ಕೌಟುಂಬಿಕ ಪ್ರಕರಣಗಳ ಇತ್ಯರ್ಥಕ್ಕಾಗಿ ಪ್ರತಿ ಜಿಲ್ಲೆಯಲ್ಲಿ ಪ್ರತ್ಯೇಕ ನ್ಯಾಯಾಲಯ ಸ್ಥಾಪಿಸಬೇಕೆಂಬ ವಿಚಾರವು ಭಾರತದಂತಹ ಕುಟುಂಬ ಹಾಗೂ ಸಮುದಾಯಮುಖಿ ಸಮಾಜಕ್ಕೆ ಶೋಭೆ ತರುವ ಸಂಗತಿಯೇನಲ್ಲ. ಆದರೆ, ಪ್ರಕರಣಗಳ ಸಂಖ್ಯೆ ಏರುತ್ತಿರುವ ಕಳವಳಕಾರಿ ಪರಿಸ್ಥಿತಿಯ ಹಿನ್ನೆಲೆಯಲ್ಲಿ ಇಂತಹ ನ್ಯಾಯಾಲಯಗಳ ಸ್ಥಾಪನೆಯು ಅನಿವಾರ್ಯವಾಗಿದೆ ಎನ್ನಬಹುದು. ನ್ಯಾಯಾಲಯದ ಕಟಕಟೆ ಏರುವ ಬಹುತೇಕ ಕೌಟುಂಬಿಕ ಪ್ರಕರಣಗಳು ಪತಿ ಹಾಗೂ ಪತ್ನಿ ನಡುವಿನ ವ್ಯಾಜ್ಯಗಳು ಹಾಗೂ ಮಾನಸಿಕ ಹಿಂಸೆಗೆ ಸಂಬಂಧಪಟ್ಟವುಗಳೇ ಆಗಿರುತ್ತವೆ. ಇತ್ತೀಚಿನ ದಿನಗಳಲ್ಲಿ ಕ್ಷುಲ್ಲಕ ಕಾರಣಕ್ಕೂ ಕೌಟುಂಬಿಕ ಜಗಳಗಳು ನ್ಯಾಯಾಲಯದ ಅಂಗಳಕ್ಕೆ ಬರುತ್ತಿರುವುದು ಸಾಮಾಜಿಕ ಸ್ವಾಸ್ಥ್ಯದ ದೃಷ್ಟಿಯಿಂದ ಹಿತಕರ ಸಂಗತಿಯಲ್ಲ. ಬದಲಾದ ಸಾಮಾಜಿಕ-ಆರ್ಥಿಕ ಪರಿಸ್ಥಿತಿ ಇದಕ್ಕೆ ಪ್ರಮುಖ ಕಾರಣವಾಗಿರಬಹುದು. ವಿವಾಹವ್ಯವಸ್ಥೆಯು ಭಾರತದ ಸಾಮಾಜಿಕ ಹಂದರದ ಒಂದು ಮುಖ್ಯ ಹೆಗ್ಗುರುತಾಗಿದ್ದು, ಮದುವೆ ಎಂಬುದು ಇಬ್ಬರು ವ್ಯಕ್ತಿಗಳು ಒಂದಾಗುವುದಷ್ಟೇ ಅಲ್ಲ; ಬದಲಾಗಿ ಕುಟುಂಬ ಮತ್ತು ಸಮುದಾಯಗಳ ಸಂಗಮ ಕೂಡ ಹೌದು ಎಂದು ನಮ್ಮಲ್ಲಿ ಪರಿಗಣಿಸಲಾಗುತ್ತದೆ. ಕ್ಷುಲ್ಲಕ ಕಾರಣಗಳಿಗಾಗಿ ಮದುವೆ ಮುರಿದುಬೀಳುವುದು, ನ್ಯಾಯಾಲಯದ ಕಟಕಟೆ ಏರುವುದು ಅನುಕರಣೀಯ ಹಾಗೂ ಮಾದರಿ ಎಂದೇ ಬಿಂಬಿತವಾಗಿರುವ ಭಾರತೀಯ ಕುಟುಂಬ ವ್ಯವಸ್ಥೆಗೆ ಧಕ್ಕೆ ತರುವಂತಹುದು. ಸತಿ-ಪತಿ ನಡುವೆ ಹೊಂದಾಣಿಕೆ, ತಾಳ್ಮೆಯ ಸಹಜೀವನವೇ ಈ ಸಮಸ್ಯೆಗೆ ಸೂಕ್ತ ಪರಿಹಾರ.
