ರಾಜ್ಯದಲ್ಲಿ ನಡೆಯುವ ಸರ್ಕಾರಿ ಕಾಮಗಾರಿಗಳಲ್ಲಿ ಶೇ.40 ಪರ್ಸೆಂಟೇಜ್ ಆರೋಪ ಮಾಡಿ ಗುತ್ತಿಗೆದಾರರ ಸಂಘ ನೇರವಾಗಿ ಪ್ರಧಾನಿಗೇ ದೂರು ನೀಡಿತ್ತು. ಆಡಳಿತ ಪಕ್ಷದ ಪ್ರಮುಖರು ಈ ಆರೋಪವನ್ನು ನಿರಾಕರಿಸಿದರಾದರೂ ಸಾಕಷ್ಟು ಹಾನಿಯಂತೂ ಆಯಿತು. ಇನ್ನು, ಪಕ್ಷದ ಆಂತರಿಕ ವಲಯದಲ್ಲಿನ ಬೆಳವಣಿಗೆಗಳು ಬೇರೆಯದೇ ಸಂದೇಶ ನೀಡುವಂತಿವೆ. ಆಡಳಿತ ನಿರೀಕ್ಷಿತ ವೇಗದಲ್ಲಿ ನಡೆಯುತ್ತಿಲ್ಲ ಎಂಬ ಭಾವನೆ ಜನರಲ್ಲಿರುವುದು ಸಹ ನಿಜ. ಈ ಎಲ್ಲ ಅಂಶಗಳನ್ನು ವಿರೋಧ ಪಕ್ಷಗಳು ಎತ್ತಿತೋರಿಸಿ ಜನಬೆಂಬಲ ಪಡೆಯಲು ಯತ್ನಿಸುವುದು ಸಹಜ. ಈ ಸಂಗತಿಗಳನ್ನು ಮನಗಂಡಿರುವ ಬಿಜೆಪಿ ಹೈಕಮಾಂಡ್, ಪರಿಸ್ಥಿತಿ ಹೀಗೇ ಮುಂದುವರಿದರೆ ಚುನಾವಣೆ ಎದುರಿಸುವುದು ಕಷ್ಟ ಎಂಬ ತೀರ್ವನಕ್ಕೆ ಬಂದು, ಮುಖ್ಯಮಂತ್ರಿ ಬಸವರಾಜ ಬೊಮ್ಮಾಯಿ ಅವರಿಗೆ ಆಡಳಿತಕ್ಕೆ ಸಂಬಂಧಿಸಿದಂತೆ ಕೆಲ ಸಲಹೆ-ಸೂಚನೆಗಳನ್ನು ನೀಡಿದೆ ಎಂಬ ಮಾಹಿತಿ ಲಭಿಸಿದೆ. ಭ್ರಷ್ಟಾಚಾರದ ವಿರುದ್ಧ ಕ್ರಮವಾಗಬೇಕು; ಅದಕ್ಷ, ಜಡ ಅಧಿಕಾರಿಗಳ ಮೇಲೆ ಕ್ರಮ ಕೈಗೊಳ್ಳುವ ಬಗ್ಗೆ ಪರಿಶೀಲಿಸಬೇಕು ಎಂಬಿತ್ಯಾದಿ ಕಿವಿಮಾತು ಪಕ್ಷದ ವರಿಷ್ಠರಿಂದ ರವಾನೆಯಾಗಿವೆಯಂತೆ. ಕೇಂದ್ರ ಸರ್ಕಾರ ಅದಕ್ಷ ಅಧಿಕಾರಿಗಳನ್ನು ವಜಾಮಾಡುವ ಹೆಜ್ಜೆಯನ್ನೂ ತೆಗೆದುಕೊಂಡಿದ್ದು ಇಲ್ಲಿ ಉಲ್ಲೇಖನೀಯ. ಆ ಮಾದರಿ ರಾಜ್ಯದಲ್ಲೂ ಬರಲಿ ಎಂಂಬುದು ವರಿಷ್ಠರ ಅಪೇಕ್ಷೆ. ಇದರಿಂದ ಸರ್ಕಾರ ಮತ್ತು ಪಕ್ಷದ ಬಗ್ಗೆ ಜನರಲ್ಲಿ ಸಕಾರಾತ್ಮಕ ಇಮೇಜ್ ಬೆಳೆಯುತ್ತದೆ ಎಂಬುದು ಅವರ ಲೆಕ್ಕಾಚಾರ.
