ಕೈಗಾರಿಕೆಗಳನ್ನು ಸ್ಥಾಪಿಸಲು ಸರ್ಕಾರವು ಕಡಿಮೆ ಬೆಲೆಯಲ್ಲಿ ಜಮೀನನ್ನು ಒದಗಿಸುತ್ತದೆ. ಅಲ್ಲದೆ, ಯಂತ್ರೋಪಕರಣ ಖರೀದಿಗೆ ಸಬ್ಸಿಡಿ, ತೆರಿಗೆ ವಿನಾಯಿತಿ ಮುಂತಾದ ಸೌಲಭ್ಯಗಳನ್ನು ಕೂಡ ಕಲ್ಪಿಸುತ್ತದೆ. ಕೈಗಾರಿಕೆಗಳು ಸೃಷ್ಟಿಯಾಗಿ ಜನರಿಗೆ ಉದ್ಯೋಗ ಲಭಿಸುವಂತಾಗಲಿ ಎಂಬುದು ಇದರ ಹಿಂದಿನ ಉದ್ದೇಶವಾಗಿರುತ್ತದೆ. ಜತೆಗೆ ಸರ್ಕಾರಕ್ಕೂ ತೆರಿಗೆ ರೂಪದಲ್ಲಿ ಆದಾಯ ಬರುತ್ತದೆ. ಕೈಗಾರಿಕೆಗಳನ್ನು ಪ್ರೋತ್ಸಾಹಿಸಲು ಸರ್ಕಾರ ಬಳಸುವ ಹಣ ಸಾರ್ವಜನಿಕರ ತೆರಿಗೆಯಿಂದ ಬಂದಿರುವಂತಹುದು. ಜಮೀನು ಕೂಡ ಸಾಮಾನ್ಯವಾಗಿ ರೈತರಿಂದ ಕಡಿಮೆ ಬೆಲೆಗೆ ಸ್ವಾಧೀನಪಡಿಸಿಕೊಂಡಿದ್ದೇ ಆಗಿರುತ್ತದೆ. ಹೀಗಾಗಿ, ಕೈಗಾರಿಕೆ ಸ್ಥಾಪನೆ ಹೆಸರಿನಲ್ಲಿ ಕಡಿಮೆ ಬೆಲೆಗೆ ಸರ್ಕಾರದಿಂದ ಪಡೆದುಕೊಂಡ ಭೂಮಿಯನ್ನು ಎಷ್ಟೋ ವರ್ಷಗಳ ಕಾಲ ಹಾಗೆಯೇ ಇಟ್ಟುಕೊಂಡು ನಂತರ ಹೆಚ್ಚಿನ ಬೆಲೆಗೆ ಮಾರಿಕೊಂಡು ಲಾಭ ಮಾಡಿಕೊಳ್ಳುವುದು ಇಲ್ಲವೇ ಬೇರೆಯ ಉದ್ದೇಶಗಳಿಗೆ ಬಳಕೆ ಮಾಡಿಕೊಳ್ಳುವುದು ಸಮ್ಮತದ ಸಂಗತಿಯಲ್ಲ. ವರ್ಷದ ಹಿಂದೆ ಸಚಿವ ನಿರಾಣಿ ಹೇಳಿರುವಂತೆ ಈಗಾಗಲೇ ಗುರುತಿಸಿರುವ ಜಮೀನುಗಳನ್ನು ವಾಪಸು ಪಡೆಯುವ ದಿಟ್ಟ ಕ್ರಮವನ್ನು ಸರ್ಕಾರ ತೋರಬೇಕು. ಆಗ ಉಳಿದವರಿಗೂ ಬಿಸಿ ಮುಟ್ಟಿ, ಕೈಗಾರಿಕೆ ಸ್ಥಾಪನೆಗೆ ಅವರು ಮುಂದಾಗುವ ಸಾಧ್ಯತೆ ಇರುತ್ತದೆ. ಇದೊಂದೇ ಅಲ್ಲ, ಯಾವುದೇ ಸರ್ಕಾರಿ ಯೋಜನೆಯಾದರೂ ಅದರ ಸದ್ಬಳಕೆಗೆ ಆಲೋಚಿಸಬೇಕೆ ವಿನಾ ದುರುಪಯೋಗಕ್ಕಲ್ಲ.
