ಇನ್ನು ಈ ತಿಂಗಳ ಆರಂಭದಲ್ಲಿ ನಿವೃತ್ತರಾದ ಮುಖ್ಯ ನ್ಯಾಯಮೂರ್ತಿ ಯು.ಯು. ಲಲಿತ್ ಅವರು ತ್ವರಿತ ನ್ಯಾಯದಾನದ ಪ್ರತಿಪಾದಕ ಎಂದೇ ಹೆಸರು ಮಾಡಿದವರು. ಮುಖ್ಯ ನ್ಯಾಯಮೂರ್ತಿಯಾಗಿ ಅವರು ಕಾರ್ಯನಿರ್ವಹಿಸಿದ್ದು ಕೇವಲ 74 ದಿನಗಳಾದರೂ ದೀರ್ಘಕಾಲಿನ ಪರಿಣಾಮಗಳುಳ್ಳ ಅನೇಕ ಮಹತ್ವದ ಕ್ರಮಗಳನ್ನು ಈ ಅಲ್ಪ ಸಮಯದಲ್ಲೇ ಅವರು ಕೈಗೊಂಡಿರುವುದು ಶ್ಲಾಘನೆಗೆ ಪಾತ್ರವಾಗಿದೆ. 2019ರ ಆಗಸ್ಟ್ನಲ್ಲಿ ಸುಪ್ರೀಂ ಕೋರ್ಟ್ ನ್ಯಾಯಮೂರ್ತಿಗಳ ಸಂಖ್ಯೆಯನ್ನು 34ಕ್ಕೆ ಏರಿಸಿದ್ದರೂ ಬಾಕಿ ಪ್ರಕರಣಗಳ ಸಂಖ್ಯೆ ನಿಧಾನಗತಿಯಲ್ಲಿ ಹೆಚ್ಚುತ್ತಲೇ ಸಾಗಿತ್ತು. ನ್ಯಾ. ಲಲಿತ್ ನೇತೃತ್ವದಲ್ಲಿ ಕಾರ್ಯನಿರ್ವಹಣೆ ಸಂದರ್ಭದಲ್ಲಿ ಈ ಪ್ರಕರಣಗಳ ಸಂಖ್ಯೆ ಇಳಿಮುಖವಾಗಿ ಸಾಗಿದ್ದು ವಿಶೇಷ. 2022ರ ಸೆಪ್ಟೆಂಬರ್ 1 ರಂದು 70,310 ಪ್ರಕರಣಗಳಿದ್ದರೆ, ಅಕ್ಟೋಬರ್ 1ರಂದು ಈ ಸಂಖ್ಯೆ 69,461ಕ್ಕೆ ತಗ್ಗಿತು. ಪ್ರಕರಣಗಳ ಪಟ್ಟಿ ಮಾಡುವಲ್ಲಿ ತ್ವರಿತಗತಿ ಹಾಗೂ ಪಾರದರ್ಶಕತೆಯನ್ನು ತಂದದ್ದು ಈ ನಿಟ್ಟಿನಲ್ಲಿ ಸಾಕಷ್ಟು ಕೊಡುಗೆ ನೀಡಿತು. ಈಗ ನೂತನ ಮುಖ್ಯ ನ್ಯಾಯಮೂರ್ತಿಗಳು ನಾಲ್ಕು ವಿಶೇಷ ಪೀಠಗಳನ್ನು ರಚಿಸಲು ಮುಂದಾಗಿರುವುದು ಕೂಡ ತ್ವರಿತ ನ್ಯಾಯದಾನದ ಆಲೋಚನೆಯ ಮುಂದುವರಿದ ಭಾಗವೇ ಆಗಿದೆ. ಇದೇ ರೀತಿಯ ಸುಧಾರಣೆಗಳು ಮುಂದುವರಿದರೆ ಬಾಕಿ ಇರುವ ಪ್ರಕರಣಗಳ ಸಂಖ್ಯೆ ವ್ಯಾಪಕವಾಗಿ ತಗ್ಗಿ ಕಕ್ಷಿದಾರರಿಗೆ ಅನುಕೂಲವಾಗಲಿದೆ.
