ಸಿಎಂ ಬಿಯಾಂಡ್​ ಬೆಂಗಳೂರು ಕಾಯಕಲ್ಪಕ್ಕೆ ಮೊದಲ ಹೆಜ್ಜೆ

ಕರ್ನಾಟಕದ ಆರ್ಥಿಕ ಸಾಧನೆಗೆ ಬೆಂಗಳೂರಿನ ಮೇಲೆ ಪೂರ್ತಿಯಾಗಿ ಅವಲಂಬಿಸುವ ಸಾಂಪ್ರದಾಯಿಕ ನಂಬಿಕೆಯಿಂದ ಹೊರಗೆ ಬಂದು, ಬಲಿಷ್ಠ ಪ್ರಾದೇಶಿಕ ನಗರಗಳ ಜಾಲವನ್ನು ಸೃಷ್ಟಿಸುವ ಜತೆಗೆ ಪ್ರತಿ ನಗರವೂ ತನ್ನ ಸ್ವಂತ ಸಾಮರ್ಥ್ಯದ ಮೇಲೆ ಪ್ರಗತಿ ಕಾಣಬೇಕು ಮತ್ತು ಪ್ರತಿ ನಗರದ ಅಭಿವೃದ್ಧಿ ಪರಸ್ಪರ ಪೂರಕವಾಗಿ ಸಮಗ್ರ ಕರ್ನಾಟಕದ ಪಾಲಿಗೆ ಪ್ರಾದೇಶಿಕ ಬೆಳವಣಿಗೆ ಮಾದರಿಯಾಗಿ ರೂಪುಗೊಳ್ಳಬೇಕು ಎನ್ನುವುದು ಮುಖ್ಯಮಂತ್ರಿ ಡಿ.ಕೆ. ಶಿವಕುಮಾರ್​ ಅವರ ಸ್ಪಷ್ಟ ನಿಲುವಾಗಿದೆ.

ಈ ನಿಲುವನ್ನು ಅವರು ತಮ್ಮ ಸ್ವಾತಂತ್ರ್ಯೋತ್ಸವದ ಭಾಷಣದಲ್ಲಿ ಮತ್ತು ಸರ್ಕಾರ ನೂರು ದಿನಗಳನ್ನು ಪೂರೈಸಿದ ಸಂದರ್ಭದಲ್ಲಿ ನಾಡಿನ ಜನರಿಗೆ ನೀಡಿದ ಪವರ್​ಪಾಯಿಂಟ್​ ಪ್ರೆಸೆಂಟೇಷನ್​ ಭಾಷಣದಲ್ಲೂ ಉಲ್ಲೇಖಿಸಿದ್ದರು. ಬೆಂಗಳೂರಿನ ಆಚೆಗೂ ಅಭಿವೃದ್ಧಿಯ ರಹದಾರಿಯನ್ನು ಸೃಷ್ಟಿಸುವ ಕಾಯಕಲ್ಪಕ್ಕೆ ಮಂಗಳೂರಿನ ಸಚಿವ ಸಂಪುಟ ಸಭೆ ಮೊದಲ ದೃಢ ಹೆಜ್ಜೆಯನ್ನು ಇಟ್ಟಿದೆ ಅಂತಲೇ ಹೇಳಬಹುದು.

ಸಾಮಾಜಿಕ ನ್ಯಾಯ, ಭಾಷಾ ಗೌರವ, ಶಿಕ್ಷಣ, ಆರೋಗ್ಯ ಮತ್ತು ಪಂಚಾಯತ್​ ರಾಜ್​ ಕ್ಷೇತ್ರಗಳಿಗೆ ಸಂಬಂಧಿಸಿದಂತೆ ಹಲವು ಚಾರಿತ್ರಿಕ ನಿರ್ಧಾರಗಳನ್ನು ಸಂಪುಟ ಸಭೆ ಕೈಗೊಂಡಿದೆ. ಕರಾವಳಿಗೆ ಪ್ರತ್ಯೇಕ ಪ್ರವಾಸೋದ್ಯಮ ನೀತಿ ಬೇಕು ಎನ್ನುವ ಕೂಗು ಬಹಳ ಹಳೆಯದು. ಈ ನೀತಿ ಹೇಗಿರಬೇಕು ಎಂದು ಚರ್ಚಿಸಲು ವಿಧಾನಸೌಧದ ಸಮ್ಮೇಳನ ಸಭಾಂಗಣದಲ್ಲಿ ನಡೆದ ಮೊದಲ ಸಭೆಯಲ್ಲೇ "ಕರಾವಳಿ ಜತೆಗೆ ಮಲೆನಾಡನ್ನೂ ಸೇರಿಸಿ ಎರಡೂ ಪ್ರದೇಶಗಳ ಸಮಗ್ರ ಅಭಿವೃದ್ಧಿಗೆ ನೀತಿ ರೂಪಿಸೋಣ' ಎನ್ನುವ ತೀರ್ಮಾನ ಕೈಗೊಂಡಿದ್ದರು. ಈ ತೀರ್ಮಾನಕ್ಕೆ ಪೂರಕವಾಗಿ ಇಂದು ಸಚಿವ ಸಂಪುಟ ಸಭೆ ಹಲವು ಮಹತ್ವದ ನಿರ್ಧಾರಗಳನ್ನು ಕೈಗೊಂಡಿದೆ. ಪ್ರವಾಸೋದ್ಯಮ, ಮೂಲಸೌಕರ್ಯ, ಬಂದರು ಹಾಗೂ ಆರೋಗ್ಯ ಕ್ಷೇತ್ರಗಳಿಗೆ ಕೋಟ್ಯಂತರ ರೂಪಾಯಿ ಮೊತ್ತದ ಯೋಜನೆಗಳಿಗೆ ಅನುಮೋದನೆ ನೀಡಲಾಗಿದೆ.

ಇತ್ತೀಚೆಗೆ ಬಿಡುಗಡೆಯಾದ ಲೀಪ್​ ಸಿಟೀಸ್​ ಇಂಡೆಕ್ಸ್​ 2026ರ ಪ್ರಕಾರ ದೇಶದಾದ್ಯಂತ ಮೌಲ್ಯಮಾಪನ ಮಾಡಲಾದ 233 ಮೆಟ್ರೋಏತರ ನಗರಗಳ ಪೈಕಿ ಮಂಗಳೂರು 68.4ರ ಸಂಯೋಜಿತ ಅಂಕಗಳೊಂದಿಗೆ ಮೊದಲ ಸ್ಥಾನ ಪಡೆದಿದೆ. ಈ ಸೂಚ್ಯಂಕವು ನಗರ ಆರ್ಥಿಕ ಚಟುವಟಿಕೆಯ ಎಂಟು ಆಯಾಮಗಳನ್ನು ಅಳೆಯುತ್ತದೆ. ಅವುಗಳಲ್ಲಿ ಉತ್ಪಾದನೆ, ವ್ಯಾಪಾರ ಮತ್ತು ಆತಿಥ್ಯ ವಲಯ, ಸಾರಿಗೆ ಮತ್ತು ಲಾಜಿಸ್ಟಿಕ್ಸ್​, ಹಣಕಾಸು ಸೇವೆಗಳು, ನಿರ್ಮಾಣ ಮತ್ತು ಬಂಡವಾಳ ಸೃಷ್ಟಿ, ಆರೋಗ್ಯ, ಶಿಕ್ಷಣ ಹಾಗೂ ಜೀವನಮಟ್ಟ ಸೇರಿವೆ.

ಮಂಗಳೂರಿನ ಶಕ್ತಿ ಒಂದೇ ಒಂದು ಕ್ಷೇತ್ರಕ್ಕೆ ಸೀಮಿತವಾಗಿಲ್ಲ ಎನ್ನುವುದನ್ನು ಮನಗಂಡಿರುವ ಮುಖ್ಯಮಂತ್ರಿಗಳು ಇದಕ್ಕೆ ತಕ್ಕಂತೆ ಕರಾವಳಿಯ ಹಲವು ವಲಯಗಳಿಗೆ ಮತ್ತು ಕ್ಷೇತ್ರಗಳಿಗೆ ಚೈತನ್ಯ ತುಂಬುವ ತೀರ್ಮಾನಗಳನ್ನು ಸಚಿವ ಸಂಪುಟ ಸಭೆಯಲ್ಲಿ ತೆಗೆದುಕೊಂಡಿದ್ದಾರೆ.

ತುಳು ಭಾಷೆಗೆ ಸಿಕ್ಕಿತು ಅಧಿಕೃತ ಮಾನ್ಯತೆ: ಎರಡು ಸಾವಿರ ವರ್ಷಗಳ ಸುದೀರ್ಘ ಇತಿಹಾಸವಿರುವ ತುಳು ಭಾಷೆಯನ್ನು ಉಡುಪಿ ಮತ್ತು ದಕ್ಷಿಣ ಕನ್ನಡ ಜಿಲ್ಲೆಗಳಲ್ಲಿ ಸರ್ಕಾರಿ ಉದ್ದೇಶಗಳಿಗಾಗಿ "ಕರ್ನಾಟಕ ರಾಜ್ಯದ ಎರಡನೇ ಹೆಚ್ಚುವರಿ ಭಾಷೆ' ಎಂದು ಘೋಷಿಸಲು ಸಚಿವ ಸಂಪುಟ ಅನುಮೋದನೆ ನೀಡಿದೆ. ಜಿಲ್ಲಾಡಳಿತವನ್ನು ಅನುಷ್ಠಾನ ಕೇಂದ್ರವನ್ನಾಗಿ ಮಾಡಲಾಗುತ್ತಿದ್ದು, ಅನುವಾದ, ತರಬೇತಿ ಮತ್ತು ಭಾಷಾ ಬಳಕೆಗೆ ಪ್ರತಿ ವರ್ಷ 82 ಲಕ್ಷ ರೂ. ಅನುದಾನವನ್ನು ಒದಗಿಸಲಾಗಿದೆ.

ಕರಾವಳಿ ಮತ್ತು ಪ್ರವಾಸೋದ್ಯಮ ನೀತಿ 2026: ಕರಾವಳಿ ಮತ್ತು ಮಲೆನಾಡು ಭಾಗದಲ್ಲಿ ಪ್ರವಾಸೋದ್ಯಮವನ್ನು ಉತ್ತೇಜಿಸಲು "ಕರಾವಳಿ ಮಲೆನಾಡು ಕರ್ನಾಟಕ ಪ್ರವಾಸೋದ್ಯಮ ನೀತಿ 2026'ಕ್ಕೆ ಅನುಮೋದನೆ ನೀಡಲಾಗಿದ್ದು, ಇದನ್ನು 500 ಕೋಟಿ ರೂ. ವೆಚ್ಚದಲ್ಲಿ ಅನುಷ್ಠಾನಗೊಳಿಸಲಾಗುತ್ತಿದೆ. ಇದರ ಜತೆಗೆ ಕರಾವಳಿ ಪ್ರವಾಸೋದ್ಯಮ ದೂರಗಾಮಿ ಯೋಜನೆಗೂ (ಪರ್ಸ್ಪೆಕ್ಟಿವ್​ ಪ್ಲಾನ್​) ಒಪ್ಪಿಗೆ ನೀಡಲಾಗಿದೆ. ಮುಖ್ಯಮಂತ್ರಿಗಳ ಅಧ್ಯಕ್ಷತೆಯಲ್ಲಿ "ರಾಜ್ಯ ಪ್ರವಾಸೋದ್ಯಮ ಮಂಡಳಿ' ಸ್ಥಾಪನೆಯಾಗಲಿದ್ದು, ಹೂಡಿಕೆದಾರರಿಗೆ ಏಕಗವಾಕ್ಷಿ ವ್ಯವಸ್ಥೆ ಮತ್ತು ಪ್ರವಾಸೋದ್ಯಮಕ್ಕೆ ಕೈಗಾರಿಕಾ ಸ್ಥಾನಮಾನ ನೀಡಲು ತೀರ್ಮಾನಿಸಲಾಗಿದೆ.

ದ್ವೀಪಗಳ ಅಭಿವೃದ್ಧಿ ಹಾಗೂ ಪ್ರವಾಸಿ ಯೋಜನೆಗಳು: ದಕ್ಷಿಣ ಕನ್ನಡ, ಉಡುಪಿ ಮತ್ತು ಉತ್ತರ ಕನ್ನಡ ಜಿಲ್ಲೆಗಳ 12 ದ್ವೀಪಗಳನ್ನು ಪಿಪಿಪಿ ಮಾದರಿಯಲ್ಲಿ (ಡಿಬಿಎಫ್​ಒಟಿ ಆಧಾರದಲ್ಲಿ) ಜಾಗತಿಕ ಮಟ್ಟದ ಪ್ರವಾಸಿ ತಾಣಗಳಾಗಿ ಅಭಿವೃದ್ಧಿಪಡಿಸಲಾಗುತ್ತದೆ.

ದಕ್ಷಿಣ ಕನ್ನಡದ ಗುರುಪುರ ನದಿಯ ಉತ್ತರ ಮತ್ತು ದಕ್ಷಿಣ ದ್ವೀಪಗಳಲ್ಲಿ 125.43 ಕೋಟಿ ರೂ. ವೆಚ್ಚದಲ್ಲಿ ಮರೀನಾ ಹಾಗೂ ಪರಿಸರ ಹಟ್​ಗಳ ನಿರ್ಮಾಣ. ಮಂಗಳೂರಿನ ಲೈಟ್​ ಹೌಸ್​ ಸುತ್ತಲಿನ 1.5 ಎಕರೆ ಪ್ರದೇಶದಲ್ಲಿ 60.34 ಕೋಟಿ ರೂ. ವೆಚ್ಚದಲ್ಲಿ ಆತಿಥ್ಯ ಮೂಲಸೌಕರ್ಯ, ಕೋಡಿಕಲ್​ನಲ್ಲಿ 73 ಕೋಟಿ ರೂ. ವೆಚ್ಚದಲ್ಲಿ "ರಿವರ್​ ಫ್ರಂಟ್​ ವೆಲ್​ನೆಸ್​ ರೆಸಾರ್ಟ್​' ಹಾಗೂ ತಣ್ಣೀರುಭಾವಿಯಲ್ಲಿ 53 ಕೋಟಿ ರೂ. ವೆಚ್ಚದಲ್ಲಿ "ಬೀಚ್​ & ಫ್ರಂಟ್​ ಗ್ಲ್ಯಾಂಪಿಂಗ್​' ನಿರ್ಮಾಣ ಮಾಡಲು ತೀರ್ಮಾನಿಸಲಾಗಿದೆ.

ಉತ್ತರ ಕನ್ನಡ ಜಿಲ್ಲೆಯ ಕಾರವಾರ, ಭಟ್ಕಳ ಮತ್ತು ಅಂಕೋಲಾ ತಾಲ್ಲೂಕುಗಳ 7 ದ್ವೀಪಗಳನ್ನು 307.71 ಕೋಟಿ ರೂ. ವೆಚ್ಚದಲ್ಲಿ ಅಭಿವೃದ್ಧಿಪಡಿಸಲಾಗುವುದು. ಉಡುಪಿಯ ಅಂಬಾಗಿಲು (ಅಯಬಾ ಬದಲಿಗೆ ಮುದ್ರಣ ದೋಷವಿರಬಹುದು, ಆದರೆ ಪದ ಬದಲಾಯಿಸದ ನಿಯಮದಂತೆ ಮೂಲದಂತೆ ಇಡಲಾಗಿದೆ), ದರಿಯಾ ಬಹದ್ದೂರ್​ಗಡ ಮತ್ತು ಮಲ್ಪೆ ದ್ವೀಪಗಳಲ್ಲಿ 279.03 ಕೋಟಿ ರೂ. ವೆಚ್ಚದಲ್ಲಿ ಪರಿಸರ ಪ್ರವಾಸೋದ್ಯಮ ಹಾಗೂ ತ್ರಾಸಿ & ಮರವಂತೆ ಬೀಚ್​ನಲ್ಲಿ 48 ಕೋಟಿ ರೂ. ವೆಚ್ಚದಲ್ಲಿ ರೆಸಾರ್ಟ್​ ಮತ್ತು ಸಾಹಸ ವಲಯ ಅಭಿವೃದ್ಧಿಗೆ ತೀರ್ಮಾನಿಸಲಾಗಿದೆ.

ಚಿಕ್ಕಮಗಳೂರಿನಲ್ಲಿ 64 ಕೋಟಿ ರೂ. ವೆಚ್ಚದಲ್ಲಿ ಪರಿಸರ & ವಿಹಾರಧಾಮ ಸ್ಥಾಪನೆಗೊಳ್ಳಲಿದೆ.

ಬಂದರು, ಜಲಸಾರಿಗೆ ಮತ್ತು ಸಾರಿಗೆ ಅಭಿವೃದ್ಧಿ: ಉತ್ತರ ಕನ್ನಡ ಜಿಲ್ಲೆಯ ಮಂಕಿ ಬಂದರಿನಲ್ಲಿ 15 ಎಂಟಿಪಿಎ ಸಾಮರ್ಥ್ಯದ ಬಹು ಉಪಯೋಗಿ ಬಂದರು ಹಾಗೂ ಹಡಗು ನಿರ್ಮಾಣ ಕೇಂದ್ರವನ್ನು 6,925 ಕೋಟಿ ರೂ. ವೆಚ್ಚದಲ್ಲಿ ಪಿಪಿಪಿ ಮಾದರಿಯಲ್ಲಿ ಅಭಿವೃದ್ಧಿಪಡಿಸಲಾಗುವುದು. ಇದರಿಂದ 44,800 ಉದ್ಯೋಗಗಳು ಸೃಷ್ಟಿಯಾಗಲಿವೆ ಎನ್ನುವುದು ಗಮನಾರ್ಹವಾದ ಸಂಗತಿ. ಉಡುಪಿಯ ಗಂಗೊಳ್ಳಿಯಲ್ಲಿ 322 ಕೋಟಿ ರೂ. ವೆಚ್ಚದಲ್ಲಿ "ಗ್ರೀನ್​ ಫೀಲ್ಡ್​ ಹಡಗು ನಿರ್ಮಾಣ ಅಂಗಳ' ಅಭಿವೃದ್ಧಿಪಡಿಸಲು ತೀರ್ಮಾನಿಸಲಾಗಿದೆ.

ಕಾರವಾರ ವಿಮಾನ ನಿಲ್ದಾಣ ಅಭಿವೃದ್ಧಿ ವೆಚ್ಚವನ್ನು 98.24 ಕೋಟಿ ರೂ.ಗಳಿಂದ 250.05 ಕೋಟಿ ರೂ.ಗಳಿಗೆ ಹೆಚ್ಚಿಸಲಾಗಿದ್ದು, ಎ & 320 ವಿಮಾನಗಳ ಸಂಚಾರಕ್ಕೆ ಅನುಕೂಲವಾಗುವಂತೆ ರನ್‌ವೇಯನ್ನು 3,250 ಮೀಟರ್​ಗೆ ವಿಸ್ತರಿಸಲಾಗುವುದು. ಕರಾವಳಿ ಪ್ರಯಾಣಿಕರ ದೋಣಿ ಸೇವೆಯ ಕಾರ್ಯಾಚರಣೆಗೆ ಕಾರ್ಯಸಾಧ್ಯತಾ ಮೌಲ್ಯಮಾಪನ ನಡೆಸಿ ಸಲಹೆಗಾರರ ನೇಮಕಕ್ಕೆ ಸಮ್ಮತಿ ನೀಡಲಾಗಿದೆ.ದಕ್ಷಿಣ ಕನ್ನಡ ಮತ್ತು ಉಡುಪಿ ಜಿಲ್ಲೆಗಳಲ್ಲಿ 209 ಕೋಟಿ ರೂ.ಗಳ ಅಂದಾಜು ವೆಚ್ಚದಲ್ಲಿ 6 ಪ್ರಮುಖ ಸೇತುವೆಗಳ (ಪಾಲಿಮಾರ್​, ನೇತ್ರಾವತಿ ಸಂಪರ್ಕ ರಸ್ತೆ, ಕಂಡ್ಲೂರು, ಮರವೂರು, ಕಟೀಲು, ಕಾಮಜಲು & ಪೂವನಡ್ಕ) ನಿರ್ಮಾಣ ಮತ್ತು ಪುನರ್ನಿರ್ಮಾಣ ಕಾಮಗಾರಿಗಳಿಗೆ ಅನುಮೋದನೆ ನೀಡಲಾಗಿದೆ.

ಆರೋಗ್ಯ ಮತ್ತು ಶಿಕ್ಷಣ ಕ್ಷೇತ್ರಕ್ಕೆ ಕೊಡುಗೆ: ದಕ್ಷಿಣ ಕನ್ನಡ ಜಿಲ್ಲೆಯ ಪುತ್ತೂರು ತಾಲ್ಲೂಕಿನ ಬನ್ನೂರು ಗ್ರಾಮದ ಸೇಡಿಯಾಪು ಬಳಿ 549.79 ಕೋಟಿ ರೂ. ವೆಚ್ಚದಲ್ಲಿ ಜಿಲ್ಲಾ ಸರ್ಕಾರಿ ವೈದ್ಯಕೀಯ ಕಾಲೇಜು, ಬೋಧನಾ ಆಸ್ಪತ್ರೆ ಮತ್ತು ಹಾಸ್ಟೆಲ್​ ನಿರ್ಮಾಣಕ್ಕೆ ಅನುಮೋದನೆ ಸಿಕ್ಕಿದೆ. ಮಂಗಳೂರಿನ ವೆನ್ಲಾಕ್​ ಜಿಲ್ಲಾ ಆಸ್ಪತ್ರೆಯಲ್ಲಿ ಮೊದಲ ಹಂತವಾಗಿ 200 ಹಾಸಿಗೆಗಳ ಸಾಮರ್ಥ್ಯ ಹೆಚ್ಚಿಸಲು ಹಾಗೂ ಅಗತ್ಯ ಸಿಬ್ಬಂದಿ ಒದಗಿಸಲು ನಿರ್ಧರಿಸಲಾಗಿದೆ.

ಮಂಗಳೂರು ಮೀನುಗಾರಿಕಾ ಕಾಲೇಜಿನ ವಿದ್ಯಾರ್ಥಿಗಳ ಸಂಖ್ಯೆಯನ್ನು 60ರಿಂದ 200ಕ್ಕೆ ಹೆಚ್ಚಿಸಲಾಗುವುದು ಹಾಗೂ ಇದನ್ನು "ಮೀನುಗಾರಿಕಾ ವಿಶ್ವವಿದ್ಯಾಲಯ'ವಾಗಿ ಉನ್ನತಿಕರಿಸಲು ತಾತ್ವಿಕ ಅನುಮೋದನೆ ನೀಡಲಾಗಿದೆ. ರಾಜ್ಯದಲ್ಲಿ 1000 ಕರ್ನಾಟಕ ಪಬ್ಲಿಕ್​ ಶಾಲೆಗಳ (ಕೆಪಿಎಸ್​) ಅಭಿವೃದ್ಧಿಗೆ ತಲಾ ಆಡಳಿತಾತ್ಮಕ ಅನುಮೋದನೆ ನೀಡಲು ಜಿಲ್ಲಾಧಿಕಾರಿಗಳಿಗೆ ವಿಶೇಷ ಅಧಿಕಾರ ನೀಡಲಾಗಿದೆ. ಹೊಸ ಗ್ರಾಮ ಗ್ರಂಥಾಲಯಗಳಿಗೆ 57.15 ಕೋಟಿ ರೂ. ವೆಚ್ಚದಲ್ಲಿ 6,350 ಕಂಪ್ಯೂಟರ್​ ಮತ್ತು ಯುಪಿಎಸ್​ ಖರೀದಿಗೆ ಅನುಮೋದನೆ ದೊರೆತಿದೆ.

ಮೀನುಗಾರಿಕೆ ಮತ್ತು ಜಲ ವಲಯದ ಅಭಿವೃದ್ಧಿ & ವಿಶೇಷ ಸಮುದ್ರ ವಲಯ (ಎಸ್​ಎಂಜೆಡ್​): ದಕ್ಷಿಣ ಕನ್ನಡ, ಉಡುಪಿ ಹಾಗೂ ಉತ್ತರ ಕನ್ನಡ ಜಿಲ್ಲೆಗಳ ಕರಾವಳಿಯನ್ನು "ವಿಶೇಷ ಸಮುದ್ರ ವಲಯ' ಎಂದು ಘೋಷಿಸಲು ನಿರ್ಧರಿಸಲಾಗಿದೆ. ಮುಲ್ಕಿಯ ಬಳ್ಕುಂಜೆಯಲ್ಲಿ 150 ಎಕರೆ ಪ್ರದೇಶದಲ್ಲಿ 30 ಕೋಟಿ ರೂ. ವೆಚ್ಚದಲ್ಲಿ ಮೀನುಗಾರಿಕಾ ಪಾರ್ಕ್​ / ವಿಶೇಷ ಸಂಸ್ಕರಣಾ ವಲಯ (ಎಸ್​ಪಿಜೆಡ್​) ಸ್ಥಾಪನೆಯಾಗಲಿದೆ.

ಮಂಗಳೂರಿನ ಎಕ್ಕೂರಿನಲ್ಲಿ 30 ಕೋಟಿ ರೂ. ವೆಚ್ಚದಲ್ಲಿ ಅತ್ಯಾಧುನಿಕ ಸಗಟು ಮೀನು ಮಾರುಕಟ್ಟೆ, ಕೋಟೆಪುರದಲ್ಲಿ ಜೆಟ್ಟಿ, ಬೆಂಗ್ರೆ ಗ್ರಾಮದಲ್ಲಿ ಬರ್ತಿಂಗ್​ ಬೇಸಿನ್​ ನಿರ್ಮಾಣ, ಮಂಗಳೂರು ಬಂದರಿನಲ್ಲಿ ಹೂಳೆತ್ತುವ ಕಾಮಗಾರಿ ಮತ್ತು "ನೇಾವಿಗೇಷನ್​ ಬಾಯ್ಸ್​" ಅಳವಡಿಕೆಗೆ 20 ಕೋಟಿ ರೂ. ಹಾಗೂ ಮೀನುಗಾರಿಕೆ ಕೊಂಡಿ ರಸ್ತೆಗಳ ನಿರ್ವಹಣೆಗೆ 20 ಕೋಟಿ ರೂ. ಒದಗಿಸಲಾಗಿದೆ.

ಆಡಳಿತಾತ್ಮಕ, ಸಾಮಾಜಿಕ ಮತ್ತು ಇತರ ನಿರ್ಧಾರಗಳು: ಡಿಸೆಂಬರ್​ ಒಳಗೆ ಪಂಚಾಯತ್​ ರಾಜ್​ ಚುನಾವಣೆಗಳನ್ನು ಇವಿಎಂ ಬದಲಿಗೆ ಮತಪೆಟ್ಟಿಗೆ ಬಳಸಿ ನಡೆಸಲು ಕಾಯ್ದೆಗೆ ತಿದ್ದುಪಡಿ ತರಲಾಗಿದ್ದು, ಮತಪೆಟ್ಟಿಗೆ ಖರೀದಿ ಮತ್ತು "ಲೈವ್​ ವೆಬ್​ಕಾಸ್ಟಿಂಗ್​'ಗಾಗಿ 151.31 ಕೋಟಿ ರೂ. ಬಿಡುಗಡೆ ಮಾಡಲಾಗಿದೆ.

ಅರಣ್ಯ ಇಲಾಖೆ ನಿಯಮ ತಿದ್ದುಪಡಿ: ಅರಣ್ಯ ರಕ್ಷಕ ಮತ್ತು ವೀಕ್ಷಕರ ನೇರ ನೇಮಕಾತಿಯಲ್ಲಿ ಹಲಸರು, ಸಿದ್ಧಿ, ಕುಡಿಯ, ಬೆಟ್ಟಕುರುಬ ಮತ್ತು ಪಣಿಯನ್​ ಸೇರಿದಂತೆ ಸ್ಥಳೀಯ ಅರಣ್ಯ ಬುಡಕಟ್ಟು ಪರಿಶಿಷ್ಟ ಪಂಗಡಗಳಿಗೆ ವಿಶೇಷ ಪ್ರಾತಿನಿಧ್ಯ ವಿಸ್ತರಿಸಲು ನಿಯಮ ತಿದ್ದುಪಡಿ ಮಾಡಲಾಗಿದೆ. ಕನಕಪುರ ವನ್ಯಜೀವಿ ವಿಭಾಗವನ್ನೂ ಇದಕ್ಕೆ ಸೇರಿಸಲಾಗಿದೆ.

ಕುಡಿಯುವ ನೀರು ಮತ್ತು ಕ್ರೀಡೆ: ಬಂಟ್ವಾಳ ಮತ್ತು ಮಂಗಳೂರು ತಾಲ್ಲೂಕುಗಳ ಬಹುಗ್ರಾಮ ಕುಡಿಯುವ ನೀರಿನ ಯೋಜನೆಗಳ ನಿರ್ವಹಣೆಗೆ ಅನುಮೋದನೆ ಹಾಗೂ ಕಾಪು ಪಟ್ಟಣದ ನೀರು ಸರಬರಾಜಿಗೆ 62.31 ಕೋಟಿ ರೂ. ಪರಿಷ್ಕೃತ ಅಂದಾಜಿಗೆ ಒಪ್ಪಿಗೆ. ಮಂಗಳೂರಿನ ಮಂಗಳ ಕ್ರೀಡಾಂಗಣವನ್ನು 20 ಕೋಟಿ ರೂ. ವೆಚ್ಚದಲ್ಲಿ ಅಂತಾರಾಷ್ಟ್ರೀಯ ದರ್ಜೆಗೆ ಏರಿಸಲು ಹಾಗೂ ಉಡುಪಿ ಜಿಲ್ಲಾ ಕ್ರೀಡಾಂಗಣದಲ್ಲಿ 10 ಕೋಟಿ ರೂ. ವೆಚ್ಚದಲ್ಲಿ ಸಿಂಥೆಟಿಕ್​ ಟ್ರ್ಯಾಕ್​ ನಿರ್ಮಿಸಲು ನಿರ್ಧರಿಸಲಾಗಿದೆ.

ಸುರತ್ಕಲ್​ನ ಬಡಗ ಎಕ್ಕಾರು ಗ್ರಾಮದಲ್ಲಿ ಶ್ರೀ ವೆಂಕಟೇಶ್ವರ ಸ್ವಾಮಿ ದೇವಸ್ಥಾನ ನಿರ್ಮಾಣಕ್ಕೆ ತಿರುಪತಿ ತಿರುಮಲ ದೇವಸ್ಥಾನಂ (ಟಿಟಿಡಿ) ಗೆ 10 ಎಕರೆ ಜಮೀನು ಮಂಜೂರು ಹಾಗೂ "ಕರ್ನಾಟಕ ಒಳನಾಡು ಹಡಗುಗಳು ನಿಯಮಗಳು 2026' ಅಧಿಸೂಚನೆಗೆ ಸಮ್ಮತಿ ನೀಡಲಾಗಿದೆ.