ಅಧಿವೇಶನ ಮುಂದೂಡಿದ ಬಳಿಕ ಸಂಪ್ರದಾಯದಂತೆ ವಿಧಾನಸಭಾಧ್ಯಕ್ಷ ಯು.ಟಿ. ಖಾದರ್ ಮತ್ತು ವಿಧಾನಪರಿಷತ್ ಸಭಾಪತಿ ಬಸವರಾಜ ಹೊರಟ್ಟಿ ಸುದ್ದಿಗೋಷ್ಠಿ ನಡೆಸಿ, ಕಲಾಪದ ವಿವರಗಳನ್ನು ನೀಡಿದ್ದಾರೆ. ದುರದೃಷ್ಟವಶಾತ್ ಯಾವುದೇ ಚರ್ಚೆ, ಸಮಾಲೋಚನೆ ಇಲ್ಲದೆ ಗದ್ದಲದಲ್ಲೇ ಹಲವು ಮಹತ್ವದ ವಿಧೇಯಕಗಳು ಅಂಗೀಕಾರಗೊಂಡಿರುವುದನ್ನು ಒಪ್ಪಿಕೊಂಡಿದ್ದಾರೆ. ‘ಜನರ ತೆರಿಗೆ ಹಣದಲ್ಲಿ ಹೀಗೆ ಗದ್ದಲ ನಡೆದರೆ ನಾವು ಜನರಿಗೆ ಏನು ಉತ್ತರ ಹೇಳಬೇಕು’ ಎಂದೂ ಪ್ರಶ್ನಿಸಿದ್ದಾರೆ. ಹೊರಟ್ಟಿ ಅವರೇ ಹೇಳಿರುವ ಪ್ರಕಾರ, ಸದಸ್ಯರು ಅಧಿವೇಶನದಲ್ಲಿ ಕೇಳಿದ ಒಂದು ಪ್ರಶ್ನೆಗೆ ಉತ್ತರ ಕೊಡಿಸಲು ಸುಮಾರು 92 ಸಾವಿರ ರೂ. ಖರ್ಚಾಗುತ್ತದೆ. ಈ ವೆಚ್ಚ ಪ್ರತಿ ಪ್ರಶ್ನೆಗೂ ಅದರ ಸ್ವರೂಪದ ಆಧಾರದ ಮೇಲೆ ಬದಲಾಗುತ್ತದೆ ಎಂಬುದೇನೋ ನಿಜ. ಆದರೆ ಇದರ ನೇಪಥ್ಯದಲ್ಲಿ ಹಲವಾರು ನೌಕರರು, ಅಧಿಕಾರಿಗಳು ಉತ್ತರ ಒದಗಿಸುವುದಕ್ಕಾಗಿ ಕೆಲಸ ಮಾಡಿರುತ್ತಾರೆ. ಸದನದಲ್ಲಿ ಬರುವ ಪ್ರಶ್ನೆಗಳು, ಗಮನ ಸೆಳೆಯುವ ಸೂಚನೆಗಳಿಂದಾಗಿ ಜನರ ಕೆಲಸಗಳೂ ತ್ವರಿತ ಗತಿಯಲ್ಲಿ ಆಗುತ್ತವೆ. ಆದರೆ ಗದ್ದಲದಿಂದಾಗಿ ಪ್ರಶ್ನೆಗಳೇ ಪ್ರಸ್ತಾಪವಾಗದಿದ್ದರೆ, ಚರ್ಚೆಯಾಗದಿದ್ದರೆ ಜನರ ಸಮಸ್ಯೆ ಬಗೆಹರಿಯುವುದೆಂತು? ಅಧಿಕಾರಶಾಹಿ ಜಡತ್ವ ಕಳೆದುಕೊಂಡು ಚುರುಕಾಗುವುದು ಹೇಗೆ? ಶಾಸನಸಭೆಗಳು ಉತ್ತಮವಾಗಿ ನಡೆದರೆ ಜನರಿಗೆ ಸ್ವಲ್ಪವಾದರೂ ನ್ಯಾಯ ದೊರಕಿಸಲು ಸಾಧ್ಯ ಎಂಬುದನ್ನು ಎಲ್ಲ ಚುನಾಯಿತ ಜನಪ್ರತಿನಿಧಿಗಳೂ ಅರಿತುಕೊಳ್ಳಬೇಕು.
