ಕರೊನಾ ಸೋಂಕು ಮತ್ತು ಆ ಸಂಬಂಧಿತ ಲಾಕ್ಡೌನ್ ನೀಡಿದ ಆಘಾತದಿಂದ ಚೇತರಿಸಿಕೊಳ್ಳುವ ಮುನ್ನವೇ, ಈಗ ಅಕಾಲಿಕ ಮಳೆ, ಪ್ರವಾಹಸದೃಶ ಸ್ಥಿತಿ ಸೃಷ್ಟಿಯಾಗಿದೆ. ಈ ಸರಣಿ ಸಂಕಷ್ಟಗಳು ಶ್ರಮಜೀವಿಗಳ ಬದುಕಿಗೆ ದೊಡ್ಡ ಆಘಾತ ನೀಡಿವೆ. ನಮ್ಮಲ್ಲಿ ಅದೆಷ್ಟೋ ಜನ ಸ್ವಾಭಿಮಾನದಿಂದ ಬದುಕಲು ಸಣ್ಣಪುಟ್ಟ ವ್ಯಾಪಾರದ ಮಾರ್ಗವನ್ನು ಕಂಡುಕೊಂಡಿದ್ದಾರೆ. ಬೀದಿ ಬದಿ ವ್ಯಾಪಾರ ಆರ್ಥಿಕ ಚಟುವಟಿಕೆಗಳನ್ನೂ ತೀವ್ರಗೊಳಿಸುತ್ತದೆ. ಆದರೆ, ಕರೊನಾ ಸಂಕಟ, ಈಗಿನ ಮಳೆ ಸೃಷ್ಟಿಸಿರುವ ಅವಾಂತರದ ಪರಿಣಾಮ ರಸ್ತೆವ್ಯಾಪಾರಿಗಳು ದಿಕ್ಕುತೋಚದಂತಾಗಿದ್ದಾರೆ. ವಿಪರ್ಯಾಸವೆಂದರೆ, ಇವರಿಗಾಗಿ ಸರ್ಕಾರ ರೂಪಿಸಿದ್ದ ಯೋಜನೆಗಳು ಸರಿಯಾಗಿ ಜಾರಿಯಾಗಿಲ್ಲ. ನೈಜ ಫಲಾನುಭವಿಗಳೇ ವಂಚಿತರಾಗಿರುವುದು ಒಂದೆಡೆಯಾದರೆ, ಈ ವ್ಯಾಪಾರಿಗಳಿಗೆ 50 ಸಾವಿರ ರೂಪಾಯಿವರೆಗಿನ ಸಾಲಸೌಲಭ್ಯ ಕಲ್ಪಿಸುವ ಸರ್ಕಾರದ ‘ಬಡವರ ಬಂಧು’ ಯೋಜನೆ ನಿಂತುಹೋಗಿದೆ. ಪಿಎಂ ಸ್ವನಿಧಿ ಯೋಜನೆಯ ಲಾಭ ಸರಿಯಾಗಿ ಸಿಗುತ್ತಿಲ್ಲ. ಕರೊನಾ ಹೊತ್ತಲ್ಲಿ ಘೋಷಿಸಲಾದ ಪರಿಹಾರದ ಮೊತ್ತವೂ ಬಹುತೇಕ ಸಣ್ಣ ವ್ಯಾಪಾರಿಗಳಿಗೆ ತಲುಪಿಲ್ಲ. ಹೀಗಿರುವಾಗ ಸಮಸ್ಯೆಯನ್ನು ಬಗೆಹರಿಸುವವರು ಯಾರು, ಘೋಷಿಸಿದ ಯೋಜನೆಗಳು, ಸೌಲಭ್ಯಗಳು ಜಾರಿಯಾಗದಿದ್ದರೆ ನ್ಯಾಯ ಯಾರಿಗೆ ಕೇಳೋಣ? ಎಂಬ ಬೀದಿ ಬದಿ ವ್ಯಾಪಾರಿಗಳ ಪ್ರಶ್ನೆಗೆ ಉತ್ತರವೇ ಇಲ್ಲದಂತಾಗಿದೆ.
