ತಂತ್ರಜ್ಞಾನದ ಮೂಲಕ ಸುಧಾರಣೆಯ ಸ್ಪರ್ಶ ಬಹುತೇಕ ರಂಗಗಳಿಗೆ ಸಿಕ್ಕಿದೆ. ಶೈಕ್ಷಣಿಕ ರಂಗದಲ್ಲೂ ಹಂತಹಂತವಾಗಿ ಇದು ಸಾಧ್ಯವಾಗುತ್ತಿದೆಯಾದರೂ, ಉನ್ನತ ಶಿಕ್ಷಣ ವ್ಯವಸ್ಥೆ ಮಾತ್ರ ಮಹತ್ವದ ಸುಧಾರಣೆಗಳಿಂದ ದೂರವಿತ್ತು. ಈ ಕೊರತೆಯನ್ನು ನಿವಾರಿಸಲು ಮುಂದಡಿ ಇಟ್ಟಿರುವ ರಾಜ್ಯ ಸರ್ಕಾರ ವಿದ್ಯಾರ್ಥಿಗಳಿಗೂ, ಅಧ್ಯಾಪಕರಿಗೂ ಅನುಕೂಲವಾಗುವಂಥ ಮತ್ತು ಅಪಸವ್ಯಗಳನ್ನು ನಿವಾರಿಸುವಂಥ ಸುಧಾರಣೆಗೆ ಮುಂದಾಗಿದೆ. ಮುಖ್ಯವಾಗಿ, ಸರ್ಕಾರಿ ಕಾಲೇಜುಗಳಲ್ಲಿ ಸಮರ್ಪಕ ಬೋಧನೆ ನಡೆಯುವುದಿಲ್ಲ. ಕೆಲ ಅಧ್ಯಾಪಕರು ವಾರದ ಎರಡು-ಮೂರು ದಿನ ಮಾತ್ರ ತರಗತಿ ತೆಗೆದುಕೊಳ್ಳುತ್ತಾರೆ. ಇದರಿಂದ ವಿದ್ಯಾರ್ಥಿಗಳು ವಿಷಯಗಳನ್ನು ಸರಿಯಾಗಿ ಗ್ರಹಿಸಲು ಆಗದೆ, ಓದಿನಲ್ಲಿ ಆಸಕ್ತಿ ಕಳೆದುಕೊಳ್ಳುವಂತಾಗುತ್ತದೆ ಎಂಬ ದೂರುಗಳು ಇಂದು-ನಿನ್ನೆಯದೇನಲ್ಲ. ಆದರೆ, ಈ ಹಳೆ ಸಮಸ್ಯೆಗೆ ಮದ್ದೆರೆಯುವುದು ಹೇಗೆ? ಬೋಧನೆ, ಕಲಿಕೆ, ಅದರ ಪರಿಣಾಮ ಈ ಎಲ್ಲದರಲ್ಲಿ ಪಾರದರ್ಶಕ ವ್ಯವಸ್ಥೆಯನ್ನು ರೂಪಿಸುವುದು ಹೇಗೆ ಎಂಬ ಪ್ರಶ್ನೆಗೆ ಪರಿಹಾರಸೂತ್ರವನ್ನು ಸರ್ಕಾರ ಕಂಡುಕೊಂಡಿದೆ.
