ಚುನಾವಣಾ ಗಿಫ್ಟ್ ಬಜೆಟ್: ಕರೊನೋತ್ತರ ಬದುಕಿಗೆ ಉತ್ತೇಜನ; ಆರ್ಥಿಕತೆಗೂ ಟಾನಿಕ್

ಮಹಾಮಾರಿ ಕೋವಿಡ್-19 ಸಂಕಷ್ಟದ ಹೊಡೆತದಿಂದ ದೇಶದ ಅರ್ಥವ್ಯವಸ್ಥೆ ಚೇತರಿಸಿಕೊಳ್ಳುತ್ತಿರುವಾಗಲೇ ಕೇಂದ್ರ ಬಜೆಟ್-2022 ಎದುರಾಗಿರುವುದು ಸಹಜವಾಗಿಯೇ ನಿರೀಕ್ಷೆಗಳನ್ನು ಇಮ್ಮಡಿಗೊಳಿಸಿದೆ. ಉತ್ತರ ಪ್ರದೇಶ ಒಳಗೊಂಡಂತೆ ಪಂಚರಾಜ್ಯ ಚುನಾವಣೆ, 2024ರ ಲೋಕಸಭೆ ಸಮರಕ್ಕೂ ಮುಂಚಿನ ಪೂರ್ಣಪ್ರಮಾಣದ ಬಜೆಟ್ ಇದಾಗಿರುವುದರಿಂದ ಮಂಗಳವಾರ ವಿತ್ತ ಸಚಿವೆ ನಿರ್ಮಲಾ ಸೀತಾರಾಮನ್ ಸಂಸತ್​ನಲ್ಲಿ ಮಂಡಿಸಲಿರುವ ಬಜೆಟ್​ನಲ್ಲಿ ಜನಪರ ಘೋಷಣೆಗಳ ಮಹಾಪೂರವೇ ಹರಿಯುವ ನಿರೀಕ್ಷೆ ಇದೆ. ಇನ್ನು 2023ರಲ್ಲಿ ಜಿಡಿಪಿ ದರವನ್ನು ಶೇ.8-8.5ರಲ್ಲಿ ಕಾಯ್ದುಕೊಳ್ಳುವುದಕ್ಕೆ ದಾರಿ ಯಾವುದೆಂಬ ಕುತೂಹಲವೂ ಇಮ್ಮಡಿಗೊಂಡಿದೆ. ಈ ಎಲ್ಲ ಮಾಹಿತಿ ಜತೆ ಜತೆಯಲ್ಲೇ ಬಜೆಟ್​ನ ನಿರೀಕ್ಷೆ, ಸಾಧ್ಯಾಸಾಧ್ಯತೆಗಳ ಸಂಕ್ಷಿಪ್ತ ಅವಲೋಕನ ಇಲ್ಲಿದೆ.

ಜಾರಿ ಸಾಧ್ಯತೆಗಳು

• ಆರೋಗ್ಯ ವಿಮೆಗೆ ನೀಡಿರುವ ತೆರಿಗೆ ವಿನಾಯಿತಿ ಇನ್ನಷ್ಟು ಹೆಚ್ಚಳ, ಮಕ್ಕಳ ಶಿಕ್ಷಣಕ್ಕಾಗಿ ಪಾಲಕರು ಮಾಡುವ ಉಳಿತಾಯಕ್ಕೆ ವಿನಾಯಿತಿ
• ಪ್ರತಿವರ್ಷದಂತೆ ಈ ವರ್ಷವೂ ವೈಯಕ್ತಿಕ ಹಣಕಾಸು ಪ್ರಯೋಜನಗಳು, ತೆರಿಗೆ ವಿನಾಯಿತಿ
• ತೆರಿಗೆ ವಿನಾಯಿತಿಯ ಆದಾಯ ಮಿತಿ 2.5 ಲಕ್ಷ ರೂಪಾಯಿಯಿಂದ 3 ಲಕ್ಷ ರೂಪಾಯಿಗೆ ಏರಿಕೆ, ಹಿರಿಯ ನಾಗರಿಕರಿಗೆ 3.5 ಲಕ್ಷ ರೂ.ಗೆ ಏರಿಕೆ
• ಗರಿಷ್ಠ ತೆರಿಗೆಯ ಆದಾಯ ಸ್ಥರ 10 ಲಕ್ಷ ರೂ.ನಿಂದ 15 ಲಕ್ಷ ರೂ.ಗೆ ಹೆಚ್ಚಳ
• ನಗದು ರಹಿತ ಅರ್ಥವ್ಯವಸ್ಥೆ ಉತ್ತೇಜಿಸಲು ಫಿನ್​ಟೆಕ್ ಕ್ಷೇತ್ರಕ್ಕೆ ಇನ್​ಸೆಂಟಿವ್ಸ್, ಪ್ರಯೋಜನಗಳು
• ಉತ್ಪಾದನಾ ವಲಯದಲ್ಲಿ ಪ್ರೊಡಕ್ಷನ್ ಲಿಂಕ್ಡ್ ಇನ್​ಸೆಂಟಿವ್ಸ್ ಯೋಜನೆಯಲ್ಲಿ ಹೆಚ್ಚುವರಿ ಕೊಡುಗೆಗಳ ನಿರೀಕ್ಷೆ , ಆರೋಗ್ಯ, ಕೃಷಿ, ಶಿಕ್ಷಣ ಕ್ಷೇತ್ರಗಳಲ್ಲಿ ಹೆಚ್ಚಿನ ಹೂಡಿಕೆ, ಹೊಸ ಹೊಸ ಉಪಕ್ರಮಗಳು, ಮೂಲಸೌಕರ್ಯ ವೃದ್ಧಿಗೆ ಕ್ರಮ
• ಕೃಷಿಕರ ಆದಾಯ ದ್ವಿಗುಣಗೊಳಿಸುವ ನಿಟ್ಟಿನಲ್ಲಿ ರಸಗೊಬ್ಬರ ಸಬ್ಸಿಡಿ ಇನ್ನಷ್ಟು ಹೆಚ್ಚಳ, ಕೃಷಿ ನವೋದ್ಯಮಗಳಿಗೆ ಉತ್ತೇಜನ
• ಪ್ರವಾಸೋದ್ಯಮ ಮತ್ತು ಪೂರಕ ಕ್ಷೇತ್ರಗಳ ಬೆಳವಣಿಗೆಗೆ ಹೊಸ ಉಪಕ್ರಮಗಳು, ಯೋಜನೆ
• ಪಿಎಫ್ ಹೂಡಿಕೆ ಮಿತಿ 4 ಲಕ್ಷ ರೂ.ಗೆ ಹೆಚ್ಚಳ
• ವರ್ಕ್ ಫ್ರಂ ಹೋಮ್ ಭತ್ಯೆ, ತೆರಿಗೆ ವಿನಾಯಿತಿ
• ರಿಯಲ್ ಎಸ್ಟೇಟ್ ಉತ್ತೇಜನಕ್ಕಾಗಿ ತೆರಿಗೆಯಲ್ಲಿ ಹೋಮ್ೋನ್ ಕಡಿತ ಮಿತಿ 2 ಲಕ್ಷ ರೂ.ಗೆ ಹೆಚ್ಚಿಸುವುದು
• ಚಿಲ್ಲರೆ ವ್ಯಾಪಾರೋದ್ಯಮಕ್ಕೆ ನೆರವಾಗಬಲ್ಲ ರಾಷ್ಟ್ರೀಯ ಚಿಲ್ಲರೆ ವ್ಯಾಪಾರ ನೀತಿ ಅನುಷ್ಠಾನ

ರಾಜ್ಯದ ನಿರೀಕ್ಷೆಗಳು

• ಜಿಎಸ್​ಟಿ ಪರಿಹಾರ 2023ಕ್ಕೆ ಸ್ಥಗಿತ, ಇನ್ನೂ 5 ವರ್ಷ ವಿಸ್ತರಿಸಬೇಕು
• ಚೆನ್ನೈ-ಬೆಂಗಳೂರು-ಮುಂಬೈ ಆರ್ಥಿಕ ಕಾರಿಡಾರ್ ಜಾರಿಗೆ ಆರ್ಥಿಕ ನೆರವು
• ರಾಷ್ಟ್ರೀಯ ಹೆದ್ದಾರಿಗಳ ಅಭಿವೃದ್ಧಿ
• ಸಣ್ಣ, ಅತಿ ಸಣ್ಣ ಕೈಗಾರಿಕೆಗಳಿಗೆ ಕಚ್ಚಾವಸ್ತುಗಳ ಮೇಲಿನ ಕಸ್ಟಮ್ ಡ್ಯೂಟಿ, ಆಮದು ಸುಂಕ ಕಡಿತ
• ಬೆಂಗಳೂರು ಮೂಲಸೌಕರ್ಯ ಅಭಿವೃದ್ಧಿಗೆ 25 ಸಾವಿರ ಕೋಟಿ ರೂ.ಅನುದಾನದ ಬೇಡಿಕೆ
• ನೀರಾವರಿ ಯೋಜನೆಗಳಿಗೆ ಅಗತ್ಯವಿರುವ 2.50 ಲಕ್ಷ ಕೋಟಿ ರೂ. ನೆರವು
• ಕುಂಟುತ್ತ ಸಾಗುತ್ತಿರುವ ರೈಲ್ವೆ ಯೋಜನೆಗಳಿಗೆ ಟೇಕಾಫ್ ನೀಡಲು ಅನುದಾನ ಒದಗಿಸುವುದು

ಬೆಳವಣಿಗೆ ಮುನ್ನೋಟ

• 2021-22ರ ನೈಜ ಜಿಡಿಪಿ ಬೆಳವಣಿಗೆ 9.2%
• 2022-23ರ ಜಿಡಿಪಿ ಬೆಳವಣಿಗೆ ಮುನ್ನೋಟ ಶೇಕಡ 8 ರಿಂದ 8.5, 2021-22ರಲ್ಲಿ ಸರ್ಕಾರದ ವೆಚ್ಚಕ್ಕೆ ಸಂಬಂಧಿಸಿ ಒಟ್ಟು ಬಳಕೆ ಪ್ರಮಾಣ ಶೇಕಡ 7 ಬೆಳವಣಿಗೆ
• 2021-22ರಲ್ಲಿ ಕೃಷಿ ಮತ್ತು ಪೂರಕ ಕ್ಷೇತ್ರಗಳ ಬೆಳವಣಿಗೆ ಶೇಕಡ 3.9 ಹೆಚ್ಚಳ
• 2021-22ರಲ್ಲಿ ಸೇವಾ ವಲಯದ ಬೆಳವಣಿಗೆ ಶೇಕಡ 8.2ರ ಪ್ರಗತಿ ದಾಖಲಿಸುವ ನಿರೀಕ್ಷೆ
• 2022-23ರಲ್ಲಿ ಎದುರಾಗುವ ಸವಾಲುಗಳನ್ನು ಎದುರಿಸಲು ಅರ್ಥವ್ಯವಸ್ಥೆ ಸಜ್ಜಾಗಿದೆ
• ಖಾಸಗಿ ವಲಯದಲ್ಲಿ ಹೂಡಿಕೆ ಪ್ರಮಾಣ ಹೆಚ್ಚಿದ ಕಾರಣ ಹಣಕಾಸು ವ್ಯವಸ್ಥೆ ಉತ್ತಮ ಸ್ಥಿತಿಯಲ್ಲಿ ಮುಂದುವರಿದು, ಅರ್ಥವ್ಯವಸ್ಥೆಯ ಪುನಶ್ಚೇತನಕ್ಕೆ ನೆರವಾಗಿದೆ.
• ವಿಸ್ತೃತ ಪ್ರಮಾಣದಲ್ಲಿ ಲಸಿಕೆ ಅಭಿಯಾನ ಮತ್ತು ಪೂರೈಕೆ ಭಾಗದ ಸುಧಾರಣೆ ಮತ್ತು ನಿಯಮಗಳಲ್ಲಿ ಸುಧಾರಣೆ ತಂದಿರುವ ಕಾರಣ 2023ರಲ್ಲಿ ಬೆಳವಣಿಗೆ ಹೆಚ್ಚಿನ ಪ್ರಗತಿ ದಾಖಲಿಸಲಿದೆ.

ಶೇ.8-8.5 ಜಿಡಿಪಿ

ನವದೆಹಲಿ: ಕ್ಷಿಪ್ರವೇಗದ ಆರ್ಥಿಕತೆಯಾಗಿ ಉಳಿಯಲಿರುವ ಭಾರತ ಪ್ರಸಕ್ತ ಹಣಕಾಸು ವರ್ಷದಲ್ಲಿ ಶೇಕಡ 9.2 ಜಿಡಿಪಿ ಬೆಳವಣಿಗೆ ದಾಖಲಿಸಲಿದ್ದು, ಮುಂದಿನ ಹಣಕಾಸು ವರ್ಷದಲ್ಲಿ ಜಿಡಿಪಿ ಬೆಳವಣಿಗೆ ದರ ಶೇಕಡ 8 ರಿಂದ 8.5ರ ನಡುವೆ ಇರಲಿದೆ ಎಂದು ಕೇಂದ್ರ ಹಣಕಾಸು ಸಚಿವೆ ನಿರ್ಮಲಾ ಸೀತಾರಾಮನ್ ವಿಶ್ವಾಸ ವ್ಯಕ್ತಪಡಿಸಿದ್ದಾರೆ. ಲೋಕಸಭೆಯಲ್ಲಿ ಸೋಮವಾರ ದೇಶದ ಆರ್ಥಿಕ ಸಮೀಕ್ಷೆ 2021-22ರ ವರದಿ ಮಂಡಿಸುತ್ತ ಈ ವಿವರ ನೀಡಿದರು. 2025ರ ಹಣಕಾಸು ವರ್ಷದ ವೇಳೆ ಭಾರತ 5 ಲಕ್ಷ ಕೋಟಿ ಡಾಲರ್​ನ ಅರ್ಥವ್ಯವಸ್ಥೆಯಾಗಿ ರೂಪುಗೊಳ್ಳಬೇಕಾದರೆ ಅಂದಾಜು 1.4 ಲಕ್ಷ ಕೋಟಿ ಡಾಲರ್ ಅನ್ನು ಮೂಲಸೌಕರ್ಯ ಕ್ಷೇತ್ರದಲ್ಲಿ ಹೂಡಿಕೆ ಮಾಡಬೇಕಾದ ಅವಶ್ಯಕತೆ ಇದೆ. ಆದಾಗ್ಯೂ, ಜಾಗತಿಕ ಹಣದುಬ್ಬರ ಮತ್ತು ಸಾಂಕ್ರಾಮಿಕ ಸಂಬಂಧಿತ ತೊಂದರೆಗಳನ್ನು ಎದುರಿಸ ಬೇಕಾಗಬಹುದು ಎಂದು ಸಚಿವೆ ನಿರ್ಮಲಾ ಎಚ್ಚರಿಸಿದರು.

https://www.vijayavani.net/rrr-cinema-release-date-fixed/