ಯಾವುದು ಆಗಬಾರದೆಂದು ಜಗತ್ತು ಬಯಸುತ್ತಿತ್ತೋ ಅದು ಕೊನೆಗೂ ಆಗಿಯೇಬಿಟ್ಟಿದೆ. ಯೂಕ್ರೇನ್ ಮೇಲೆ ರಷ್ಯಾ ದಾಳಿಮಾಡಿದ್ದು, ಯುದ್ಧ ತುರುಸು ಪಡೆಯುತ್ತಿದೆ. ಇದರೊಂದಿಗೆ, ಇದು ಮೂರನೇ ಮಹಾಯುದ್ಧಕ್ಕೆ ಮುನ್ನುಡಿಯಾಗಬಹುದಾ ಎಂಬ ಆತಂಕವೂ ಗೋಚರಿಸಿದೆ. ಸಮರದ ಪರಿಣಾಮ ಅದಾಗಲೇ ಕಂಡುಬಂದಿದ್ದು, ಕಚ್ಚಾತೈಲ, ಚಿನ್ನ ಇತ್ಯಾದಿ ದರಗಳು ಸರ›ನೆ ಏರಿವೆ. ಭಾರತದ ಮೇಲೂ ಈಗಾಗಲೇ ಪರಿಣಾಮವಾಗಿದೆ. ಒಂದು ಕಾಲದಲ್ಲಿ ರಷ್ಯಾದ ವ್ಯಾಪ್ತಿಯಲ್ಲಿದ್ದ, ಅಲ್ಲಿ ಕಮ್ಯೂನಿಸ್ಟ್ ಕೋಟೆ ಕುಸಿದ ನಂತರ ಸ್ವತಂತ್ರ ದೇಶಗಳಾದವುಗಳ ಪೈಕಿ ಯೂಕ್ರೇನ್ ಸಹ ಒಂದು. ಆ ದೇಶ ಕ್ರಮೇಣವಾಗಿ ಆ ವಲಯದ ಇತರ ಕೆಲ ದೇಶಗಳಂತೆ ಅಮೆರಿಕ ಮತ್ತದರ ಸಹಯೋಗಿಗಳ ಪಶ್ಚಿಮದ ಪ್ರಭಾವಕ್ಕೊಳಗಾದಾಗ, ರಷ್ಯಾಗೆ ಸಹಜವಾಗಿಯೇ ಆತಂಕವಾಯಿತು; ಸುರಕ್ಷತೆ ದೃಷ್ಟಿಯಿಂದ ಇದು ಅದಕ್ಕೆ ಸಮ್ಮತವಾದ ಬೆಳವಣಿಗೆಯಾಗಿರಲಿಲ್ಲ. ಅಧ್ಯಕ್ಷ ವ್ಲಾದಿಮಿರ್ ಪುತಿನ್ ಅವರಂತೂ, ಯೂಕ್ರೇನ್ ರಷ್ಯಾದಿಂದ ಹೊರಹೋದುದನ್ನೇ ಮಾನ್ಯಮಾಡದವರು. ಅಲ್ಲದೆ, ಆ ದೇಶ ಅಮೆರಿಕ ನೇತೃತ್ವದ ನ್ಯಾಟೋ ಕೂಟಕ್ಕೆ ಸೇರಬಾರದೆಂದು ಅವರು ಬಲವಾಗಿ ಆಗ್ರಹಿಸುತ್ತಿದ್ದರು. ಹಾಗೇನಾದರೂ ಆದಲ್ಲಿ ಯೂಕ್ರೇನ್ ಮೇಲೆ ದಾಳಿ ನಡೆಸುವುದಾಗಿ ಎಚ್ಚರಿಸಿದ್ದರು.
