ಕೋಲಾರ ಜಿಲ್ಲಾ ಸಹಕಾರಿ ಯೂನಿಯನ್ ಸಭಾಂಗಣದಲ್ಲಿ ಪ್ರಬಂಧ ಮತ್ತು ಚರ್ಚಾ ಸ್ಪರ್ಧೆಯ ವಿಜೇತರಿಗೆ ಒಕ್ಕೂಟದ ಉಪಾಧ್ಯಕ್ಷ ಟಿ.ಕೆಬೈರೇಗೌಡ ಬಹುಮಾನ ವಿತರಿಸಿದರು. ಯೂನಿಯನ್ ನಿರ್ದೇಶಕ ಅರುಣಮ್ಮ, ಷೇಕ್ ಅಹ್ಮದ್, ಪಾಪಣ್ಣ, ನಿವೃತ್ತ ಸಹಕಾರಿ ಶಿಕ್ಷಣಾಧಿಕಾರಿ ಮಲ್ಲಯ್ಯ, ಸಹಾಯಕ ನಿಬಂಧಕ ನವೀನ್, ನಿವೃತ್ತ ಲೆಕ್ಕಪರಿಶೋಧಕ ಮುನಿರಾಜು, ಸಿಇಒ ಭಾರತಿ, ರವಿ ಇದ್ದರು.
ಕೋಲಾರ: ಸಹಕಾರ ರಂಗದಲ್ಲಿ ಎಲ್ಲ ವರ್ಗದವರು ಪಾಲ್ಗೊಳ್ಳುವ ಮೂಲಕ ಸಾಮಾಜಿಕ ನ್ಯಾಯ ಪಡೆಯಬಹುದು. ಸಮಾಜದ ಕಟ್ಟಕಡೆಯ ವ್ಯಕ್ತಿಗೂ ಸೌಲಭ್ಯ ಹಂಚಿಕೆ ಮಾಡಬಹುದು ಎಂದು ಜಿಲ್ಲಾ ಸಹಕಾರಿ ಯೂನಿಯನ್ ಉಪಾಧ್ಯಕ್ಷ ಟಿ.ಕೆ.ಬೈರೇಗೌಡ ಹೇಳಿದರು.
ನಗರದ ಸಹಕಾರಿ ಯೂನಿಯನ್ ಸಭಾಂಗಣದಲ್ಲಿ ಮಂಗಳವಾರ ರಾಜ್ಯ ಸಹಕಾರ ಮಹಾಮಂಡಳಿ, ಜಿಲ್ಲಾ ಸಹಕಾರ ಒಕ್ಕೂಟದ ಸಹಯೋಗದಿಂದ ಶಾಲಾ ಮಕ್ಕಳಿಗಾಗಿ ಆಯೋಜಿಸಲಾಗಿದ್ದ ಪ್ರಬಂಧ ಮತ್ತು ಚರ್ಚಾ ಸ್ಪರ್ಧೆಯಲ್ಲಿ ವಿಜೇತರಾದವರಿಗೆ ಬಹುಮಾನ ವಿತರಿಸಿ ಮಾತನಾಡಿದರು. ಸಹಕಾರ ರಂಗದ ಬಗ್ಗೆ ಪೀಳಿಗೆ ಮಾಹಿತಿ ಅರಿತುಕೊಳ್ಳಬೇಕು. ಕಾಯ್ದೆಯಲ್ಲಿನ ಬದಲಾವಣೆಗಳನ್ನು ಸಹಕಾರಿಗಳಿಗೆ ಅರಿವು ಮೂಡಿಸುವುದು ಒಕ್ಕೂಟದ ಜವಾಬ್ದಾರಿ. ಇದರ ಭಾಗವಾಗಿಯೇ ವಿದ್ಯಾರ್ಥಿಗಳಿಗೆ ಸ್ಪರ್ಧೆಗಳನ್ನು ಏರ್ಪಡಿಸಲಾಗಿದೆ ಎಂದು ತಿಳಿಸಿದರು. ಜಿಲ್ಲಾ ಕಾರ್ಯನಿರತ ಪತ್ರಕರ್ತರ ಸಂಘದ ಅಧ್ಯಕ್ಷ ಬಿ.ವಿ.ಗೋಪಿನಾಥ್ ಮಾತನಾಡಿ, ಡಿಸಿಸಿ ಬ್ಯಾಂಕ್, ಹಾಲು ಒಕ್ಕೂಟವು ಸಹಕಾರಿ ರಂಗದಲ್ಲಿ ಛಾಪು ಮೂಡಿಸಿವೆ. ವಿದ್ಯಾರ್ಥಿ ಯುವ ಸಮೂಹ ಅರಿವು ಮೂಡಿಸಿಕೊಂಡು ಭವಿಷ್ಯದಲ್ಲಿ ಯಶಸ್ವಿ ಸಹಕಾರಿಗಳಾಗಬೇಕು ಎಂದು ಸಲಹೆ ನೀಡಿದರು. ಸಹಕಾರಿ ಯೂನಿಯನ್ ನಿರ್ದೇಶಕ ರುದ್ರಸ್ವಾಮಿ ಮಾತನಾಡಿ, ಸಹಕಾರ ತತ್ವಗಳ ಕುರಿತು ಮುಂದಿನ ಪ್ರಜೆಗಳಾದ ವಿದ್ಯಾರ್ಥಿಗಳಿಗೆ ಅರಿವು ನೀಡುವ ಅಗತ್ಯವಿದೆ, ಈ ನಿಟ್ಟಿನಲ್ಲಿ ಇಂತಹ ಸ್ಪರ್ಧೆಗಳು ಸಹಕಾರಿ ಎಂದರು.
ವಿಜೇತರು ಸಹಕಾರ ಚಳವಳಿ ಮತ್ತು ಯುವನಾಯಕತ್ವ ವಿಷಯದ ಕುರಿತು ಆಯೋಜಿಸಿದ್ದ ಪ್ರಬಂಧ ಸ್ಪರ್ಧೆಯಲ್ಲಿ ಆರ್.ಎಲ್.ಜಾಲಪ್ಪ ಕೇಂದ್ರೀಯ ವಿದ್ಯಾಲಯದ ಜಿ.ನಯನಾ ಪ್ರಥಮ, ಶ್ರೀನಿವಾಸಪುರ ಬೈರವೇಶ್ವರ ವಿದ್ಯಾನಿಕೇತನ ಶಾಲೆಯ ಕೆ.ಎಂ.ಲಾಸ್ಯಾ ದ್ವೀತಿಯ, ಮಾಸ್ತಿ ಗೌತಮ ಪ್ರೌಢಶಾಲೆಯ ಎಚ್.ಇಂದುಬಾಯಿ ತೃತೀಯ ಸ್ಥಾನ ಪಡೆದುಕೊಂಡರು.
"ಸಹಕಾರ ವಲಯದ ಪ್ರಾಥಮಿಕ ಸಂಘಗಳ ಬಲವರ್ಧನೆಯಿಂದ ಮಾತ್ರವೇ ಸಹಕಾರ ಚಳವಳಿ ಸದೃಢಗೊಳ್ಳಬಲ್ಲದು' ವಿಷಯದ ಕುರಿತು ನಡೆದ ಚರ್ಚಾಸ್ಪರ್ಧೆಯಲ್ಲಿ ಕೋಲಾರದ ಎಸ್ಡಿಸಿ ಪಿಯು ಕಾಲೇಜಿನ ಮೌನ ಎ.ಗೌಡ ಪ್ರಥಮ, ಬಂಗಾರಪೇಟೆಯ ನವಚೇತನ ಕಾಂಪೋಸಿಟ್ ಪಿಯು ಕಾಲೇಜಿನ ಎಂ.ಆರ್.ವೆನ್ನಲಾ ದ್ವೀತಿಯ ಹಾಗೂ ಕೋಲಾರದ ಬಿಜಿಎಸ್ ಪದವಿ ಪೂರ್ವ ಕಾಲೇಜಿನ ಎಂ.ಡಿಂಪಲ್ ತೃತೀಯ ಸ್ಥಾನ ಪಡೆದುಕೊಂಡರು.
