ಚೀನಾ ಯುದ್ಧನೆಲೆಗಳ ಮೇಲೆ ಭಾರತದ ಉಪಗ್ರಹದ ಕಣ್ಣು; ಹಲವೆಡೆ ಭಾರಿ ಚಟುವಟಿಕೆ

ನವದೆಹಲಿ: ವಿಸ್ತರಣಾವಾದಿ ಮನೋಭಾವದೊಂದಿಗೆ ಲಡಾಖ್​ನಲ್ಲಿ ಹಟಮಾರಿ ಧೋರಣೆ ಅನುಸರಿಸುತ್ತಾ, ಸೇನೆಯನ್ನು ಹಿಂತೆಗೆಯಲು ನಿರಾಕರಿಸುತ್ತಿರುವ ಚೀನಾದ ಮೇಲೆ ಭಾರತೀಯ ಉಪಗ್ರಹಗಳ ಕಣ್ಣು ನೆಟ್ಟಿದೆ. ರಕ್ಷಣಾ ಸಂಶೋಧನೆ ಮತ್ತು ಅಭಿವೃದ್ಧಿ ಸಂಸ್ಥೆ (ಡಿಆರ್​ಡಿಒ) ನಿರ್ವಹಣೆಯ ದೇಶದ ಪ್ರಮುಖ ಬೇಹುಗಾರಿಕಾ ಉಪಗ್ರಹ ಎಮಿಸ್ಯಾಟ್​ (EMISAT) ಶನಿವಾರ ಆಕ್ರಮಿತ ಟಿಬೆಟ್​ನ ಪ್ರದೇಶವನ್ನು ಹಾದುಹೋಗಿದ್ದು, ಅಲ್ಲಿ ಪೀಪಲ್ಸ್​ ಲಿಬರೇಷನ್​ ಆರ್ಮಿಯ (ಪಿಎಲ್​ಎ) ಯೋಧರ ನಿಯೋಜನೆಯನ್ನು ಗಮನಿಸಿ ಕರಾರುವಾಕ್ಕಾಗಿ ಮಾಹಿತಿ ನೀಡಿದೆ.

ಈ ಉಪಗ್ರಹದಲ್ಲಿರುವ ಕೌಟಿಲ್ಯಾ ಎಂಬ ಹೆಸರಿನ ವಿದ್ಯುನ್ಮಾನ ಬೇಹುಗಾರಿಕಾ ಉಪಕರಣ ELINT, ಭಾರತದ ಅರುಣಾಚಲಪ್ರದೇಶಕ್ಕೆ ಸನಿಹವಾಗಿ ಆಕ್ರಮಿತ ಟಿಬೆಟ್​ನಲ್ಲಿ ನೆಲೆಗೊಂಡಿರುವ ಪಿಎಲ್​ಎ ಯೋಧರ ನಿಯೋಜನೆ ಕುರಿತು ನಿಖರ ಮಾಹಿತಿ ಒದಗಿಸಿದೆ. ಇದು ರವಾನಿಸುವ ಮಾಹಿತಿ ಅತ್ಯಂತ ಗೌಪ್ಯವಾದದ್ದು ಮತ್ತು ಮಿಲಿಟರಿ ಕಾರ್ಯಾಚರಣೆಯ ಉದ್ದೇಶದಲ್ಲಿ ಅತ್ಯಂತ ಮಹತ್ವ ಹೊಂದಿರುವ ಮಾಹಿತಿ ಆಗಿರುತ್ತದೆ. ಇಸ್ರೋ ನಿರ್ಮಿತ ಉಪಗ್ರಹವು ಶತ್ರುಪಾಳೆಯದಲ್ಲಿನ ಎಲ್ಲ ರೇಡಿಯೋ ಸಿಗ್ನಲ್​ಗಳ ಸ್ವಭಾವಗಳು ಮತ್ತು ಅವು ಹೊಮ್ಮುತ್ತಿರುವ ನಿಖರವಾದ ಸ್ಥಳವನ್ನು ಇದು ಗುರುತಿಸಿ ಮಾಹಿತಿ ಒದಗಿಸುತ್ತದೆ ಎಂದು ಹೇಳಲಾಗಿದೆ.

ಪ್ಯಾಂಗಾಂಗ್​ ತ್ಸೊ ಸರೋವರದ 4ನೇ ಏಣಿನಲ್ಲಿ ನೆಲೆಗೊಳಿಸಿರುವ ಪಿಎಲ್​ಎ ಯೋಧರನ್ನು ಹಿಂತೆಗೆಯುವ ಕುರಿತು ಭಾರತ ಮತ್ತು ಚೀನಾ ನಡುವೆ ಮಾತುಕತೆ ನಡೆದ ಮರುದಿನವೇ ಎಮಿಸ್ಯಾಟ್​ ಚೀನಾದ ಪ್ರದೇಶವನ್ನು ಹಾದು ಹೋಗಿದೆ. ಮಾತುಕತೆಗಳು ಫಲಪ್ರದವಾಗದಿದ್ದರೂ, ಈ ಪ್ರಕ್ರಿಯೆಯನ್ನು ಮುಂದುವರಿಸಲು ಉಭಯ ಪಕ್ಷಗಳು ಸಮ್ಮತಿಸಿವೆ ಎಂದು ಹೇಳಲಾಗಿದೆ.

ಡೆಪ್ಸಾಂಗ್​ ವಲಯದಲ್ಲಿ ಪಿಎಲ್​ಎ ಯೋಧರು ಹೆಚ್ಚಿನ ಸಂಖ್ಯೆಯಲ್ಲಿ ಬೀಡುಬಿಟ್ಟಿದ್ದು, ಈ ಪ್ರದೇಶದಲ್ಲಿ ಟೆಂಟ್​ ಮತ್ತು ಬಂಕರ್​ಗಳನ್ನು ನಿರ್ಮಿಸಿಕೊಂಡಿರುವುದು ಕಂಡುಬಂದಿದೆ. ಆದರೆ ಈ ಬೆಳವಣಿಗೆ ವಾಸ್ತವ ಗಡಿರೇಖೆಯ ಚೀನಾದ ಭಾಗದಲ್ಲಿ ಕಂಡುಬಂದಿದೆ. 2013ರಲ್ಲಿ ಕೂಡ ಪಿಎಲ್​ಎ ಯೋಧರು ಡೆಪ್ಸಾಂಗ್​ ವಲಯದಲ್ಲಿ ಅತಿಕ್ರಮಿಸಿದ್ದರು. ಆದರೆ ಮಾತುಕತೆಯ ಬಳಿಕ ಹಿಂತೆಗೆದಿದ್ದರು.

ಇದನ್ನೂ ಓದಿ: ಪಿಒಕೆಯ ಸ್ಕದ್ರು ವಾಯುನೆಲೆಯಲ್ಲಿ ಇಳಿದಿವೆ ಪಾಕ್‍ನ ಜೆ-17 ಫೈಟರ್ ಜೆಟ್‍ಗಳು!

ಮೂಲಗಳ ಪ್ರಕಾರ ಭಾರತದ ರಿಸ್ಯಾಟ್​-2ಬಿಆರ್​1 ಉಪಗ್ರಹ ಕೂಡ ಡಿಜಿಬೌಟಿಯಲ್ಲಿರುವ ಚೀನಾದ ಪೀಪಲ್ಸ್​ ಲಿಬರೇಷನ್​ ಆರ್ಮಿ ನೇವಿಯ (ಪಿಎಲ್​ಎಎನ್​) ನೆಲೆಯ ಮೇಲೆ ಕೂಡ ಶುಕ್ರವಾರ ಕಣ್ಣು ಹಾಯಿಸಿದ್ದು, ತನ್ನ ಮೊದಲ ವಿದೇಶಿ ಮಿಲಿಟರಿ ನೆಲೆಯಲ್ಲಿ ಚೀನಾ ಯುದ್ಧನೌಕೆಗಳನ್ನು ನೆಲೆಗೊಳಿಸಿರುವುದಲ್ಲದೆ, ಕೆಲವು ಯುದ್ಧನೌಕೆಗಳು ಸಂಚರಿಸುತ್ತಿರುವ ದೃಶ್ಯಗಳು ಕಂಡುಬಂದಿವೆ.

ಜುಲೈ 11ರಂದು ಎಮಿಸ್ಯಾಟ್​ನ ಎಲಿಂಟ್​ ಪಾಕಿಸ್ತಾನದ ನೌಕಾನೆಲೆ ಒರ್ಮರಾ (ಜಿನ್ನಾ ನೌಕಾನೆಲೆ) ಮೇಲೆ ಕಣ್ಣು ಹಾಯಿಸಿದ್ದು, ಈ ನೆಲೆಯಲ್ಲಿರುವ ಸೌಲಭ್ಯ ಬಳಸಿಕೊಂಡು ಚೀನಾ ತನ್ನ ಜಲಂತರ್ಗಾಮಿಗಳನ್ನು ನೆಲೆಗೊಳಿಸಿರುವುದು ಕಂಡು ಬಂದಿದೆ.

ಲಡಾಖ್​ ಬಿಕ್ಕಟ್ಟು ಶಮನಕ್ಕೆ ಭಾರತ ಮತ್ತು ಚೀನಾ ಮಾತುಕತೆ ಪ್ರಕ್ರಿಯೆಯನ್ನು ಜಾರಿಯಲ್ಲಿಟ್ಟಿವೆ. ಆದರೂ, ಲಡಾಖ್​ ಮತ್ತು ಕಾಶ್ಮೀರದಲ್ಲಿ ಪಾಕ್​ ಮತ್ತು ಚೀನಾ ಒಂದಾಗಿ ದಾಳಿ ಮಾಡುವ ಸಾಧ್ಯತೆ ಇದೆ ಎನ್ನಲಾಗುತ್ತಿದೆ. ಈ ಹಿನ್ನೆಲೆಯಲ್ಲಿ ಶತ್ರು ಪಾಳೆಯದ ಮೇಲೆ ಭಾರತೀಯ ಉಪಗ್ರಹಗಳು ಕಣ್ಗಾವಲು ಇರಿಸಿವೆ.

https://www.vijayavani.net/donations-from-all-faiths-to-be-accepted-read-more-at-https-www-deccanherald-com-national-donations-from-all-faiths-to-be-accepted-for-ram-temple-construction-trust-member/