ಅದೇನಿದ್ದರೂ, ನಾಗರಿಕ ಸೇವೆಗಳತ್ತ ಯುವಸಮೂಹದ ಒಲವು ಹೆಚ್ಚುತ್ತಿರುವುದು ಸಕಾರಾತ್ಮಕ ಬೆಳವಣಿಗೆ. ವ್ಯವಸ್ಥೆ ಶುದ್ಧೀಕರಣದ ಪ್ರಕ್ರಿಯೆ ಶುರುವಾಗುವುದೇ ಆಡಳಿತ ಸೇವೆಗಳ ಮೂಲಕ. ಇದು ಯಶಸ್ವಿಯಾಗಬೇಕಾದರೆ ದಕ್ಷ, ಪ್ರಾಮಾಣಿಕ ಅಧಿಕಾರಿವರ್ಗ ಬೇಕು. ಕೆಲ ವರ್ಷಗಳ ಹಿಂದಿನ ನಿದರ್ಶನವನ್ನೇ ತೆಗೆದುಕೊಂಡರೆ ಯುವಕರು ಕೆಲವೇ ವೃತ್ತಿಗಳತ್ತ ಆಕರ್ಷಿತರಾಗುತ್ತಿದ್ದರು. ಅಲ್ಲಿ ಅತಿಯಾದ ಸ್ಪರ್ಧೆ ಏರ್ಪಟ್ಟು, ವಿಚಿತ್ರ ಒತ್ತಡವೂ ಏರ್ಪಡುತ್ತಿತ್ತು. ಇಂಜಿನಿಯರ್ ಅಥವಾ ವೈದ್ಯನಾದರೆ ಮಾತ್ರ ಬದುಕು ಎಂಬಂಥ ಚಿತ್ತಸ್ಥಿತಿ ಈಗ ಬದಲಾಗುತ್ತಿದೆ, ವ್ಯವಸ್ಥೆಯನ್ನು ದೂಷಿಸುತ್ತ ಕೂರುವ ಬದಲು, ತಾವೇ ವ್ಯವಸ್ಥೆ ಬದಲಾವಣೆಯ ಭಾಗವಾಗಬೇಕು, ಇದಕ್ಕಾಗಿ ಆಯಕಟ್ಟಿನ ಹುದ್ದೆಗಳಲ್ಲಿ ಕಾರ್ಯನಿರ್ವಹಿಸುತ್ತ ಪರಿವರ್ತನೆ ತರಬೇಕು ಎಂಬ ಮನೋಭಾವ ಹೆಚ್ಚುತ್ತಿದೆ. ಅದೆಷ್ಟೋ ಜನರು ಯುಪಿಎಸ್ಸಿ ಪರೀಕ್ಷೆಗಾಗಿ ಭಾರಿ ಶ್ರಮ, ಬದ್ಧತೆಯೊಂದಿಗೆ ತಯಾರಿ ನಡೆಸಿದ್ದಾರೆ. ಆರ್ಥಿಕವಾಗಿ ಹಿಂದುಳಿದ ಕುಟುಂಬದ ಯುವಕ/ಯುವತಿಯರು ಗಮನ ಸೆಳೆಯುವಂಥ ಸಾಧನೆ ಮಾಡುತ್ತಿದ್ದು, ಪ್ರತಿಭೆ ಇದ್ದಲ್ಲಿ ಭೌತಿಕ ಬಡತನಕ್ಕೆ ಹೆದರಬೇಕಿಲ್ಲ ಎಂಬುದನ್ನು ರುಜುವಾತು ಮಾಡಿದ್ದಾರೆ. ಅಷ್ಟೇ ಅಲ್ಲ, ಇತ್ತೀಚಿನ ವರ್ಷಗಳಲ್ಲಿ ಯುಪಿಎಸ್ಸಿ ಪರೀಕ್ಷೆಗೆ ಸಜ್ಜುಗೊಳ್ಳಲು ಸೂಕ್ತ ತರಬೇತಿ ಸಿಗುತ್ತಿದ್ದು, ಗ್ರಾಮೀಣ ಪ್ರದೇಶದವರಿಗೂ ವರದಾನವಾಗಿ ಪರಿಣಮಿಸಿದೆ. ಮೊದಲು ದೆಹಲಿ, ಮುಂಬೈಯಂಥ ಪ್ರತಿಷ್ಠಿತ ನಗರಗಳಲ್ಲಿ ಮಾತ್ರ ತರಬೇತಿ ಕೇಂದ್ರಗಳು ಇದ್ದವು. ಈಗ ರಾಜ್ಯದ ಉದಾಹರಣೆಯನ್ನೇ ತೆಗೆದುಕೊಂಡರೆ, ಬೆಂಗಳೂರು, ಹುಬ್ಬಳ್ಳಿ-ಧಾರವಾಡ ಸೇರಿ ಹಲವೆಡೆ ತರಬೇತಿ ಲಭ್ಯವಾಗುತ್ತಿದೆ. ಈಗ ವಿವಿಧ ನಾಗರಿಕ ಸೇವೆಗಳಿಗೆ ಆಯ್ಕೆಯಾಗಿರುವ ಅಭ್ಯರ್ಥಿಗಳು ಕಾರ್ಯದಕ್ಷತೆಯಿಂದ ಗಮನ ಸೆಳೆಯಬೇಕಿದೆ. ಆಡಳಿತಶಾಹಿಯಲ್ಲಿನ ಅಪಸವ್ಯಗಳನ್ನು ದೂರಮಾಡುವ ಜತೆಗೆ, ಆಡಳಿತಯಂತ್ರಕ್ಕೆ ಸುಧಾರಣೆಯ ಸ್ಪರ್ಶ ನೀಡುವ ಹೊಣೆಗಾರಿಕೆಯೂ ಇದೆ. ಈ ಬಾರಿ ಪರೀಕ್ಷೆಯಲ್ಲಿ ಅನುತ್ತೀರ್ಣರಾದವರು, ನಿರಾಶರಾಗದೆ ಮತ್ತೊಂದು ಪ್ರಯತ್ನಕ್ಕೆ ಕೈಹಾಕಿದ್ದಲ್ಲಿ ಯಶಸ್ಸು ಒಲಿಯುವುದು ಕಷ್ಟವೇನಲ್ಲ.
