ಕರ್ನಾಟಕದಲ್ಲಿ ಈಗಾಗಲೇ ಕರೊನಾ ಸೋಂಕಿತರ ಚಿಕಿತ್ಸೆಗೆಂದು 8 ಸಾವಿರ ಹಾಸಿಗೆಗಳನ್ನು ಸಜ್ಜಾಗಿಸಿದ್ದು, ಈ ಸಾಮರ್ಥ್ಯವನ್ನು 16 ಸಾವಿರಕ್ಕೆ ಏರಿಸುವ ಗುರಿ ಹೊಂದಲಾಗಿದೆ. ಕರೊನಾ ನಿಗ್ರಹ ಕಾರ್ಯದಲ್ಲಿ ತೊಡಗಿಕೊಂಡಿರುವ ಆರೋಗ್ಯ ಕಾರ್ಯಕರ್ತರಿಗೆ ಮೂಲಸೌಕರ್ಯ ಸಮಸ್ಯೆಯಿಲ್ಲ ಎಂದು ಸರ್ಕಾರ ಹೇಳಿಕೊಂಡಿದೆ. ಆದರೆ, ಹೊರರಾಜ್ಯ ಮತ್ತು ಹೊರದೇಶಗಳಿಂದ ಬಂದು ಕ್ವಾರಂಟೈನ್ ಆದವರಿಗೆ ಊಟ ಮತ್ತಿತರ ವ್ಯವಸ್ಥೆಗಳು ಸರಿಯಾಗಿ ಆಗುತ್ತಿಲ್ಲ ಎಂಬ ಅಸಮಾಧಾನ ಕೆಲವೆಡೆಗಳಿಂದ ವ್ಯಕ್ತವಾಗುತ್ತಿದೆ. ಈ ಕುರಿತು ಕೆಲವರು ವೀಡಿಯೊ ಮಾಡಿ ಅಳಲು ಹಂಚಿಕೊಂಡಿದ್ದಾರೆ. ಸರ್ಕಾರ ಈ ಬಗ್ಗೆ ತುರ್ತು ಗಮನಹರಿಸಿ ಸಮಸ್ಯೆಗಳಿದ್ದರೆ ಸರಿಪಡಿಸುವ ಕೆಲಸ ಆಗಬೇಕಾಗಿದೆ. ಏಕೆಂದರೆ, ಕರೊನಾಪೀಡಿತರು ಮತ್ತು ಶಂಕಿತರು ಮಾನಸಿಕ ತುಮುಲ ಎದುರಿಸುತ್ತಿದ್ದು, ಸೂಕ್ಷ್ಮರೀತಿಯಲ್ಲಿ ಅವರ ಕಾಳಜಿವಹಿಸಬೇಕಿದೆ. ಒಟ್ಟಾರೆ ಕರೊನಾ ಪರಿಸ್ಥಿತಿಯ ನಿರ್ವಹಣೆಯ ಜವಾಬ್ದಾರಿಯನ್ನು ಸರ್ಕಾರವೇ ವಹಿಸಿಕೊಂಡಿದ್ದು, ಈ ಕಾರ್ಯಕ್ಕೆ ಮೆಚ್ಚುಗೆಯೂ ವ್ಯಕ್ತವಾಗುತ್ತಿದೆ. ಕರೊನಾ ವಾರಿಯರ್ಗಳು ಕೂಡ ಉತ್ತಮವಾಗಿ ಕಾರ್ಯನಿರ್ವಹಿಸುತ್ತಿದ್ದು, ಎಲ್ಲೋ ಸಣ್ಣಪುಟ್ಟ ನ್ಯೂನತೆಗಳು ದೊಡ್ಡದಾಗಿ ಬಿಂಬಿತವಾಗದಂತೆ ಸರ್ಕಾರ ಎಚ್ಚರವಹಿಸಬೇಕಿದೆ.
