ಕಥೆ, ಕವನ, ಕಾದಂಬರಿ, ನಾಟಕ, ಮಕ್ಕಳ ಸಾಹಿತ್ಯ, ಅನುವಾದ ಹೀಗೆ ಸಾಹಿತ್ಯದ ಎಲ್ಲ ಪ್ರಕಾರಗಳಲ್ಲೂ ತಮ್ಮದೇ ಆದ ವಿಶಿಷ್ಟ ಛಾಪನ್ನು ಮೂಡಿಸಿ ಕನ್ನಡ ನಾಡಿನ ಜನ-ಮನವನ್ನು ಸೂರೆಗೊಂಡರು. ಸೃಜನಶೀಲತೆಯ ಬಗ್ಗೆ ಅಪಾರವಾದ ನಂಬಿಕೆ ಇರಿಸಿ, ಭಾವಕೋಮಲತೆಗೆ ಮನಸೋತವರು. ಹಾಗಾಗಿ, ಅವರ ಮಾತುಗಳು ಕೂಡ ಅಷ್ಟೇ ಮೃದುವಾಗಿದ್ದವು. ‘ಮೃದುಮಾತಿನಿಂದ ಹೃದಯ ಮುಟ್ಟಬಹುದು’ ಎಂದು ಹೇಳಿ, ಹಾಗೆಯೇ ನಡೆದುಕೊಂಡರು. ಸಾಹಿತ್ಯ ರಂಗದಲ್ಲಿ ಹಲವು ಹೊಸ ಪ್ರತಿಭೆ, ಶಿಷ್ಯರನ್ನು ಬೆಳೆಸಿ, ಪ್ರೋತ್ಸಾಹಿಸಿದರು. ಆದ್ದರಿಂದಲೇ ಸಾರಸ್ವತ ಪ್ರಪಂಚದ ಅರಳೀಮರದಂತಿದ್ದ ಎಚ್ಚೆಸ್ವಿ ನೆರಳಲ್ಲಿ ಅನೇಕ ಸಾಹಿತ್ಯಸುಮಗಳು ಅರಳಿ, ಬೌದ್ಧಿಕ ಪರಿಮಳ ಬೀರುತ್ತಿವೆ.
