ಪ್ರಸಕ್ತ ಯೋಜನೆಗೆ ತಮಿಳುನಾಡಿನ ನೆಲ-ಜಲ ಯಾವುದೂ ಬಳಕೆಯಾಗುತ್ತಿಲ್ಲ. ಕರ್ನಾಟಕ ತನ್ನ ಪಾಲಿನ ನೀರಿನಲ್ಲಿ ಜಲಾಶಯ ನಿರ್ಮಾಣ ಮಾಡಲು ಮುಂದಾಗಿದೆ. ಮೇಕೆದಾಟು ಯೋಜನೆ ವಿಚಾರವಾಗಿ ಕೇಂದ್ರ ಸರ್ಕಾರದ ಮೇಲೆ ಒತ್ತಡ ತರಬೇಕಿದೆ. ಇಲ್ಲಿಯೂ, ರಾಜಕೀಯವನ್ನು ಬದಿಗಿರಿಸಿ, ಯೋಜನೆ ಅನುಷ್ಠಾನಕ್ಕೆ ಪೂರಕ ನಿರ್ಣಯ, ಕ್ರಮಗಳನ್ನು ಕೈಗೊಳ್ಳಬೇಕು. ಒಂದುವೇಳೆ, ಜಲವಿವಾದಗಳು ಕೋರ್ಟು ಮೆಟ್ಟಿಲು ಹತ್ತಿದರೆ ಬಗೆಹರಿಯಲು ದಶಕಗಳೇ ಬೇಕು ಎಂಬುದಕ್ಕೆ ಹಲವು ನಿದರ್ಶನಗಳಿವೆ. ಮುಖ್ಯವಾಗಿ, ಮೇಕೆದಾಟು ಯೋಜನೆಯಿಂದ ತಮಿಳುನಾಡಿಗೆ ಯಾವುದೇ ನಷ್ಟವಿಲ್ಲ. ಆದರೂ, ಅದು ವಿರೋಧ, ಆಕ್ಷೇಪ ತೋರುತ್ತಿರುವುದು ಸೂಕ್ತವಲ್ಲ. ಇಂಥ ವಿವಾದಗಳು ರಾಜ್ಯ ರಾಜ್ಯಗಳ ನಡುವೆ ಸೌಹಾರ್ದದ ನೆಲೆಯಲ್ಲಿ ಇತ್ಯರ್ಥಗೊಳ್ಳಬೇಕು. ಗೊಂದಲ, ಅನುಮಾನಗಳಿದ್ದರೆ ಪರಸ್ಪರ ಮಾತುಕತೆ ಮೂಲಕ ಪರಿಹಾರ ಕಂಡುಕೊಳ್ಳಬಹುದು. ಅದನ್ನು ಬಿಟ್ಟು ಸಂಘರ್ಷದ ಹಾದಿ ತುಳಿಯಬಾರದು. ಮೇಕೆದಾಟು ಯೋಜನೆ ವಿಷಯದಲ್ಲಿ ತಮಿಳುನಾಡು ಆ ವಿವೇಚನೆ ಪ್ರದರ್ಶಿಸಲಿ, ರಾಜ್ಯ ಸರ್ಕಾರ ಕೂಡ ಎಚ್ಚರಿಕೆಯಿಂದ ಹೆಜ್ಜೆ ಇರಿಸಲಿ. ಇಂಥ ಜಲವಿವಾದಗಳನ್ನು ನಿಗದಿತ ಕಾಲಮಿತಿಯೊಳಗೆ ಬಗೆಹರಿಸಲು ಕೇಂದ್ರವು ಸೂಕ್ತ ವ್ಯವಸ್ಥೆ ರೂಪಿಸಬೇಕು. ಪಂಜಾಬ್-ಹರಿಯಾಣ, ಆಂಧ್ರಪ್ರದೇಶ-ತೆಲಂಗಾಣ ಸೇರಿದಂತೆ ಹಲವು ರಾಜ್ಯಗಳ ನಡುವೆ ಜಲವಿವಾದಗಳಿವೆ. ಇವು ದೀರ್ಘಾವಧಿಯಾಗಿ ಮಾರ್ಪಟ್ಟರೆ ಕೃಷಿ, ನೀರಾವರಿ ಸೇರಿ ಹಲವು ರಂಗಗಳಿಗೆ ನಷ್ಟ. ಅದನ್ನು ತಪ್ಪಿಸಲು ಕೇಂದ್ರ ಸರ್ಕಾರ ಇಚ್ಛಾಶಕ್ತಿ ಪ್ರದರ್ಶಿಸಲಿ.
