ಡೊನಾಲ್ಡ್ ಟ್ರಂಪ್ ಅವರು ಎರಡನೆಯ ಬಾರಿ ಶ್ವೇತಭವನ ಪ್ರವೇಶಿಸಿದ ನಂತರದಲ್ಲಿ ಕೈಗೊಳ್ಳುತ್ತಿರುವ ನಿರ್ಧಾರಗಳು, ಆಡುತ್ತಿರುವ ಮಾತುಗಳು ಜಾಗತಿಕವಾಗಿ ಸಂಚಲನ ಮೂಡಿಸುತ್ತಿವೆ. ಹಾಗೇ, ಹೊಸ ಜಾಗತಿಕ ಸಮೀಕರಣಕ್ಕೂ ಇದು ಮುನ್ನುಡಿ ಬರೆದಿದೆ. ಅದರಲ್ಲೂ ಸುಂಕ ವಿಚಾರದಲ್ಲಿ ಟ್ರಂಪ್ ಘೋಷಣೆಗಳು ವ್ಯಾಪಕ ಪರಿಣಾಮಕ್ಕೆ ಕಾರಣವಾಗಿವೆ. ‘ಮೇಕ್ ಅಮೆರಿಕಾ ಗ್ರೇಟ್ ಅಗೇನ್’ ಎಂಬ ಘೋಷಣೆ ಮೂಲಕ ಚುನಾವಣಾ ಪ್ರಚಾರ ನಡೆಸಿದ ಟ್ರಂಪ್, ಅಧಿಕಾರಕ್ಕೇರಿದ ಬಳಿಕ ತೆಗೆದುಕೊಳ್ಳುತ್ತಿರುವ ನಿರ್ಣಯಗಳು ನಿಜಕ್ಕೂ ಅಮೆರಿಕಾವನ್ನು ಗ್ರೇಟ್ ಆಗಿಸಬಲ್ಲವೆ ಎಂಬ ಅನುಮಾನ ಬೇರೆಯವರಿಗಿರಲಿ, ಖುದ್ದು ಅಮೆರಿಕನ್ನರಿಗೇ ಮೂಡಿದೆ. ಏಕೆಂದರೆ, ಸುಂಕ ಹೆಚ್ಚಳವು ಅಮೆರಿಕಕ್ಕೆ ರಫ್ತು ಮಾಡುವ ದೇಶಗಳ ಮೇಲೆ ಮಾತ್ರ ಪರಿಣಾಮ ಬೀರುವುದಿಲ್ಲ.
