ಸ್ವಾಮಿ ವಿವೇಕಾನಂದರು ಮಾನವ ಇತಿಹಾಸದಲ್ಲಿ ಸಮಾಜದ ಮೇಲೆ ಬೀರಿದ ಪ್ರಭಾವ ಅತ್ಯಪಾರ ಹಾಗೂ ಅಸಾಧಾರಣವೂ ಹೌದು. ಶಕ್ತಿ, ಸ್ವಾಭಿಮಾನ, ಸ್ವಾವಲಂಬನೆ, ಸೇವೆ, ಆತ್ಮವಿಶ್ವಾಸ, ಯೋಗ್ಯ ವ್ಯಕ್ತಿತ್ವ, ರಾಷ್ಟ್ರಭಕ್ತಿ ವಿಚಾರಗಳಲ್ಲಿ ಅವರ ಸ್ಪಷ್ಟ ವಿಚಾರಗಳು ಸಮಾಜವನ್ನು, ವಿಶೇಷವಾಗಿ ಯುವಶಕ್ತಿಯನ್ನು ಮಂತ್ರಮುಗ್ಧರನ್ನಾಗಿಸುತ್ತವೆ. ಕ್ರಿಯಾಶೀಲರಾಗಿ ರೂಪುಗೊಳ್ಳಲು ಪ್ರೇರಣೆ ನೀಡುತ್ತವೆ. ಯುವಸಮೂಹದ ಶಕ್ತಿಯನ್ನು ಗುರುತಿಸಿ ಅದನ್ನು ರಾಷ್ಟ್ರನಿರ್ವಣದ ದಿಕ್ಕಿನಲ್ಲಿ ಹರಿಸಿದ ವಿವೇಕಾನಂದರ ಆದರ್ಶ ಇಂದಿಗೆ ಹೆಚ್ಚು ಪ್ರಸ್ತುತವಾಗಿದೆ. ವಿಶ್ವದಲ್ಲೇ ಅತಿ ಹೆಚ್ಚು ಯುವಕರನ್ನು ಹೊಂದಿರುವ ಭಾರತ ಅವರ ಕೌಶಲ, ಕಾರ್ಯಕ್ಷಮತೆಯ ಬಲದಿಂದ ಹಲವು ರಂಗಗಳಲ್ಲಿ ಸಾಧನೆಯ ಎತ್ತರ ತಲುಪಿದೆ. ಎಲ್ಲ ರಂಗಗಳಲ್ಲೂ ಯುವಕರ ಸಹಭಾಗಿತ್ವ ಹೆಚ್ಚುತ್ತಿದೆಯಾದರೂ; ರಾಜಕೀಯ ರಂಗದಲ್ಲಿ ಮಾತ್ರ ಗಮನಾರ್ಹವಾಗಿಲ್ಲ. ಹಾಗಾಗಿ, ಸಮಸ್ಯೆಗಳ ಬಗ್ಗೆ ದೂರುವುದಕ್ಕಿಂತ ಯುವಸಮೂಹವೇ ರಾಜಕೀಯ ಪ್ರವೇಶಿಸಿ ಆ ಕ್ಷೇತ್ರದ ಶುದ್ಧೀಕರಣ ಜತೆಗೆ ಅಭಿವೃದ್ಧಿಯ ಆಶಯವನ್ನೂ ಈಡೇರಿಸಲು ಇದು ಸಕಾಲ.
