ಇಸ್ರೇಲ್-ಹಮಾಸ್ ಯುದ್ಧ: 'ನಾನು ಇಲ್ಲೇ ಹುಟ್ಟಿದ್ದೀನಿ, ಇಲ್ಲಿಯೇ ಸಾಯುತ್ತೇನೆ': ಇಸ್ರೇಲ್​​​​ನ ಈ ನಿರ್ಧಾರಕ್ಕೆ ಯುವಕನ ಪ್ರತಿಕ್ರಿಯೆ

ಇಸ್ರೇಲ್: ಇಸ್ರೇಲ್ ಹಮಾಸ್ ಯುದ್ಧದ ಮಧ್ಯೆ, ಇಸ್ರೇಲ್ ರಕ್ಷಣಾ ಪಡೆ ಉತ್ತರ ಗಾಜಾದಲ್ಲಿ ವಾಸಿಸುವ ಜನರಿಗೆ 24 ಗಂಟೆಗಳ ಒಳಗೆ ಪ್ರದೇಶವನ್ನು ಖಾಲಿ ಮಾಡಿ ದಕ್ಷಿಣದ ಕಡೆಗೆ ಚಲಿಸುವಂತೆ ಸಲಹೆ ನೀಡಿತು. ವಿಶ್ವಸಂಸ್ಥೆಯ ಪ್ರಕಾರ, ಇಸ್ರೇಲ್‌ನ ಈ ನಿರ್ಧಾರವು ಉತ್ತರ ಗಾಜಾದ 11 ಲಕ್ಷ ಜನರ ಮೇಲೆ ಪರಿಣಾಮ ಬೀರುತ್ತದೆ, ಇದು ಇಡೀ ಗಾಜಾ ಪಟ್ಟಿಯ ಅರ್ಧದಷ್ಟು ಜನಸಂಖ್ಯೆಯಾಗಿದೆ.

ಸುದ್ದಿ ಸಂಸ್ಥೆ AFP ಪ್ರಕಾರ, ಶುಕ್ರವಾರ ಮಧ್ಯಾಹ್ನ (ಅಕ್ಟೋಬರ್ 13), ಉತ್ತರ ಗಾಜಾದಲ್ಲಿ ಅಂತಹ ದೊಡ್ಡ ಪ್ರಮಾಣದ ನಿರ್ಗಮನದ ಯಾವುದೇ ಸುದ್ದಿ ಇಲ್ಲ. AFP ಗಾಜಾದಲ್ಲಿ ವಾಸಿಸುವ ಮೊಹಮ್ಮದ್ ಎಂಬ ನಾಗರಿಕನೊಂದಿಗೆ ಮಾತನಾಡಿದೆ. ಆಗ 'ಬೇರೆ ಕಡೆ ಹೋಗುವುದಕ್ಕಿಂತ ಸಾಯುವುದೇ ಮೇಲು’ ಎಂದು ಮೊಹಮ್ಮದ್ ಹೇಳಿದರು. 'ನಾನು ಇಲ್ಲಿಯೇ ಹುಟ್ಟಿದ್ದೇನೆ, ಇಲ್ಲಿಯೇ ಸಾಯುತ್ತೇನೆ. ಗಾಜಾವನ್ನು ತೊರೆಯುವುದು ನನಗೆ ಅವಮಾನವಾಗಿದೆ' ಎಂದು ಅವರು ಹೇಳಿದರು.

ಗಾಜಾದಲ್ಲಿ ಜನರ ಸ್ಥಳಾಂತರಕ್ಕೆ ಅಮೆರಿಕದ ನಿಲುವು?
ಶ್ವೇತಭವನದ ರಾಷ್ಟ್ರೀಯ ಭದ್ರತಾ ವಕ್ತಾರ ಜಾನ್ ಕಿರ್ಬಿ, ಇಷ್ಟು ದೊಡ್ಡ ಸಂಖ್ಯೆಯ ಜನರನ್ನು ಸ್ಥಳಾಂತರಿಸುವುದು ಸಂಕೀರ್ಣ ಆದೇಶವಾಗಿದೆ. ಆದರೆ ಅಮೆರಿಕವು ತನ್ನ ಮಿತ್ರರಾಷ್ಟ್ರದ ನಿರ್ಧಾರವನ್ನು ಅನುಮಾನಿಸುವುದಿಲ್ಲ ಎಂದು ಹೇಳಿದರು. UN ನೆರವು ಮುಖ್ಯಸ್ಥ ಮಾರ್ಟಿನ್ ಗ್ರಿಫಿತ್ಸ್ ಎಕ್ಸ್​​​​​ ಪೋಸ್ಟ್​​​​ನಲ್ಲಿ "ನಾಗರಿಕರನ್ನು ಗಾಜಾದಲ್ಲಿ ಮೂಲೆಗುಂಪು ಮಾಡಲಾಗುತ್ತಿದೆ. 24 ಗಂಟೆಗಳಿಗಿಂತ ಕಡಿಮೆ ಅವಧಿಯಲ್ಲಿ 1.1 ಮಿಲಿಯನ್ ಜನರನ್ನು ಹೇಗೆ ಸ್ಥಳಾಂತರಿಸಬಹುದು?" ಎಂದು ಬರೆದುಕೊಂಡಿದ್ದಾರೆ.

ಇಸ್ರೇಲ್‌ನ 'ಆದೇಶ' ಏನು?
ಹಮಾಸ್ ನಾಗರಿಕ ಕಟ್ಟಡಗಳಲ್ಲಿ ಅಡಗಿಕೊಂಡಿದೆ ಎಂದು ಇಸ್ರೇಲ್​​​​​ ಸೇನೆ ಆರೋಪಿಸಿದೆ. "ಗಾಜಾ ನಗರದ ನಾಗರಿಕರೇ, ನಿಮ್ಮ ಮತ್ತು ನಿಮ್ಮ ಕುಟುಂಬಗಳ ಸುರಕ್ಷತೆಗಾಗಿ, ಉತ್ತರ ಪ್ರದೇಶವನ್ನು ಸ್ಥಳಾಂತರಿಸಿ ಮತ್ತು ನಿಮ್ಮನ್ನು ಗುರಾಣಿಯಾಗಿ ಬಳಸುತ್ತಿರುವ ಹಮಾಸ್ ಭಯೋತ್ಪಾದಕರಿಂದ ದೂರವಿರಿ" ಎಂದು ಸೇನೆ ಹೇಳಿದೆ.

https://www.vijayavani.net/indians-back-from-israel-recount-horror