ಕರೊನಾ ಲಾಕ್ ಡೌನ್ ಪರಿಣಾಮವಾಗಿ ಬಹುತೇಕ ಎಲ್ಲ ಉದ್ಯಮಗಳೂ ನಷ್ಟ ಅನುಭವಿಸುತ್ತಿವೆ. ಇದಲ್ಲದೆ, ಕಚ್ಚಾವಸ್ತುಗಳ ಲಭ್ಯತೆ ಬೇರೆ ಕಷ್ಟವಾಗಿದೆ. ಕೈಗಾರಿಕಾ ರಂಗ ನಷ್ಟದಲ್ಲಿದ್ದರೆ ಯಾವುದೇ ದೇಶದ ಆರ್ಥಿಕತೆ ಚೆನ್ನಾಗಿರುವುದು ಸಾಧ್ಯವಿಲ್ಲ. ಹಾಗೇ, ಉದ್ಯೋಗ ಸೃಷ್ಟಿಯಲ್ಲಿ ಕೂಡ ಕೈಗಾರಿಕೆಗಳ ಪಾತ್ರ ಮಹತ್ವದ್ದು. ಸರ್ಕಾರಗಳು ಆರ್ಥಿಕ ಪ್ಯಾಕೇಜ್ ಘೋಷಣೆ ಮಾಡುವುದು ಒಂದು ಬಾಬತ್ತಾದರೆ, ಆ ಯೋಜನೆಗಳ ಫಲ ಅರ್ಹರಿಗೆ ದೊರಕುವಂತೆ ನಿಗಾ ವಹಿಸಬೇಕಾದುದು ಸಹ ಬಹಳ ಮುಖ್ಯ. ಏಕೆಂದರೆ, ಎಷ್ಟೋ ಯೋಜನೆಗಳು ಕಾಗದದ ಮೇಲೆ ಚೆನ್ನಾಗಿ ಕಂಡರೂ, ಅನುಷ್ಠಾನದ ಹಂತದಲ್ಲಿ ವಿಫಲವಾಗುತ್ತವೆ. ಇದರಿಂದ ಯೋಜನೆಯ ಮೂಲೋದ್ದೇಶ ಈಡೇರದು. ಇದೇ ಸಂದರ್ಭದಲ್ಲಿ, ಭಾರತದಲ್ಲಿ ಲಸಿಕಾ ಅಭಿಯಾನಕ್ಕೆ ವೇಗ ದೊರಕಿರುವುದು ಸಹ ಸ್ವಲ್ಪ ಸಮಾಧಾನದ ಸಂಗತಿ. ಕರೊನಾ ನಿಯಂತ್ರಣಕ್ಕೆ ಬಂದಲ್ಲಿ ಉಳಿದ ರಂಗಗಳ ಚೇತರಿಕೆಯತ್ತ ಸರ್ಕಾರಗಳು ಹೆಚ್ಚು ಗಮನನೀಡಬಹುದು.
