ಕಳೆದು ಹೋದ ವ್ಯಾಲೆಟ್ ಮರಳಿಸಿದ ಭಾರತೀಯ ಯುವಕನ ಪ್ರಾಮಾಣಿಕತೆ ಕಂಡು ಭಾವುಕಳಾದ ವಿದೇಶಿ ಮಹಿಳೆ

Published on:

26 Feb 2023, 7:15 am

ನವದೆಹಲಿ: ಭಾರತ ಪ್ರವಾಸಕ್ಕೆ ಬಂದಿದ್ದ ವಿದೇಶಿ ಮಹಿಳೆಯೊಬ್ಬಳು ರೈಲಿನಲ್ಲಿ ಕಳೆದುಕೊಂಡಿದ್ದ ತನ್ನ ಪ್ರಮುಖ ವಸ್ತುಗಳನ್ನು ಮರಳಿ ಪಡೆದಾಗ ಭಾವುಕರಾದರು. ಇದಕ್ಕೆ ಸಂಬಂಧಿಸಿದ ವಿಡಿಯೋವೊಂದು ಸಾಮಾಜಿಕ ಜಾಲತಾಣದಲ್ಲಿ ವೈರಲ್ ಆಗಿದ್ದು ನೆಟ್ಟಿಗರ ಮೆಚ್ಚುಗೆಗೆ ಪಾತ್ರವಾಗಿದೆ.

ಅಮೆರಿಕ ಮೂಲದ ಮಹಿಳೆ ರೈಲಿನಿಂದ ಕೆಳಗೆ ಇಳಿಯುವಾಗ ತನ್ನ ವ್ಯಾಲೆಟ್ ಅನ್ನು ಮರೆತಿದ್ದರು. ಬಳಿಕ ಚಿರಾಗ್ ಎಂಬಾತ ಇನ್ಸ್ಟಾಗ್ರಾಂನಲ್ಲಿ ವಿದೇಶಿ ಮಹಿಳೆಯನ್ನು ಸಂಪರ್ಕಿಸಿ, ನಿಮ್ಮ ವಸ್ತುಗಳು ನಮ್ಮ ಬಳಿ ಇವೆ ಎಂದು ಹೇಳಿ ಮತ್ತೆ ಆಕೆಗೆ ವಸ್ತುಗಳನ್ನು ತಲುಪಿಸಿದ್ದಾರೆ. ಈ ಘಟನೆ ಗುಜರಾತಿನ ಭುಜ್ ಎಂಬಲ್ಲಿ ನಡೆದಿದೆ.

ಇದನ್ನೂ ಓದಿ: ಪುರುಷರು-ಮಹಿಳೆಯರು ಇಬ್ಬರಲ್ಲಿ ಯಾರು ಹೆಚ್ಚು ಮೋಸ ಮಾಡ್ತಾರೆ? ಯುವಕ ಕೊಟ್ಟ ಉತ್ತರ ಸಿಕ್ಕಾಪಟ್ಟೆ ವೈರಲ್

ಚಿರಾಗ್ ಬಳಿ ಕಳೆದು ಹೋದ ವಸ್ತುಗಳನ್ನು ಪಡೆದ ವಿದೇಶಿ ಮಹಿಳೆ ಭಾವುಕರಾದರು. ಚಿರಾಗ್ಗೆ ಧನ್ಯವಾದ ತಿಳಿಸಿದ ಮಹಿಳೆ, ಆತನಿಗೆ ಹಣವನ್ನು ನೀಡಲು ಮುಂದಾದರು. ಆದರೆ, ಚಿರಾಗ್ ಮಾತ್ರ ಹಣ ಪಡೆಯಲಿಲ್ಲ. ಇದಕ್ಕೆ ಸಂಬಂಧಿಸಿದ ವಿಡಿಯೋವನ್ನು @stephandpete ಹೆಸರಿನ ಇನ್ಸ್ಟಾಗ್ರಾಂ ಪೇಜ್ನಲ್ಲಿ ಪೋಸ್ಟ್ ಮಾಡಲಾಗಿದ್ದು, 50 ಸಾವಿರಕ್ಕೂ ಅಧಿಕ ಲೈಕ್ ಬಂದಿವೆ.

ನೀವು ವಾಲೆಟ್ ಅನ್ನು ಮರಳಿ ಪಡೆದಿದ್ದು ಸಂತೋಷವಾಗಿದೆ. ಚಿರಾಗ್ನಂತಹ ವ್ಯಕ್ತಿಯ ಮೇಲೆ ನನಗೆ ಹೆಮ್ಮೆ ಇದೆ. ನೀವು ಭಾರತದಲ್ಲಿ ಉತ್ತಮ ವಾಸ್ತವ್ಯವನ್ನು ಹೊಂದಿದ್ದೇನೆಂದು ಭಾವಿಸಿದ್ದೇನೆ. ನಿಮ್ಮ ಮೇಲೆ ತುಂಬಾ ಪ್ರೀತಿ ಇದೆ ಎಂದು ವಿಡಿಯೋಗೆ ನೆಟ್ಟಿಗರೊಬ್ಬರು ಕಾಮೆಂಟ್ ಮಾಡಿದ್ದಾರೆ. ಚಿರಾಗ್ನಂತಹ ವ್ಯಕ್ತಿಗಳು ಭಾರತೀಯ ಪ್ರವಾಸೋದ್ಯಮದ ನಿಜವಾದ ರಾಯಭಾರಿಯಾಗಿದ್ದಾರೆ. ಸರಿಯಾದ ಇಂಗ್ಲಿಷ್ ಗೊತ್ತಿಲ್ಲದಿದ್ದರೂ ಮಹಿಳೆಯ ಹೆಸರನ್ನು ಸರಿಯಾಗಿ ಬರೆದು ಕಳೆದುಹೋಗಿದ್ದ ವಸ್ತುಗಳನ್ನು ಮರಳಿಸಿರುವುದು ನಿಜಕ್ಕೂ ಶ್ರೇಷ್ಠ ಸಂಗತಿ ಎಂದು ಮತ್ತೊಬ್ಬ ನೆಟ್ಟಿಗ ಕಾಮೆಂಟ್ ಮಾಡಿದ್ದು, ಚಿರಾಗ್ಗೆ ಸಾಕಷ್ಟು ಮೆಚ್ಚುಗೆಗಳು ವ್ಯಕ್ತವಾಗುತ್ತಿವೆ. (ಏಜೆನ್ಸೀಸ್)