ಬೆಂಗಳೂರು ಮಾರ್ಗವಾಗಿ ಕತಾರ್ ಹಾಗೂ ಶ್ರೀಲಂಕಾ ಸೇರಿ ಇನ್ನಿತರ ದೇಶಗಳಿಗೆ ಡ್ರಗ್ಸ್ ಪೂರೈಕೆ ಮಾಡುತ್ತಿದ್ದ ಜಾಲವನ್ನು ಎನ್ಸಿಬಿ ಪತ್ತೆ ಹಚ್ಚಿದೆ. ಮಾದಕ ದ್ರವ್ಯದ ದಂಧೆ ವ್ಯಾಪಕವಾಗಿ ಆವರಿಸಿಕೊಂಡಿರುವುದಕ್ಕೆ ಇದು ಸಾಕ್ಷಿ. ಮತ್ತೊಂದು ಬೆಳವಣಿಗೆಯಲ್ಲಿ ತಾಲಿಬಾನಿಗಳ ಡ್ರಗ್ಸ್ ದಂಧೆಯೂ ಬಯಲಾಗಿದೆ. ಅಫ್ಘಾನಿಸ್ತಾನದಿಂದ ಆಸ್ಟ್ರೇಲಿಯಾ ಸೇರಿ ಹಲವು ದೇಶಗಳಿಗೆ ಮಾದಕ ದ್ರವ್ಯ ಕಳ್ಳಸಾಗಾಟ ಮಾಡಲು ತಾಲಿಬಾನಿಗಳು ಬೆಂಗಳೂರು, ಹೈದರಾಬಾದ್ ಸಹಿತ ಭಾರತದ ಹಲವು ನಗರಗಳನ್ನು ಬಳಸಿಕೊಳ್ಳುತ್ತಿರುವುದು ಬೆಳಕಿಗೆ ಬಂದಿದೆ. ಇತ್ತೀಚಿನ ಹಲವು ಕಳ್ಳಸಾಗಣೆ ಪ್ರಕರಣಗಳ ಬಗ್ಗೆ ಕಂದಾಯ ಬೇಹುಗಾರಿಕೆ ನಿರ್ದೇಶನಾಲಯ (ಡಿಆರ್ಐ) ನಡೆಸಿದ ತನಿಖೆ ವೇಳೆ ತಾಲಿಬಾನ್ ಸಂಘಟನೆಯ ಕುಕೃತ್ಯ ಬಯಲಾಗಿದೆ. ಸಮೃದ್ಧತೆಗೆ ಹೆಸರಾಗಿದ್ದ ಪಂಜಾಬ್ ರಾಜ್ಯ ಈಗ ಡ್ರಗ್ಸ್ನ ಹಾವಳಿಯಿಂದ ತತ್ತರಿಸಿದ್ದು, ಅದರಿಂದ ಹೊರಬರಲು ನಾನಾ ಮಾರ್ಗಗಳನ್ನು ಪ್ರಯೋಗಿಸುತ್ತಿದೆ. ಅಲ್ಲಿನ ಯುವಕರು ಈ ದುಶ್ಚಟದಿಂದ ನೈತಿಕವಾಗಿ, ಆರ್ಥಿಕವಾಗಿ ದಿವಾಳಿಯಾಗುತ್ತಿದ್ದಾರೆ. ಪಾಕಿಸ್ತಾನದಿಂದ ಪಂಜಾಬ್, ಜಮ್ಮು-ಕಾಶ್ಮೀರ ಸೇರಿ ಹಲವೆಡೆ ಮಾದಕ ದ್ರವ್ಯ ಕಳ್ಳಸಾಗಣೆ ಮೂಲಕ ಬಂದು ತಲುಪುತ್ತಿದೆ. ಈಗ ತಾಲಿಬಾನಿಗಳ ಜಾಲ ಬಯಲಾಗಿದ್ದು, ಅದು ಅಂತಾರಾಷ್ಟ್ರೀಯ ಮಟ್ಟದಲ್ಲಿ ಹರಡಿಕೊಂಡಿರುವುದು ಆತಂಕಕಾರಿ ವಿಚಾರ.
