಾದಿ ಹಾಕಿದರು. ಆದುದರಿಂದಲೇ ಅವರು ಎಲ್ಲ ಕಾಲಕ್ಕೂ ಯುಗದ ಉತ್ಸಾಹವಾಗಿದ್ದಾರೆ.
