ಬಸವಣ್ಣನ ವಚನಗಳಲ್ಲಿ ಭಕ್ತಿಯ ನೆಲೆಯೂ ಉಂಟು. ಭಕ್ತನ ಸ್ಥಿತಿಯೂ ಉಂಟು. ಅವನ ಹಲವು ವಚನಗಳಲ್ಲಿ ಭಕ್ತಿಸ್ಥಿತಿಯ ವಿವಿಧ ಸ್ತರಗಳ ನೆಲೆಗಳುಂಟು. ‘ಭಕ್ತದೇಹಿಕ ದೇವನಪ್ಪ’(396), ‘ಭಕ್ತನ ಮುಖ ದರ್ಪಣದಲ್ಲಿ’ (145), ‘ಭಕ್ತನಾಗಿ ಲಿಂಗಜಂಗಮ’ (158), ‘ಭಕ್ತನಾಯಿತ್ತೆ ಭಕ್ತಿದಾಸೋಹ’ (936), ‘ಭಕ್ತನೆನಿಸುವೆನಯ್ಯಾ ಮೆಲ್ಲಮೆಲ್ಲನೆ (893), ‘ಭಕ್ತನೆಂತೆಂಬೆನಯ್ಯಾ’ (510), ‘ಭಕ್ತಭಕ್ತನ ಮನೆಗೆ ಬಂದೊಡೆ’ (246), ‘ಭಕ್ತರ ಕಂಡಡೆ ಚೋಳಪ್ಪರಯ್ಯಾ’ (103), ‘ಭಕ್ತರೇ ಸಮರ್ಥರು’ (683). ಇನ್ನು ‘ಭಕ್ತಿ ನೆಲೆ’ಯನ್ನು ಪ್ರಸ್ತಾವಿಸುವ ಹಲವು ವಚನಗಳುಂಟು. ‘ಭಕ್ತಿ ಯಿಲ್ಲದ ಬಡವನಾನಯ್ಯಾ’ (350), ‘ಭಕ್ತಿಯೆಂಬ ನಿಧಾನವ’ (243), ‘ಭಕ್ತಿಯೆಂಬ ಪೃಥ್ವಿಯ ಮೇಲೆ’ (526), ‘ಭಕ್ತಿಯೆಂಬುದ ಮಾಡಬಾರದು’ (212), ‘ಭಕ್ತಿಯೆಳ್ಳನಿತಿಲ್ಲ’ (308), ‘ಭಕ್ತಿರತಿಯ ವಿಕಳತೆಯ’ (515), ‘ಭಕ್ತಿವಿಶೇಷವ ಮಾಡುವರೆ’ (325), ‘ಭಕ್ತಿಹೀನನ ದಾಸೋಹವ’(607) - ಈ ಎಲ್ಲಾ ವಚನಗಳ ಹಿಂದೆ ಬಸವಣ್ಣನ ತೀವ್ರತರದ ಭಕ್ತಿಸ್ಥಿತಿಯ ಆಶಯಗಳುಂಟು.
