ನಿಜಕ್ಕೂ ಇದೊಂದು ಆಘಾತಕಾರಿ ಘಟನೆ. ಪುಟ್ಟ ಮಕ್ಕಳು ಹಿಂಸೆಯ ಬಗ್ಗೆ ಯೋಚಿಸುತ್ತಾರೆ ಮತ್ತು ಅಂಥ ಕೃತ್ಯಗಳನ್ನು ಮಾಡಲು ಕೈಗೆ ಗನ್ ತೆಗೆದುಕೊಳ್ಳುತ್ತಾರೆ ಎಂಬ ಅಂಶವೇ ಚಿಂತಾಜನಕ. ನಮ್ಮಲ್ಲಿನ ಸಾಮಾಜಿಕ ಸ್ವಾಸ್ಥ್ಯ ಮತ್ತು ಶೈಕ್ಷಣಿಕ ವಾತಾವರಣದ ಮೇಲೆಯೂ ಈ ಘಟನೆ ಪ್ರಶ್ನೆ ಮೂಡಿಸಿದೆ. ಅಷ್ಟಕ್ಕೂ, ಗನ್ ಸೇರಿದಂತೆ ಇತರ ಶಸ್ತ್ರಾಸ್ತ್ರ ಪಡೆದುಕೊಳ್ಳಲು ಭಾರತದಲ್ಲಿ ಬಿಗಿ ನಿಯಮಗಳಿವೆ. ಅಮೆರಿಕದಂತೆ ಕೆಲವೇ ಗಂಟೆಗಳಲ್ಲಿ ಬಂದೂಕು ಖರೀದಿಸಲು ಇಲ್ಲಿ ಸಾಧ್ಯವಿಲ್ಲ. ವ್ಯಕ್ತಿಯ ಹಿನ್ನೆಲೆ, ಪೂರ್ವಾಪರ ಮತ್ತು ಶಸ್ತ್ರದ ಅವಶ್ಯಕತೆ ಇದನ್ನೆಲ್ಲ ಸಮಗ್ರವಾಗಿ ಅವಲೋಕಿಸಿಯೇ ಲೈಸೆನ್ಸ್ ನೀಡುವುದು ವಾಡಿಕೆ. ಆದರೆ, ಈಗ ಮಕ್ಕಳ ಕೈಗೂ ಬಂದೂಕು ಸಿಗುತ್ತಿದೆ ಎಂದರೆ, ಅಡ್ಡಮಾರ್ಗಗಳಲ್ಲಿ ಇದನ್ನು ಪಡೆಯಲಾಗುತ್ತಿದ್ದೆಯೇ, ಇಂಥ ಜಾಲಗಳು ಹುಟ್ಟಿಕೊಂಡು ಸಮಾಜಕ್ಕೆ ಘಾತಕವಾದ ಕೃತ್ಯಗಳನ್ನು ಎಸಗುತ್ತಿವೆಯೇ ಎಂಬ ಬಗ್ಗೆ ತನಿಖೆ ನಡೆಯಬೇಕಿದೆ.
