ಪಾಕಿಸ್ತಾನ ಪದೇಪದೆ ಗಂಭೀರ ಪ್ರಮಾದಗಳನ್ನು ಮಾಡುತ್ತಿದೆ. ಆದರೆ, ವಿನಾಕಾರಣ ಭಾರತದ ಮೇಲೆಯೇ ಆರೋಪ ಹೊರಿಸುತ್ತಿದೆ. ಭಯೋತ್ಪಾದನೆಯನ್ನು ನಿಗ್ರಹಿಸಲಾಗದ, ಉಗ್ರರಿಗೆ ಆಶ್ರಯ ನೀಡಿರುವ, ಉಗ್ರ ಸಂಘಟನೆಗಳನ್ನು ಪೋಷಿಸುತ್ತಿರುವ ಪಾಕಿಸ್ತಾನ ಭಯೋತ್ಪಾದನೆ ರಫ್ತು ಮೂಲಕ ಶಾಂತಿಗೆ ಕಂಟಕವಾಗಿದೆ. ವಾಸ್ತವ ಹೀಗಿರುವಾಗ ಭಾರತದ ಮೇಲೆ ದಾಳಿ ನಡೆಸುವ ಯುದ್ಧೋನ್ಮಾದದ ಮಾತುಗಳನ್ನು ಆಡುತ್ತಿದೆ. ಆ ದೇಶ ಎಂದೂ ಸುಧಾರಿಸುವುದಿಲ್ಲ, ತನ್ನ ತಪು್ಪಗಳನ್ನು ಒಪ್ಪಿಕೊಳ್ಳುವುದಿಲ್ಲ ಎಂಬುದಕ್ಕೆ ಈ ಬೆಳವಣಿಗೆಗಳು ಸಾಕ್ಷಿಯಾಗಿವೆ. ‘ಆಪರೇಷನ್ ಸಿಂಧೂರ’ ಜಾರಿಯಲ್ಲಿದೆ ಎಂದು ಹೇಳುವ ಮೂಲಕ ಭಾರತ ಸ್ಪಷ್ಟ ಸಂದೇಶ ರವಾನಿಸಿದೆ. ಆದರೆ, ತನ್ನ ಬೇಜವಾಬ್ದಾರಿ ನಡವಳಿಕೆ ಮತ್ತು ಹೇಳಿಕೆಗಳಿಂದ ಪಾಕ್ ಭಾರತದ ತಾಳ್ಮೆಯನ್ನು ಪರೀಕ್ಷಿಸುತ್ತಿದೆ ಮತ್ತು ಉದ್ವಿಗ್ನತೆಯನ್ನು ಹೆಚ್ಚಿಸುತ್ತಿದೆ. ಇದಕ್ಕಾಗಿ ದೊಡ್ಡ ಬೆಲೆ ತೆರಬೇಕಾಗುತ್ತದೆ ಎಂಬ ವಾಸ್ತವವನ್ನು ಪಾಕ್ ಮರೆತಂತಿದೆ. ಭಾರತದ ಸೇನೆ ಯಾವುದೇ ಸವಾಲು, ಸಂದರ್ಭವನ್ನು ಎದುರಿಸಲು ಸನ್ನದ್ಧವಾಗಿದೆ. ಸೂಕ್ತ ಕಾರ್ಯಾಚರಣೆಗೆ ಮುಕ್ತ ಸ್ವಾತಂತ್ರ್ಯವನ್ನು ಸೇನೆಗೆ ಕೇಂದ್ರ ಸರ್ಕಾರ ನೀಡಿದೆ. ಹಾಗಾಗಿ, ಪಾಕ್ ತನ್ನ ನಿಲುವು ಬದಲಿಸಿಕೊಂಡು, ತಪ್ಪನ್ನು ಒಪ್ಪಿಕೊಂಡರೆ ಕ್ಷೇಮ. ಇಲ್ಲದಿದಲ್ಲಿ ತನ್ನ ಪಾಪಕ್ಕೆ ತಕ್ಕ ಶಾಸ್ತಿ ಅನುಭವಿಸುವ ಕಾಲ ದೂರವಿಲ್ಲ.
