ಫೋನ್ ಹ್ಯಾಕ್ ಯಾದಿಯಲ್ಲಿ ಮೋದಿ ಸಂಪುಟದ ಇಬ್ಬರು ಸಚಿವರು, ಕಾಂಗ್ರೆಸ್ ನಾಯಕ ರಾಹುಲ್ ಗಾಂಧಿ, 40 ಪತ್ರಕರ್ತರು, ಅನೇಕ ಸರ್ಕಾರಿ ಅಧಿಕಾರಿಗಳು, ವಿಜ್ಞಾನಿಗಳು ಇದ್ದಾರೆ ಎಂದು ‘ದಿ ವೈರ್’ ಮುಂತಾದ ಮಾಧ್ಯಮಗಳು ವರದಿ ಮಾಡಿವೆ. ಈ ನಡುವೆ, ಜೆಡಿಎಸ್-ಕಾಂಗ್ರೆಸ್ ಸಮ್ಮಿಶ್ರ ಸರ್ಕಾರ ಇದ್ದಾಗ ಕರ್ನಾಟಕದ ಅನೇಕರ ಫೋನ್ ಸಹ ಹ್ಯಾಕ್ ಆಗಿರುವ ಬಗ್ಗೆ ಆರೋಪ ವ್ಯಕ್ತವಾಗಿದೆ. ಪೆಗಾಸಸ್ ಸ್ಪೈವೇರ್ ಅನ್ನು ಇಸ್ರೇಲ್ ಮೂಲದ ಎನ್ಎಸ್ಒ ಎಂಬ ತಂತ್ರಜ್ಞಾನ ಸಂಸ್ಥೆ ರೂಪಿಸಿ ಮಾರಾಟ ಮಾಡುತ್ತದೆ. ಆದರೆ, ಭಾರತದಲ್ಲಿ ಈಗ ಉಂಟಾಗಿರುವ ವಿವಾದದಲ್ಲಿ ಕೇಳಿಬಂದಿರುವ ಹೆಸರುಗಳನ್ನು ತಾನು ನಿಗಾ ಯಾದಿಯಲ್ಲಿ ಇರಿಸಿಲ್ಲ ಎಂದು ಸಂಸ್ಥೆ ಹೇಳಿಕೊಂಡಿದೆ. ಒಟ್ಟಿನಲ್ಲಿ ವಿಷಯ ಗೋಜಲಾಗುತ್ತಲೇ ಇದೆ. ತಂತ್ರಜ್ಞಾನ ವಿಪರೀತವಾಗಿ ಬೆಳೆದಿರುವ ಇಂದಿನ ದಿನಮಾನದಲ್ಲಿ ಸಾರ್ವಜನಿಕ ಜೀವನದಲ್ಲಿ ಇರುವವರಿಗೆ ಇಂಥ ಸನ್ನಿವೇಶಗಳು ಸಾಮಾನ್ಯ ಎಂಬಂತಾಗಿದೆ. ಆಡಿಯೊ, ವಿಡಿಯೊ, ತಿರುಚಲ್ಪಟ್ಟ ಚಿತ್ರಗಳು-ಮಾಹಿತಿಗಳು... ಹೀಗೆ ವಿವಿಧ ಮಾಧ್ಯಮಗಳ ಮೂಲಕ ಯಾರ ಬಗೆಗಾದರೂ ವಿವಾದ ಉಂಟುಮಾಡುವುದು ಬಹಳ ಸುಲಭ ಎಂದಾಗಿದೆ. ಈ ಪೈಕಿ ಕೆಲವರ ವಿಷಯದಲ್ಲಿ ಸತ್ಯಾಂಶ ಇದ್ದರೂ, ವಿವಾದ ಉಂಟಾದಾಕ್ಷಣ ಎಲ್ಲರೂ ತಪು್ಪಗಾರರು ಎಂದ ಷರಾ ಬರೆಯಲಾಗದು.
