ಪದವಿ ಕಾಲೇಜುಗಳ ಶಿಕ್ಷಣದ ಗುಣಮಟ್ಟ ಪರಿಶೀಲಿಸಿ ಗ್ರೇಡಿಂಗ್ ನೀಡಲು ವಿಶ್ವವಿದ್ಯಾನಿಲಯಗಳಲ್ಲಿ ನ್ಯಾಕ್ ವ್ಯವಸ್ಥೆ ಇದ್ದು, ಇದೇ ಮಾದರಿಯಲ್ಲಿ ಉದ್ದೇಶಿತ ಏಕೀಕೃತ ಮಂಡಳಿಯಡಿ ‘ಸ್ಕೂಲ್ ಎಕ್ಸಾಮಿನೇಷನ್ ಆಂಡ್ ಅಸೆಸ್ವೆುಂಟ್’ ಹೆಸರಿನ ಮಂಡಳಿ ರಚಿಸಿ, ಇದರ ಮೂಲಕ ಸರ್ಕಾರಿ ಮತ್ತು ಖಾಸಗಿ ಶಾಲಾ-ಕಾಲೇಜುಗಳಿಗೆ ಗ್ರೇಡಿಂಗ್ ನೀಡಲಾಗುವುದು. ಈ ವ್ಯವಸ್ಥೆಯು ಶಾಲಾಕಾಲೇಜುಗಳ ಗುಣಮಟ್ಟ ಪರಿಶೀಲಿಸಲು ಅನುಕೂಲಕರವಾಗಬಹುದು. ಈ ವ್ಯವಸ್ಥೆಗಳನ್ನು ಅನುಷ್ಠಾನಕ್ಕೆ ತರುವಾಗ ವಿದ್ಯಾರ್ಥಿಗಳಿಗೆ ತೊಂದರೆಯಾಗದಂತೆ ಮುನ್ನೆಚ್ಚರಿಕೆ ವಹಿಸಬೇಕಾದ ಅಗತ್ಯವಿದೆ. ಇನ್ನೊಂದೆಡೆ, ಸರ್ಕಾರದ ವೆಚ್ಚ ತಗ್ಗಿಸುವ ಹಾಗೂ ಆಡಳಿತಾತ್ಮಕ ಅನುಕೂಲದ ನಿಟ್ಟಿನಲ್ಲಿ ಕೆಲ ಇಲಾಖೆಗಳನ್ನು-ವಿಭಾಗಗಳನ್ನು ವಿಲೀನಗೊಳಿಸುವ ಕುರಿತು ಮಾಜಿ ಮುಖ್ಯ ಕಾರ್ಯದರ್ಶಿ ವಿಜಯಭಾಸ್ಕರ್ ಸಮಿತಿ ಈಗಾಗಲೇ ಸರ್ಕಾರಕ್ಕೆ ಶಿಫಾರಸು ಮಾಡಿದೆ. ಈ ಶಿಫಾರಸುಗಳನ್ನು ಪರಿಶೀಲಿಸಲು ಕಂದಾಯ ಸಚಿವ ಆರ್.ಅಶೋಕ್ ನೇತೃತ್ವದಲ್ಲಿ ಸಂಪುಟ ಉಪಸಮಿತಿ ರಚಿಸಲಾಗಿದೆ. ಆ ಸಮಿತಿಯ ವರದಿ ಏನಿರುತ್ತದೆಂಬುದು ಕುತೂಹಲಕರ. ಒಟ್ಟಿನಲ್ಲಿ, ಜನರಿಗೆ ತ್ವರಿತವಾಗಿ, ಪಾರದರ್ಶಕವಾಗಿ ಸೇವೆಗಳು ಸಿಗಬೇಕಾದುದು ಮುಖ್ಯ.
