ಇವಿ ಬಳಕೆ ಹೆಚ್ಚಿಸಲು ಕಸರತ್ತು: ದೊಡ್ಡ ಕಂಪನಿ ಮೊರೆಹೋದ ಸರ್ಕಾರ, ಶೀಘ್ರವೇ ನೀಲಿನಕ್ಷೆ ಸಿದ್ಧ

| ಶ್ರೀಕಾಂತ್ ಶೇಷಾದ್ರಿ ಬೆಂಗಳೂರು

ರಾಜ್ಯದಲ್ಲಿ ಕರೊನಾ ಸೋಂಕು ಇಳಿಕೆಯಾಗುತ್ತಿದ್ದಂತೆ ವಿವಿಧ ಇಲಾಖೆಗಳು ತಮ್ಮ ಮುಂದಿರುವ ಯೋಜನೆಗಳನ್ನು ಅನುಷ್ಠಾನ ಗೊಳಿಸಲು ಮುಂದಾಗುತ್ತಿವೆ. ಪ್ರಮುಖವಾಗಿ ಕೈಗಾರಿಕೆ ಇಲಾಖೆಯು ಹೂಡಿಕೆ ವಿಚಾರದಲ್ಲಿ ಗಮನ ಕೊಡುತ್ತಿದೆ. ಜತೆಗೆ, ಎಲೆಕ್ಟ್ರಿಕ್ ವಾಹನಗಳ (ಇವಿ) ಬಳಕೆ ಉತ್ತೇಜಿಸಲು ಕಸರತ್ತು ನಡೆಸಿದೆ.

ಎಲೆಕ್ಟ್ರಿಕ್ ವಾಹನ ನೀತಿ ರಾಜ್ಯದಲ್ಲಿ ಜಾರಿಯಲ್ಲಿದ್ದು, ಈ ಕ್ಷೇತ್ರಕ್ಕೆ ಉತ್ತೇಜನ ನೀಡಲು ಹಲವು ಘೋಷಣೆ ಮಾಡಿ ಅನುಷ್ಠಾನ ಮಾಡುತ್ತಿದೆ. ‘ಇವಿ’ ಕ್ಷೇತ್ರದ ಹೂಡಿಕೆದಾರರು ಒಬ್ಬೊಬ್ಬರಾಗಿ ರಾಜ್ಯವನ್ನು ಪ್ರವೇಶಿಸುತ್ತಿದ್ದಾರೆ. ಕಳೆದ ವಾರವಷ್ಟೇ ಲಿಥಿಯನ್- ಅಯಾನ್ ಸೆಲ್ ಉತ್ಪಾದನಾ ಕ್ಷೇತ್ರದ ಪ್ರಮುಖ ಕಂಪನಿ ಅಮೆರಿಕದ ಸಿ4ವಿ ರಾಜ್ಯ ದಲ್ಲಿ 4,000 ಕೋಟಿ ರೂ. ಹೂಡಿಕೆ ಮಾಡಲು ಮುಂದೆ ಬಂದಿದೆ. ಇನ್ನೊಂದು ಮಗ್ಗುಲಲ್ಲಿ ಎಲೆಕ್ಟ್ರಿಕ್ ವಾಹನ ಬಳಕೆ ಹೆಚ್ಚಿಸಲು ಸರ್ಕಾರ ಪ್ರಯತ್ನಿಸುತ್ತಿದೆ. ಕೇಂದ್ರ ಸರ್ಕಾರ ಮತ್ತು ರಾಜ್ಯದಿಂದ ಎಲೆಕ್ಟ್ರಿಕ್ ವಾಹನ ಖರೀದಿಸುವವರಿಗೆ ಸಬ್ಸಿಡಿಗಳನ್ನು ನೀಡಲಾಗುತ್ತಿದೆ. ಈ ನಡá-ವೆಯೂ ನಿರೀಕ್ಷಿತ ಪ್ರಮಾಣದಲ್ಲಿ ಬಳಕೆ ಹೆಚ್ಚಾಗುತ್ತಿಲ್ಲ. ಈ ಕಾರಣಕ್ಕೆ ಕೈಗಾರಿಕಾ ಇಲಾಖೆ ದೊಡ್ಡ ಕಂಪನಿಗಳ ಮೊರೆ ಹೋಗಿದ್ದು, ಎಲೆಕ್ಟ್ರಿಕ್ ವಾಹನ ಬಳಕೆ ಮಾಡುವಂತೆ ಒತ್ತಾಯಿಸಿದೆ.

ಇ-ಕಾಮರ್ಸ್​ನಲ್ಲಿ ತೊಡಗಿಕೊಂಡಿರುವ ದಿಗ್ಗಜ ಕಂಪನಿಗಳು, ಎಲೆಕ್ಟ್ರಿಕ್ ವಾಹನ ಉತ್ಪಾದನಾ ಕಂಪನಿಗಳು ಮತ್ತು ಸ್ಮಾರ್ಟ್ ಮೊಬಿಲಿಟಿ ಉದ್ಯಮದಲ್ಲಿ ತೊಡಗಿರುವ ಕಂಪನಿಗಳಿಂದ ಸರ್ಕಾರ ದೊಡ್ಡ ಬದಲಾವಣೆ ನಿರೀಕ್ಷಿಸಿದ್ದು, ಅವುಗಳೊಂದಿಗೆ ಸೇರಿಕೊಂಡು ಪರಿವರ್ತನೆಗೆ ಪ್ರಯತ್ನಿಸಿದೆ. ಎಲೆಕ್ಟ್ರಿಕ್ ವೆಹಿಕಲ್ ಬಳಕೆ ಉತ್ತೇಜಿಸಲು ಈ ಕಂಪನಿಗಳ ಸಲಹೆ ಕೇಳಿದೆ. ಬಿಗ್ ಬ್ಯಾಸ್ಕೆಟ್, ಅಮೆಜಾನ್, ಫ್ಲಿಪ್​ಕಾರ್ಟ್, ಬೌನ್ಸ್ ಸೇರಿ 20ಕ್ಕೂ ಹೆಚ್ಚು ಕಂಪನಿಗಳ ಪ್ರಮುಖರೊಂದಿಗೆ ಹಿರಿಯ ಅಧಿಕಾರಿಗಳು ಒಂದು ಸುತ್ತಿನ ಸಮಾಲೋಚನೆ ನಡೆಸಿದ್ದಾರೆ.

ಇ-ಕಾಮರ್ಸ್ ಸೇವೆಯಲ್ಲಿ ಎಲೆಕ್ಟ್ರಿಕ್ ವಾಹನಗಳನ್ನೇ ಬಳಸಿ ಎಂದು ಸರ್ಕಾರದ ಕಡೆಯಿಂದ ಪ್ರಸ್ತಾವನೆ ಇಡಲಾಗಿದೆ. ಇದು ಕಷ್ಟಸಾಧ್ಯ ಎಂದು ಕಂಪನಿಗಳು ಹೇಳಿಕೊಂಡಿವೆ. ಇ-ಕಾಮರ್ಸ್​ನಲ್ಲಿ ಡೆಲಿವರಿ ಬಾಯ್ಗಳು ಸ್ವಂತ ವಾಹನ ಬಳಸುತ್ತಾರೆ, ಅವರಿಗೆ ಎಲೆಕ್ಟ್ರಿಕ್ ವಾಹನವನ್ನೇ ಬಳಸಿ ಎಂದು ಹೇಳುವುದು ಸರಿಯಾಗುವುದಿಲ್ಲ. ಈ ವಾಹನ ಕೊಳ್ಳುವಷ್ಟು ಆರ್ಥಿಕ ಸಬಲರೂ ಆಗಿರುವುದಿಲ್ಲ ಎಂದು ವಾದ ಮುಂದಿಟ್ಟಿದ್ದಾರೆ. ಆದರೆ, ತಮ್ಮಿಂದ ಏನು ಸಾಧ್ಯವೋ ಅದನ್ನು ಮಾಡುತ್ತೇವೆ ಎಂದಿದ್ದಾರೆ. ಕೆಲವು ಪ್ರಮುಖ ಕಂಪೆನಿಗಳು ತಾವು ಎಲೆಕ್ಟ್ರಿಕ್ ವಾಹನ ಖರೀದಿಸಲು ಬಯಸಿರುವ ಸಂಗತಿಯನ್ನು ತಿಳಿಸಿವೆ. ಯಾವ ರೀತಿ ಪರ್ಯಾಯ ಆಲೋಚನೆ ಮಾಡಬಹುದು ಮತ್ತು ಸರ್ಕಾರದಿಂದ ಏನು ನಿರೀಕ್ಷಿಸಲಾಗುತ್ತಿದೆ ಎಂಬ ಪ್ರಸ್ತಾವನೆ ಸಿದ್ಧಪಡಿಸಿ ಕನಿಷ್ಠ ಕಾಲಮಿತಿಯಲ್ಲಿ ಸಲ್ಲಿಸುವಂತೆ ಕೈಗಾರಿಕೆ ಇಲಾಖೆ ಹಿರಿಯ ಅಧಿಕಾರಿಗಳು ಕಂಪನಿಗಳಿಗೆ ತಿಳಿಸಿದ್ದಾರೆ. ಇಡೀ ದೇಶದಲ್ಲಿ ಎಲೆಕ್ಟ್ರಿಕ್ ವೆಹಿಕಲ್ ಪಾಲಿಸಿ ಮಾಡಿದ್ದು ನಮ್ಮ ರಾಜ್ಯವೇ ಮೊದಲು. ನಮ್ಮ ಪಾಲಿಸಿ ನೋಡಿ ಇತರೆ ರಾಜ್ಯಗಳು ಪಾಲಿಸಿ ತರುತ್ತಿವೆ.

ಇವಿಗೆ ಪರಿವರ್ತನೆ ಮಾಡಿಕೊಂಡ ವಾಹನಕ್ಕೂ ಸಬ್ಸಿಡಿ

ಹೊಸ ಎಲೆಕ್ಟ್ರಿಕ್ ದ್ವಿಚಕ್ರ ವಾಹನಗಳಷ್ಟೇ ಅಲ್ಲ, ಇವಿಗೆ ಪರಿವರ್ತನೆ ಮಾಡಿಕೊಂಡ ಹಳೆಯ ವಾಹನಕ್ಕೂ ಸಬ್ಸಿಡಿ ಕೊಟ್ಟರೆ ದೊಡ್ಡ ಪರಿಣಾಮ ಕಾಣಬಹುದು ಎಂದು ಕಂಪನಿಯೊಂದು ಸರ್ಕಾರಕ್ಕೆ ಸಲಹೆ ನೀಡಿದೆ.ಹಳೆಯ ವಾಹನಗಳನ್ನು ಇಲೆಕ್ಟ್ರಿಕ್ ವಾಹನವಾಗಿ ಪರಿವರ್ತಿಸುವ ಯೋಜನೆ ಯಶಸ್ವಿಯಾಗಿದ್ದು, ಶೀಘ್ರವೇ ಪರಿಚಯವಾಗಬಹುದು. ಒಂದು ವೇಳೆ ಈ ಪರಿವರ್ತನೆ ಮಾಡಿಕೊಳ್ಳುವವರಿಗೆ ಸರ್ಕಾರ ಸಬ್ಸಿಡಿ ನೀಡಿದರೆ ಕ್ರಾಂತಿಯೇ ಆಗಲಿದೆ ಎಂದು ಕಂಪನಿ ಮುಖ್ಯಸ್ಥರು ಸರ್ಕಾರಕ್ಕೆ ಸಲಹೆ ನೀಡಿದ್ದಾರೆಂದು ಉನ್ನತ ಮೂಲಗಳು ತಿಳಿಸಿವೆ. ಬಡ ಮಧ್ಯಮ, ಮಧ್ಯಮ ವರ್ಗದವರು ಹೆಚ್ಚಾಗಿ ದ್ವಿಚಕ್ರ ವಾಹನ ಬಳಕೆ ಮಾಡುತ್ತಾರೆ, ಈ ವರ್ಗಕ್ಕೆ ಎಲೆಕ್ಟ್ರಿಕ್ ವಾಹನವನ್ನು ಖರೀದಿಸಲು ಕಷ್ಟವಾಗಬಹುದು. ಹೀಗಾಗಿ ಇರುವ ವಾಹನವನ್ನೇ ಎಲೆಕ್ಟ್ರಿಕ್ ವಾಹನವಾಗಿ ಪರಿವರ್ತಿಸಿಕೊಳ್ಳಲು ಸರ್ಕಾರ ನೆರವಾದರೆ ಅನುಕೂಲವಾಗಬಹುದು ಎಂದು ಸ್ಮಾರ್ಟ್ ಮೊಬಿಲಿಟಿ ಉದ್ಯಮದಲ್ಲಿ ತೊಡಗಿಕೊಂಡಿರುವ ಕಂಪನಿ ಅಭಿಪ್ರಾಯ ನೀಡಿದೆ.

ಸಮತೋಲನ ಅನಿವಾರ್ಯ

ಬೆಂಗಳೂರು ಸುತ್ತಮುತ್ತ ಎಲೆಕ್ಟ್ರಿಕ್ ವೆಹಿಕಲ್ ಉತ್ಪಾದನಾ ಕಂಪನಿ, ಪೂರಕ ಉದ್ಯಮಗಳು, ಸಂಶೋಧನಾ ಮತ್ತು ಅಭಿವೃದ್ಧಿ ಸಂಸ್ಥೆಗಳು ಸ್ಥಾಪನೆಯಾಗುತ್ತಿವೆ. ಅದಕ್ಕೆ ಪೂರಕವಾಗಿ ಜನಸಾಮಾನ್ಯರು ವಾಹನ ಬಳಕೆ ಮಾಡುವಂತಾಗಬೇಕು. ಈ ಹಿನ್ನೆಲೆಯಲ್ಲಿ ಸಮತೋಲನ ಕಾಯ್ದುಕೊಳ್ಳಲು ಸರ್ಕಾರ ಪ್ರಯತ್ನ ನಡೆಸಿದೆ. ಒಂದು ವೇಳೆ ಬಳಕೆ ಹೆಚ್ಚಾದರೆ, ಈ ಕ್ಷೇತ್ರಕ್ಕೆ ಇನ್ನಷ್ಟು ಹೂಡಿಕೆ ಬರಲಿದೆ ಎಂಬ ಲೆಕ್ಕಾಚಾರವೂ ಇದೆ.

ಇವಿ ಪಾಲಿಸಿ ಮೊದಲು ತಂದಿದ್ದು ನಮ್ಮ ರಾಜ್ಯ. ಇತ್ತೀಚೆಗೆ ಹೆಚ್ಚುವರಿಯಾಗಿಯೂ ಸೌಲಭ್ಯ ಘೋಷಿಸಿದೆವು. ಇದರಿಂದ ಒಳ್ಳೆಯ ಬೆಳವಣಿಗೆ ಕಾಣಿಸುತ್ತಿದೆ. ಜತೆಗೆ ಬಳಕೆದಾರರಿಗೆ ಸೌಲಭ್ಯ ಕಲ್ಪಿಸಲು, ಮೂಲಸೌಕರ್ಯ ವೃದ್ಧಿಗೂ ಪ್ರಯತ್ನ ನಡೆಸಲಾಗುತ್ತಿದೆ.

| ಜಗದೀಶ ಶೆಟ್ಟರ್ ಕೈಗಾರಿಕೆ ಸಚಿವ

ಹೂಡಿಕೆದಾರರಿಗೆ ರೆಡ್ ಕಾರ್ಪೆಟ್

• ಎಲೆಕ್ಟ್ರಾನಿಕ್ಸ್ ಉತ್ಪನ್ನಗಳ ತಯಾರಿಕೆಗೆ ರಾಜ್ಯ ಸರ್ಕಾರ ವಿಶೇಷ ಪ್ರೋತ್ಸಾಹಕ ಪ್ಯಾಕೇಜ್ ಪರಿಚಯಿಸಿದೆ. ಈ ಪ್ಯಾಕೇಜ್ ಅನ್ವಯ, ರಾಜ್ಯದಲ್ಲಿ ಹೊಸದಾಗಿ ಹೂಡಿಕೆ ಮಾಡುವವರಿಗೆ ಭೂಮಿ ಮೇಲೆ ಶೇ.25 ಬಂಡವಾಳ ಸಬ್ಸಿಡಿ ನೀಡಲಾಗುವುದು.
• ಇವಿ ಉತ್ಪಾದನಾ ಘಟಕ ಮತ್ತು ಯಂತ್ರೋಪಕರಣಗಳ ಮೇಲೆ ಶೇ.20, ಸಬ್ಸಿಡಿ, ಸಬ್ಸಿಡಿ ದರದಲ್ಲಿ ವಿದ್ಯುತ್, ಸ್ಟಾ್ಯಂಪ್ ಡ್ಯೂಟಿ ಮತ್ತು ನೋಂದಣಿ ಶುಲ್ಕಗಳ ಮರುಪಾವತಿ ಮಾಡಲಿದೆ.
• ಐದು ವರ್ಷಗಳ ಒಟ್ಟು ವಾರ್ಷಿಕ ವಹಿವಾಟಿನ ಮೇಲೆ ಶೇ.1 ಉತ್ಪಾದನೆ ಆಧಾರಿತ ಪ್ರೋತ್ಸಾಹಧನವನ್ನು ಸರ್ಕಾರ ನೀಡಲಿದೆ.

https://www.vijayavani.net/281-doctors-requested-permission-to-commit-suicide/

https://www.vijayavani.net/yogish-gowda-case-wife-smiles-officer-cries/