ಇಂಥ ಅಚಾತುರ್ಯಗಳು ಇದೇ ಮೊದಲೇನಲ್ಲ. ಆದರೆ, ಖಂಡಿತವಾಗಿಯೂ ಇದು ವಿತ್ತೀಯ ಶಿಸ್ತಿನ ನಡೆಯಂತೂ ಅಲ್ಲ. ಬೊಕ್ಕಸದ ಸ್ಥಿತಿ ನೋಡದೆಯೇ ಯೋಜನೆಗಳನ್ನು ಘೋಷಿಸುವುದು ಸರಿಯಲ್ಲ. ಇದರಿಂದ ಆರ್ಥಿಕ ಬಿಕ್ಕಟ್ಟು ಸೃಷ್ಟಿಯಾಗುವ ಜತೆಗೆ, ಸರ್ಕಾರದ ಮೇಲಿನ ನಂಬಿಕೆಗೂ ಪೆಟ್ಟು ಬೀಳುತ್ತದೆ. ಗುತ್ತಿಗೆದಾರರು ಗುಣಮಟ್ಟದ ಕಾಮಗಾರಿ ಕೈಗೊಳ್ಳದಿರಲು ಇದು ಕೂಡ ಒಂದು ಕಾರಣವಾಗಬಹುದು. ‘ಜನಪ್ರಿಯ’ ಕಾರ್ಯಕ್ರಮಗಳ ವೆಚ್ಚ ಭರಿಸಲು ಕೂಡ ಸರ್ಕಾರ ಹೆಣಗಾಡುತ್ತಿದೆ. ಪ್ರಕೃತಿ ವಿಕೋಪ, ಕರೊನಾ ಪರಿಹಾರ ಕಾರ್ಯ, ರೈತರ ಮಕ್ಕಳ ಉನ್ನತ ಶಿಕ್ಷಣಕ್ಕೆ ಶಿಷ್ಯವೇತನ, ರೈತ ಉತ್ಪಾದಕ ಕಂಪನಿಗಳಿಗೆ ಅಮೃತ ಯೋಜನೆ- ಇವುಗಳಿಂದ ರಾಜ್ಯದ ಬೊಕ್ಕಸಕ್ಕೆ 3,574,67 ಕೋಟಿ ರೂ.ಗಳ ಹೆಚ್ಚುವರಿ ಹೊರೆ ಬಿದ್ದಿದೆ. ಕೆಲ ಅನಿವಾರ್ಯ ಸಂದರ್ಭಗಳಲ್ಲಿ ಹೊಸ ಘೋಷಣೆಗಳನ್ನು ಮಾಡಬೇಕಾಗುತ್ತದೆ. ಆದರೆ, ಕಾಮಗಾರಿಗಳ ವಿಷಯದಲ್ಲಿ ಹಣಕಾಸಿನ ಲಭ್ಯತೆಯನ್ನು ಪರಿಶೀಲಿಸಿ ಮುಂದಿನ ಹೆಜ್ಜೆ ಇರಿಸುವುದು ಅಗತ್ಯ. ಆಗಲೇ ಹಣಕಾಸು ಸಂಬಂಧಿತ ಅಪಸವ್ಯಗಳಿಗೆ ಕಡಿವಾಣ ಹಾಕಲು ಸಾಧ್ಯ.
