ಈ ಕಾರ್ಯಪಡೆ ರಾಜ್ಯದಲ್ಲಿ ಡ್ರಗ್ಸ್ ಪೂರೈಕೆ, ಮಾರಾಟ ಜಾಲಕ್ಕೆ ಸಂಪೂರ್ಣ ಕಡಿವಾಣ ಹಾಕುವ ಮಹತ್ತರ ಜವಾಬ್ದಾರಿಯನ್ನು ಹೊತ್ತಿತ್ತು. ಪ್ರತಿ ತಿಂಗಳು ಪೊಲೀಸ್ ಹಿರಿಯ ಮತ್ತು ಕಿರಿಯ ಅಧಿಕಾರಿಗಳ ಸಭೆ, ಮಾದಕ ವಸ್ತು ಪೂರೈಕೆ ಮೂಲ ಪತ್ತೆ ಹಚ್ಚಬೇಕಾದ ಕಾರ್ಯ ಮಾಡಬೇಕಿತ್ತು. ವಹಿಸಿಕೊಂಡ ಜವಾಬ್ದಾರಿಯನ್ನು ಅದು ಮರೆತಿದ್ದರ ಪರಿಣಾಮವಾಗಿ, ಬೇಲಿಯೇ ಎದ್ದು ಹೊಲ ಮೇಯ್ದಂತೆ ರಾಜಾರೋಷವಾಗಿ ಪೊಲೀಸ್ ಅಧಿಕಾರಿ, ಸಿಬ್ಬಂದಿಗಳು ಮೋಜು-ಮಸ್ತಿ ಮಾಡಿದ್ದಾರೆ. ಇದರಿಂದ ದಂಧೆಕೋರರಿಗೆ ಆನೆ ಬಲ ಬಂದಂತಾಗಿದೆ. ರಾಜ್ಯದಲ್ಲಿ ಪತ್ತೆಯಾಗುವ ಡ್ರಗ್ಸ್ ಪೈಕಿ ಬೆಂಗಳೂರಿನ ಪಾಲು ಶೇ. 50ರಷ್ಟಿರುತ್ತದೆ. ವರ್ಷದಿಂದ ವರ್ಷಕ್ಕೆ ಡ್ರಗ್ಸ್ ಪ್ರಕರಣಗಳ ಸಂಖ್ಯೆ ಹೆಚ್ಚಾಗುತ್ತಿದೆ. ಪೊಲೀಸ್ ಇಲಾಖೆಯಿಂದ ಮಾದಕ ದ್ರವ್ಯ ಗಳ ವಿರುದ್ಧ ಕಳೆದ ವರ್ಷ 3,602 ಶಾಲಾ-ಕಾಲೇಜುಗಳಲ್ಲಿ 5.5 ಲಕ್ಷ ಮಕ್ಕಳಿಗೆ ಬೋಧನೆ ಮಾಡಲಾಗಿದೆ. 4,333 ಕಾಲೇಜುಗಳಲ್ಲಿ 6.15 ಲಕ್ಷ ಮಕ್ಕಳೊಂದಿಗೆ ವಿಶೇಷ ಕಾರ್ಯಕ್ರಮ ಹಮ್ಮಿಕೊಳ್ಳಲಾಗಿದೆ ಎಂದು ಪೊಲೀಸ್ ಇಲಾಖೆಯ ಅಂಕಿಅಂಶಗಳು ಹೇಳುತ್ತವೆ.
